VOV4.Bahnar - Tơdrong pôk rơih bơngai jang tang măt ăn Kuôk hô̆i jăl 15 păng jang tang măt lơ̆m Hô̆i đŏng kon pơlei dôm jăl jang đơ̆ng  2021-2026 gô đei tơlĕch ăh năr 23/5 jing tơdrong chĭnh trĭ kăp gĭt kơ teh đak, đei pơgơ̆r đơ̆ng rŏng kơ đei jơnei Hop akŏm bơngai jang tang măt jâ̆p teh đak mă 13 kơ Đảng. Tơdrong rơih bơngai jang tang măt jing bơngai kon kông vang jang lơ̆m Kuôk hô̆i păng Hô̆i đŏng kon pơlei dôm jăl jang đei xơnong kăp gĭt lơ̆m tơdrong jang chĭnh trĭ dôm jăl pơma atŭm păng anih jang kon pơlei pôk rơih pơma adrô̆. Lơ̆m dôm hơyak pơma đam đơ̆ng Măt trâ̆n tôh kuôk dôm jăl rơih iŏk bơngai lĕch măt tơgar jing bơngai kon kông vă lĕch măt tơgar jang tang măt ăn Kuôk hô̆i păng jang tang măt lơ̆m Hô̆i đŏng kon pơlei dôm jăl athei đei dôm tơchơ̆t hơdăh hloh, mă lei duh ưh kơ gơh pơkăp lơ tơdrong jat ăn minh 'nu jang tang măt.

          Kiơ̆ kơ ƀok Nguyễn Lâm Thành, Phŏ Kơdră Anih jang găh bơngai kon kông kơ Kuôk hô̆i, tơdrong tơrĕk xơnong pôk rơih, lĕch măt tơgar đơ̆ng kon pơlei kon kông lơ̆m pôk rơih Kuôk hô̆i păng anih jang mă kon pơlei pôk tơlĕch tơ̆ dôm tơring hơnơ̆ng đei dôm jăl kơpal tơrĕk pơtho. Vă pơm thoi yơ, chĕp vei tơdrong hiôk kơ rim bơngai lĕch măt tơgar jing bơngai kon kông tơ̆ kơdih tơring po đe xư oei erih jang xa. Kơlih ưh đei bu băt vao găh tơring groi kông, tơring xơlam teh hloh kơdih po dôm bơngai tŏk bŏk rim năr atŭm erih jang xa, oei xa hăm kon pơlei: Dôm bơngai lĕch măt tơgar âu hlôh vao hơdăh găh cham char hơgăt teh tơ̆ tơring mă kơdih po đe xư erih jang xa păng duh jing tơring teh kơ kon pơlei kon kông tăh hla. Mă ƀar noh hlôh vao hơdăh khôi juăt păng đon bơnôh, noh jing dôm tơdrong mă kon pơlei tŏk bŏk oei erih xa. Minh tơdrong dơ̆ng noh atŭm nơ̆r pơma, chư chih phơ phŏ tơdrong hơkŭm tơpôl, 'nhŏng oh kơtum kơtŏng. Noh jing minh tơdrong ƀônh hiôk hăm bơngai lĕch măt tơgar.

          Dang ei, tơdrong hơmet ăn pôk rơih bơngai jang tang măt ăn Kuôk hô̆i jăl 15 păng jang tang măt lơ̆m Hô̆i đŏng kon pơlei dôm jăl jang 2021 - 2026 tơ̆ tơring kon pơlei kon kông, kiơ̆ Anih jang găh bơngai kon kông kơ Kuôk hô̆i xơkơ̆t hlôi jang tơnăp, trŏ ƀlep hăm tơchơ̆t đơ̆ng khôi luơ̆t. Mă lei, yuơ lơ tơdrong phara băl pơđĭ lơ̆m tơpôl păng tơ̆ 'nguaih, tơdrong rơgei hăm bơngai jang tơ̆ tơring kon pơlei kon kông oei kơđeh. Kơsô̆ bơngai hŏk truh đăi hŏk, cao đẳng păng mă gĭt noh tơ̆ kơpal đăi hŏk đei tŏ xĕt lơ̆m kơsô̆ măt bơngai. Tơdrong jang tơroi tơbăt tơ̆ tơring kon pơlei kon kông păng groi kông oei tơnap tap, tơdrong hlôh vao kon pơlei tam mă kơjung, khôi juăt xo oei trăp trĭn. Yuơ noh, rim tơring kăl hơtŏk tơroi tơbăt, pơtho kon pơlei băt vao hơdăh găh xơnong pôk rơih păng lĕch măt tơgar kơ po. Găh tơdrong pơtho pơhrăm hơtŏk hlôh vao lơ̆m chă hơvơn pôk rơih ăn dôm bơngai lĕch măt tơgar duh nhen hơtŏk tơroi tơbăt tơ̆ tơring kon pơlei kon kông. Mă kăl, dôm jăl jang Đảng, jơnŭm pơgơ̆r tơring, Anih pơgơ̆r pôk rơih kăl tơlĕch tơroi pơtho găh xơnong kơ bơngai tăh hla lơ̆m tơdrong pôk rơih. Tơrĕk pơre hăm nơ̆r kon kông, pơgơ̆r pơma đam găh tơdrong pơkăp bơngai jang; găh tơdrong erih pơm jang kơ dôm bơngai lĕch măt tơgar jang tang măt ăn Kuôk hô̆i păng jang tang măt lơ̆m Hô̆i đŏng kon pơlei dôm jăl, vă pơm thoi yơ ăn kon pơlei ƀôh hơdăh tơdrong kăp gĭt găh vang akŏm tăh hla pôk rơih jing xơnong pơyua ăn kơdih po kon pơlei. Noh jing pôk tơlĕch dôm bơngai tang măt ăn kon pơlei vă vang chih akŏm, tơlĕch, hơlen tơdrong jang kiơ̆ tơchơ̆t đei tơrĕk truh tơring kon pơlei kon kông păng groi kông.

          Kiơ̆ kơ ƀok Ma Công Khâm, Ƀĭ thư anih jang đảng, Kơdră Anih vei lăng kon pơlei xăh Thượng Lâm, apŭng Lâm Bình (dêh char Tuyên Quang), tơ̆ xăh Thượng Lâm, hăm hloh  90% kơsô̆ măt bơngai kon kông, tơdrong jang pôk rơih, lĕch măt tơgar đơ̆ng kon pơlei tơ̆ tơring hơnơ̆ng đei tơrĕk hơdăh. Atŭm hăm noh, tơring duh tơrĕk hloh truh xơnong pôk rơih, bơngai lĕch măt tơgar jing bơngai kon kông vă tơdrong jang pôk rơih đei pơgơ̆r hiôk hian, keh kong: Tơdrong pơtruh bơngai lĕch măt tơgar jang lơ̆m Hô̆i đŏng kon pơlei duh đei dôm anih jang chĭnh trĭ tơpôl lơ̆m tơring đei rim bơngai tơrĕk truh. Hăm tơring noh hơnăn dôm bơngai pôk rơih, lĕch măt tơgar truh khei năr âu hlôi đei tơbang. Kiơ̆ pơkăp noh đei tơlĕch hơlen păng pơma đam kiơ̆ 'măng mă 1,2,3 păng tơrĕk truh dôm bơngai đei đe lui yom, gơh rơgei hŏk kơjung trŏ ƀlep hăm xơnong jang ƀơ̆t đei jơnei jang tang măt lơ̆m Hô̆i đŏng kon pơlei.

          Atŭm hăm noh, tơdrong tơrĕk găh xơnong pôk rơih, bơngai lĕch măt tơgar noh bơngai kon kông lơ̆m pôk rơih Kuôk hô̆i păng Hô̆i đŏng kon pơlei dôm jăl kăl đei pơm jang drơ̆ng minh đơ̆ng tơdrong ƀôh băt, rơih iŏk, pơkăp, pơtho pơhrăm, iŏk yua vă pơm kiơ̆ ƀlep tơchơ̆t kang ƀô̆ kiơ̆ tơchơ̆t atŭm đơ̆ng Đảng păng teh đak. Đunh đai kơnh, kăl pơtoi tơrĕk hloh hăm khul kang ƀô̆, bơngai jang kon kông.

          Hăm đe kang ƀô̆ gơh rơgei mă lei oei kơƀah tơdrong pơkăp noh kăl chih tơmơ̆t lơ̆m tơdrong pơtho pơhrăm vă vei xơđơ̆ng ăn tơdrong kăl kang ƀô̆, bơngai jang, lơ̆m noh đei dôm anih jang kon pơlei pôk jang. Pơkăp kang ƀô̆ bơngai kon kông athei hơtŏ hăm tơdrong pơkăp kơsô̆ măt bơngai kơ rim tơring. 'Nguaih kơ noh, kăl tơrĕk kăp gĭt truh dôm khôi luơ̆t đei tơrĕk nhen: Luơ̆t pôk rơih bơngai jang tang măt ăn Kuôk hô̆i păng pôk rơih bơngai jang tang măt lơ̆m Hô̆i đŏng kon pơlei; dôm hla bar pơkăl pơtho găh tơdrong pôk rơih đơ̆ng Teh đak, đơ̆ng Anih juăt jang kơ Kuôk hô̆i păng Jơnŭm pơgơ̆r pôk rơih kơ teh đak.

Lan chih păng pơre nơ̆r