Dôm năr hơtuch sơnăm, Anih vei lăng bri ‘long kơdrơ̆ng Kon Kaih King sơng khul kơdră chĕp kơ̆l dêh char Gia Lai truh hơlen năng, dăr lăng bri ‘long, sem bri brăh păng tơlĕch trong jang atŏk tơiung chă tơmang lăng. Đơ̆ng rŏng vă jê̆ 1 jơ năm trong bri, tom măt lăng ƀôh cham char bri brăh ‘lơ̆ng hơiă nhen thoi sơ̆, hui tơring đei, Kơdră vei lăng kon pơlei dêh char Gia Lai Phạm Anh Tuấn hôn pơ ư cham char bri brăh ‘lơ̆ng rŏ tơ̆ âu:

“Gơ̆h pơma, Pơgar teh đak Kon Kăih King jĭ tơmam bri brăh tôch kăp gĭt đơ̆ng plenh teh pơsư̆ ăn, ưh lăp hăm Gia Lai đĕch, mă hăm teh đak Việt Nam păng apŭng plenh teh hai. Năr ‘nâu, khul jang đei tôm bơngai đơ̆ng dôm anih jang kơpal păng anih chă tơmang lăng vang hơlen năng vă chă trong chĕp vei, tưk tơiung chă tơmang lăng hai, atŭm hăm ‘nŏh krao hơvơn bôl boăl lơ̆m apŭng plenh teh truh hơlen năng cham char bri brăh tôch ‘lơ̆ng rŏ âu”.

Ƀok Ngô Văn Thắng- Kơdră chĕp kơ̆l Pơgar ‘long teh đak Kon Kaih King ăn tơbăt, pơgar ‘long jĭ 1 anih cham char bri brăh tôch ‘lơ̆ng tơ̆ hơbon kông Trường Sơn. Hăm kơ hrĕng kơloăi ‘long tôch tih, lơ sem bri brăh tôch kăp gĭt păng lơ trong yak chă tơmang lăng tơ̆ bri kông tôch ‘lơ̆ng rŏ, Kon Kaih King đei tôm tơdrong ‘lơ̆ng vă gơ̆h jing anih truh hăm bri kông ‘lơ̆ng rŏ tơ̆ Gia Lai. Tơ̆ hơnăp kơnh, trong jang đơ̆ng anih atŏk tơiung chă tơmang lăng tơ̆ bri brăh, gô tơgŭm chă đei tơdrong jang gơnơm đơ̆ng chă tơmang lăng kơjăp ‘lơ̆ng ăn kon pơlei tơ̆ tơring păng vang tơgop, vei lăng ‘lơ̆ng bri ‘long:

“Tơ̆ hơnăp kơnh, nhôn vă hơtŏk tơdrong vei lăng, khŏm vei lăng ‘lơ̆ng cham char bri brăh, kơjă kăp gĭt đơ̆ng bri pơyoa ăn tơdrong vei lăng; atŭm hăm ‘nŏh hơtŏk tơdrong jang hơdoi hăm dôm anih chă tơmang lăng pơjing tơmam chă tơmang lăng, pơvih pơvăn păng pơm anih pơdơ̆h ngôi ăn tơmoi; tơmât yoa pơlong năng 1,2 tour – vă pơtho tơƀôh, tơchĕng hơlen; roi tơbăt um rup pơgar ‘long hăm dôm anih tơchĕng hơlen, hnam trưng. Nhôn oei pơm hla ar, pơjing tơdrong jang vă tơlĕch trong tơmât jên jang hơmet pơ ‘lơ̆ng anih jang, pơvih ‘lơ̆ng hlŏh ăn tơmoi”.

Kŭm hăm cham char bri brăh vă chă tơmang lăng tôch ‘lơ̆ng rŏ, hăm Kon Kaih King chŭn kơnao kung Đăk Tơ Pê (xăh Kdang), ưh đei hơtăih kơ tơring kơdrâm Plei Ku. Lơ̆m ‘năr drang tŏ ‘lơ̆ng rŏ tơ̆ kơsơ̆, tơ̆ âu năng ƀrông ƀrang  roi ‘lơ̆ng đơ̆ng ƀĕnh kơmâu jơk, dreng, gôh, pơjing đei 1 um rup găh cham char bri brăh tôch ‘lơ̆ng rŏ. Tơdrong ‘lơ̆ng ‘nŏh pơm ăn tơring âu jing anih pơdơ̆h jơ̆ng, check-in, phĭn rup tôch hơiă đơ̆ng tơmoi. Ƀôh hơdăh tơdrong ‘lơ̆ng âu, Đảng ƀô̆, khul kơdră pơgơ̆r xăh Kdang, dêh char Gia Lai oei dar deh pơjing trong atŏk tơiung dôm tour chă tơmang lăng lơ̆m tơpôl, truh hơlen năng cham char bri brăh tôch ‘lơ̆ng rŏ tơ̆ âu.

Yă Lê Thị Huệ, Bí thư Đảng, Kơdră Jơnŭm pơgơ̆r kon pơlei xăh Kdang ăn tơbăt: “Xăh oei hơlen năng păng krao hơvơn tơmât jên jang tơ̆ hơnăp kơnh. Xăh hơpơi ‘mĕh truh 2035, anih chă tơmang lăng âu gô đei tơmât yoa, jĭ 1 anih truh đơ̆ng lơ tơmoi chă tơmang lăng jơ̆p tơring hơtăih, jê̆".

Hrei ‘nâu, tơ̆ groi kông găh pơmât kơ dêh char Gia Lai đei lơ tơdrong tôch ‘lơ̆ng vă atŏk tơiung tơdrong chă tơmang lăng tơ̆ bri brăh hăm lơ anih tôch ‘lơ̆ng rŏ, đei ƀĕnh tơdrong juăt ‘lơ̆ng đơ̆ng bri kông. Đak Tơ Nueng – 2 păh măt Pleiku, hơnơ̆ng đei anih dơ̆ng gĭt kăl lơ̆m jơhngâm đon kon pơlei păng tơmoi chă tơmang lăng. Đak hlăng hlơ hlơr lăng ƀôh hloi bôl tơm ‘long, hơmơ̆l kơpal plenh, hăm lơ tơm ‘long hơngo tih truh kơhrĕng sơnăm pơjing đei 1 anih cham char tôch ‘lơ̆ng rŏ. Hơtăih kơ ‘nŏh ưh đei dang yơ, kông unh Chư Đang Ya jĭ anih truh tôch hơiă hăm đe druh dăm păng dôm bơngai phĭn rup kŭm hăm rim răih kon pơlei mưh pơyan pơkao dur yoăn truh.

‘Nhŏng Nguyễn Việt Cường, bơngai juăt phĭn rup đơ̆ng Hà Nội, tơroi truh tơdrong tôch hơiă mưh ‘măng mă blŭng năm truh tơ̆ tơring teh âu: “Tơpă ‘nei tơ̆ âu ‘lơ̆ng dêh. Inh hơpơi ‘mĕh tơring đei trong tưk tơiung tơring âu, vă đei lơ bơngai truh tơmang lăng hlŏh dơ̆ng".

Vă pơih trong ăn tơdrong jang tŏk, dôm sơnăm tơjê̆ âu, Gia Lai hlôi tơlĕch jên man hơmet trong năm truh tơ̆ dôm anih vei lăng păng anih đei cham char bri brăh ‘lơ̆ng rŏ; hơmet ming dôm tơdrong pơvih pơvăn tơ̆ dôm anih “check-in”; atŭm hăm ‘nŏh hơtŏk tơdrong ‘lơ̆ng ăn bơngai jang roi tơƀôh lơ̆m tơpôl păng hơmet ming trong sơng tơmoi tơ̆ dôm anih chă tơmang lăng bri brăh. Gơnơm pơih xă trong jang, Gia Lai đei ƀôh roi lơ trong chă  tơmang lăng tơƀưh tơring Tây Nguyên hăm tơring tơter Đak dơsĭ găh Tơring Tŏk bŏk, pơjing đei lơ trong chă tơmang lăng đơ̆ng trekking, hơlen năng bri kông, tơdrong choh jang xa truh chă tơmang tơ̆ dơnâu đak–tŏk kông–joh ayŏ kơ dŏ xoang. Sơnăm 2025, dêh char hlôi sơng đei dôm jĭt triu ‘nu tơmoi chă tơmang lăng, đei lơ lơ̆m kơsô̆ ‘nŏh năm tơmang lăng tơ̆ găh pơmât dêh char, hăm lơ tơdrong chă tơmang lăng tơ̆ bri kông tôch hơiă. 

Yă Đỗ Thị Diệu Hạnh – Kơdră Anih vei lăng jŏh ayŏ kơ dŏ xoang, Tơplŏng kơdâu păng chă tơmang lăng Gia Lai ăn tơbăt, lơ̆m jăl jang đơ̆ng 2026-2030, chă tơmang lăng đei năng jĭ 1 lơ̆m dôm tơdrong jang mŭk drăm tơm kơ dêh char: “Akŏm jơhngâm chĕp vei, tưk tơiung dôm kơjă kăp gĭt đơ̆ng joh ayŏ kơ dŏ xoang, cham char bri brăh ‘lơ̆ng rŏ, chăl arih so pran kơtang. Akŏm jơhngâm pơjing, roi tơƀôh tơdrong chă tơmang lăng, tơguăt trong Hơlĕch - Pơmât, atŏk tơiung chă tơmang lăng tơ̆ đak dơsĭ, chă tơmang lăng lơ̆m tơpôl, truh lăng tơdrong jang xa, arih xa. Mă hơtuch ‘nŏh pơjing khul jang atŏk tơiung chă tơmang lăng, pơjing đei lơ tơmam chă tơmang lăng ‘lơ̆ng hơiă tơ̆ hơnăp ning mônh kơnh”.

Atŏk tơiung chă tơmang măng tơ̆ bri brăh tŏk bŏk tơgŭm ăn Gia Lai pơih đei 1 trong yak kơjăp, vă tơmam bri brăh đei vei lăng ‘lơ̆ng, dôm kơjă kăp gĭt tơ̆ tơring đei rou tơiung, atŭm hăm ‘nŏh chă tơdrong jang xa đunh đai ăn kon pơlei. ‘Nŏh kŭm jing tơdrong tơm vă Gia Lai atŏk tơiung mŭk drăm tơ̆ tơring kiơ̆ trong rơgoh ‘lơ̆ng păng pran kơjăp ning mônh kơnh.