VOV4.Bahnar – Tơdrong tơchơ̆t jang kơ teh đak găh hơtŏk mŭk drăm tơpôl tơring kon pơlei kon kông păng groi kông jăl xơnăm 2021-2030 oei lơ̆m khei năr pơkeh vă pơtruh ăn Thủ tướng Teh đak tơchơ̆t axong jang. Dang ei Anih jang bơngai kon kông tŏk bŏk hơmet tôm hla bar kăl, đei dôm tơdrong tơchơ̆t, pơkăp axong jên jang, dôm Hla bar pơtho anih iŏk jang tơdrong tơlĕch. Thoi noh, tơlĕch jang kiơ̆ tơchơ̆t pơm jang thoi yơ? Tơdrong tơroi  “Pơm jang kơyuơ xơnong pơm tơm kơdih kơ kon bơngai” ‘năr âu tơroi găh tơdrong âu.

Tơdrong tơchơ̆t jang kơ teh đak găh hơtŏk mŭk drăm tơpôl tơring kon pơlei kon kông păng groi kông jăl jang đơ̆ng 2021-2030 gô pơm jang tơ̆ dôm tơring kon pơlei kon kông păng groi kông noh dôm xăh, thôn đei kơsô̆ unh hnam bơngai kon kông đơ̆ng 15% tŏk tơ̆ kơpal. Tơring iŏk jang jing dôm tơring tơnap tap hloh (đei dôm xăh tơring 3, thôn tơnap tap hloh kiơ̆ tơdrong hơlen chih akŏm, pơkăp tơring kon pơlei kon kông păng groi kông kiơ̆ tơdrong hlôh vao hơtŏk tơ iung kơ rim dêh char yuơ Anih jang găh bơngai kon kông tơlĕch, jăl xơnăm 2021 – 2025). Tơdrong jang duh tơlĕch jang tơ̆ dôm tơring mŭk drăm – tơpôl adar kơ hơtŏk tơ iung; bơngai jang tam mă hlôh vao kơjung; anih jang oei tơjruh, mă hăt noh găh trong nơnăm; tơdrong hơmet ming jĭ jăn, hŏk pơhrăm kơ kon pơlei oei lơ tơnap tap...

Dôm xăh, thôn ‘nao roi tơ̆ kơpal gô đei Khul kơpal teh đak axong ming man anih jang, pơm trong ăn hơtŏk tơ iung bơngai jang păng pơkăp dôm trong jang pơyua ăn tơpôl, ăn kon bơngai đei tơrĕk hăm dôm tơdrong kăl, dar deh pơm kơđeh tơdrong ưh kơ hơtŏ pơtêng hăm dôm tơring hơtŏk tơ iung. Ƀok Quàng Văn Hương, Phŏ Kơdră Hô̆i đŏng kon kông kơ Kuôk hô̆i akhan: “Tơring noh jing tơring hlôi hin dơnuh bơih, dang ei athei hơtŏk pơtho tơdrong jang, vă kon pơlei hlôh vao, noh pơm jang mă kĕ hơtŏk tơ iung. Hơtŏk rơgei bơngai jang lơ̆m tơdrong pơkăp adoi đei, mă lei âu jing ‘meh vă Đảng, khul kơpal teh đak tơrĕk hloh, dang bơ̆n athei đei lơ trong jang tơnăp, adrô̆ kơyuơ đơ̆ng ‘măng ‘mi tih đak hơbông, dăh mă pơrang jĭ, kon pơlei hiong pơgoh mŭk tơmam, thoi noh athei đei tơdrong vă kon pơlei gơh kơchăng, mă mônh noh đei trong jang xa, mă ƀar noh athei kơjăp xơđơ̆ng, đơ̆ng thŭ y truh tang găn păng tơjră pơrang jĭ, ‘mi kial cham char pơrăm”

‘Nguaih kơ noh, tơring pơm jang oei jing dôm xăh tơnap tap (xăh tơring 2): Jing dôm xăh đei lơ kon pơlei kon kông erih jang xa akŏm minh ƀôt pơlei, dôm kơƀah minh dăh mă lơ tơdrong nhen anih pơm jang păng tơrĕk dôm tơdrong pơyua lơ̆m tơpôl. Hăm dôm xăh tơring 2, teh đak gô tơgŭm pơm trong jang xa, axong ming man anih jang kăl mă oei tam tôm, mă hăt noh pơm jang kiơ̆ pơkăp tơchơ̆t ăn kon bơngai.

Tơring mă blŭng hơtŏk tơ iung (dôm xăh tơring 1) duh oei lơ̆m pơkăp đei yua đơ̆ng tơdrong jang, đei hloi dôm xăh hlôi đei jơnei tơchơ̆t tơring pơxĕl ‘nao; dôm xăh đei kơsô̆ unh hnam hin dơnuh tơ̆ hơla 10%. Mă lei, hăm dôm xăh tơring 1, mă kăl vă pơm kiơ̆ pơkăp jang hăm kon bơngai lơ̆m unh hnam hin dơnuh, tơjê̆ hin dơnuh.

Kiơ̆ kơ yă Ma Thị Thúy, Phŏ Kơdră juăt jang kơ Khul jang tang măt ăn Kuôk hô̆i dêh char Tuyên Quang, tơdrong axong jên jang âu athei iŏk đơ̆ng tơdrong kăl kơ tơring, axong adrol ăn dôm xăh tơnap tap, tơring tơnap tap hloh vă pơm trong tơgŭm ăn dôm tơring tơnap tap dăh hrôih đei yua dôm tơdrong kăl găh anih jang păng dôm tơdrong hiôk nai vă hơtŏk tơ iung.  

Năr 8/7 âu ki, Phŏ Thủ tướng juăt jang Trương Hòa Bình, Kơdră Jơnŭm pơgơ̆r jang Trung ương Tơchơ̆t jang kơ teh đak găh hơtŏk mŭk drăm – tơpôl tơring kon pơlei kon kông păng groi kông jăl xơnăm 2021-2030 hlôi kĭ pơkăp Tơchơ̆t tơdrong jang xơnăm 2021 đơ̆ng Jơnŭm pơgơ̆r jang. Kiơ̆ kơ noh, bơngai jang lơ̆m Jơnŭm pơgơ̆r jang Trung ương păng dôm anih jang tơ̆ kơpal, anih jang kơ Khul kơpal teh đak (dôm anih jang tơm, anih jang Trung ương), Anih vei lăng kon pơlei dôm dêh char, plei tơm mă Trung ương vei lăng kiơ̆ xơnong jang đei pơjao, tenh kuăng tơlĕch xơnong jang hơdăh: keh đang Chih akŏm hơlen tơbang tơdrong gơh jang kiơ̆ Tơchơ̆t; hơlen pơkăp, pơtruh ăn Thủ tướng teh đak kĭ pơkăp axong jên jang kiơ̆ trŏ ƀlep hăm khôi luơ̆t pơkăp găh axong jang đơ̆ng teh đak; keh đang Jơnŭm pơgơ̆r jang păng anih jang tơgŭm ăn Jơnŭm pơgơ̆r jang tơ̆ dôm jăl jang kiơ̆ tơchơ̆t đơ̆ng khôi luơ̆t teh đak; tơlĕch hơlen tơroi tơbăt truh dôm khul jang, tơ ‘ngla bơngai jang đei tơrĕk păng kon pơlei băt găh Tơchơ̆t jang păng minh ƀar tơdrong Pơkăp jang tôm tong; tơgŭm, tơlĕch trong chă hơvơn lơ jơhngơ̆m jang vă pơm jang Tơchơ̆t, mă hăt noh găh jên jang ODA păng hơvơn dơ̆ng jên jang đơ̆ng tơpôl, tơgop jang trŏ khôi luơ̆t hăm tơpôl vă hơmet ăn Tơchơ̆t jang…

Lơ̆m kơplăh oei gô Thủ tướng teh đak kĭ pơkăp Tơchơ̆t jang, tơdrong kăl jang dang ei đơ̆ng dôm Anih jang găh bơngai kon kông tơ̆ dôm dêh char, oei lơ̆m tơdrong pơyua găh pơkăp jang kăl hrôih tơgŭm ăn Anih vei lăng kon pơlei dôm apŭng, plei tơm pơtoi tơlĕch hơlen găh bơngai, tơring gơh đei yua, kơchĕng gô akŏm kơsô̆ jên kăl jang vă pơtruh ăn jăl kơpal hơlen lăng păng kĭ pơkăp kiơ̆ tơchơ̆t tơlĕch.

Lan chih păng pơre nơ̆r