VOV4.Bahnar – Tơ oei unh om đơ̆ng ‘lâ̆p, tơ oei hơgăm ‘nhŏng oh pôm yă ƀok hlôi pơm đei lơ tơdrong ưh kơ ‘lơ̆ng hăm tơdrong erih kon pơlei kon kông. Tơ oei unh om ‘nhŏng oh pôm yă ƀok gô pơrăm truh hơdrung kon bơngai. Đe hơ ioh đei rơneh hơnơ̆ng ƀơm lơ tơdrong jĭ, mă hăt noh tơdrong jĭ găh pham; kơ̆l ‘ngok ưh đei hơlăng, hơkâu jăn kue... Dôm tơdrong răm âu pơrăm kơnê̆ truh tơdrong erih unh hnam, tơdrong rơgei, tơdrong pơm jang... ‘Nâu duh jing minh lơ̆m dôm tơdrong tơm kăp gĭt pơm ăn pơngot rơvĕt hin dơnuh lơ̆m tơpôl kon pơlei kon kông.

Atŭm kơtŏng dih băl păng lăp ‘nao 16 xơnăm mă lei La Thị Hoa păng La Văn Nam bơngai Đan Lai tơ̆ pơlei Cò Phạt xăh Môn Sơn apŭng Con Cuông, dêh char Nghệ An duh tơ oei dih băl. Kon drăkăn hơmol kơ bre xư tŏk 2 xơnăm, đơ̆ng mă ‘nao đei rơneh noh mon hlôi đei tơdrong ưh kơ ‘lơ̆ng. La Thị Hoa ăn tơbăt: “Inh hăm klo inh ƀơ̆p băl lăp kơ đon noh tơ oei đĕch. Mĕ ƀă duh drơ̆ng nơ̆r, nhôn vih oei atŭm păng rơneh kon hơ ioh đĕch ưh đei pơxĭt pơkong kiơ ôh. Adrol ki kơtơ̆ng tơroi inh hăm klo inh noh ‘nhŏng oh, mă lei ưh đei kiơ ôh, duh gơh tơ oei dih băl đĕch”.

Tơdrong mă hŏk tro Đan Lai lê̆ hŏk kơplăh kơplơt vă oei klo noh xơnăm mă yơ duh đei, drăkăn tŏk 14 xơnăm tam mă oei klo noh đei lăng jing hŏi bơih. Păng đon kơchĕng găh tơ oei unh om adoi ƀônh, đe hơ ioh hưch băl noh bơngai ‘lŏ trong hloi, đang kơ noh pơgơ̆r et xa păng vih oei atŭm, oei pơkong lai yơ duh bưh. Pơmai La Thị Nga tơ̆ pơlei Cò Phạt ăn tơbăt, tơdrong oei unh om đơ̆ng ‘lâ̆p păng tơ oei ‘nhŏng oh pôm yă ƀok jing tơdrong ưh đei chrĕng kiơ ôh:  “Đe xư ‘meh iŏk klo, iŏk hơkăn noh chu kiơ̆ đĕch yơh, adrol ki hơtŏ xơnăm đe xư noh rơneh kon bơih, ưh kơ băt ‘nhŏng oh kơtum kơtŏng ôh, đe xư hưch băl noh ăn vih oei atŭm đang kơ noh rơneh kon hơ ioh, ưh kơ lăp noh đe xư hơchăng băl vih oei hăm mĕ ƀă".

Tơdrong tơ oei unh om đơ̆ng ‘lâ̆p păng tơ oei hơgăm ‘nhŏng oh pôm yă ƀok kơ bre klo hơkăn bơngai Đan Lai tơ̆ Con Cuông, dêh char Nghệ An jing minh tơdrong tơrĕk hloh găh tơdrong tơ oei unh om păng jơhngơ̆m jăn rơneh hơ ioh, kơlih hăp pơdui lơ tơdrong ưh kơ ‘lơ̆ng, tơrĕk truh tơdrong ‘lơ̆ng măt bơngai. Kiơ̆ tơroi đơ̆ng yă Nguyễn Thị An – Kơdră Anih jang HealthBridge Canada tơ̆ Việt Nam, dang ei anih jang oei tơlĕch minh ƀar tơdrong jang vei lăng jơhngơ̆m jăn tơ̆ dêh char Sơn La noh tơdrong âu hlôi pơrăm tih tên truh tơdrong erih xa: "Bơ̆n ƀôh hơdăh tơdrong ‘lơ̆ng măt bơngai ƀơm răm đơ̆ng xơnăm oei mơlôh tam mă tôm vơ̆ tih, tam mă kĕ hơtŏk tơ iung tôm tơdrong mă hlôi rơneh hơ ioh noh pơm ăn kon hơ ioh ưh kơ ‘lơ̆ng găh jơhngơ̆m jăn truh tơ̆ kơ̆l ‘ngok, atŭm hăm tơdrong dôm bơngai hơ ioh âu tơ oei unh om đơ̆ng ‘lâ̆p, noh hơ ioh drăkăn hơnơ̆ng athei lê̆ hŏk păng đơ̆ng noh ưh đei hlôh vao, tơdrong kloh klĕch găh erih xa lơ̆m unh hnam, trong pơtho vei rong kon hơ ioh ưh đei băt. Mưh tơdrong mă âu hơnơ̆ng kơ hơlơ̆k hơle noh pơrăm truh tơ̆ minh hnưr kon bơngai, truh tơ̆ kon xâu noh roi hli hlơt hloh".

Tơdrong tơ oei unh om đơ̆ng ‘lâ̆p păng tơ oei hơgăm ‘nhŏng oh pôm yă ƀok pơrăm tih tên truh tơdrong erih. Đe hơ ioh đei rơneh ƀơm lơ tơdrong jĭ, ưh kơ măh kơchơ̆t ‘lơ̆ng lơ̆m hơkâu jăn, ưh đei vei rong tơnăp. ‘Nâu duh jing tơdrong tơm pơm ăn ưh đei ‘lơ̆ng hăm hơdrung kon bơngai, pơrăm truh unh hnam duh nhen hăm tơpôl. Thoi noh, tơdrong tơroi tơbăt, dăh mă hơmŏ dôm tơdrong hlôh vao ăn bơngai mĕ jing tơdrong kăl đei tơrĕk kăp gĭt hloh.

Lan chih păng pơre nơ̆r