Tơ̆ hơla jơ̆ng kông Lang Biang ‘lơ̆ng rŏ, kơmâu dreng pơkao dur yuăn ƀrŭng ƀrăng tơ̆ dôm jih kông. Tŏk bŏk dôm hnam tơ̆r joăt joe păng dôm hnam man tih ‘lơ̆ng tơ̆ kueng kơphô̆ B’Nơr B, phường Lang Biang- Đà Lạt, tơroi truh ƀok Cil Kwuyên rim bơngai tă kơ ‘măn ăn kơ ƀok tơdrong kŭp yom gĭt kăl. Yă Nguyễn Thị Cẩm Giang, Phŏ Bí thư Đảng phường Lang Biang- Đà Lạt, tơbăt:

“Mih Cil Kwuyên jĭ bơngai đei đe lui yom lơ̆m tơring kon pơlei kon kông. Mih bơ̆jang kiơ̆ tôch kơ ‘lơ̆ng tơdrong hŏk pơhrăm, pơm kiơ̆ jơhngơ̆m đon ‘lơ̆ng Hồ Chí Minh. Mih ling lang hơdrin roi tơbăt ăn bơngai lơ̆m ŭnh hnam kŭm nhen kon pơlei kueng kơphô̆ bơ̆jang kiơ̆ trong jang đơ̆ng Đảng, tơdrong jang tơgŭm khôi luơ̆t đơ̆ng teh đak, vang jang dôm tơdrong jang pơjei băl đơ̆ng tơring mă loi ‘noh jĭ pơjing anih kơdrơ̆m hơgei. Đang kơ ‘noh mih kŭm hơdrin lơ̆m roi tơbăt, krao hơvơn khŭl mơlôh chĕp vei, tưk tơiung dôm kơjă kăp gĭt joh ayŏ joăt joe”.

Lơ̆m jơhngơ̆m đon oei ƀlŏk kơ bơngai Lạch, mĭnh kơtŏng kơ bơngai K’ho hơrih sa tơ̆ hơla jơ̆ng kông Lang Biang, dang ei găh phường Lang Biang- Đà Lạt, dêh char Lâm Đồng kŭm hăm iŏk ŭnh om hrôih, tơdrong joăt pơkoĕl kơ pô hlôi jing pŭ trăp tơ̆ hơ ngiĕng dôm yơ ŭnh hnam. Lăng ƀôh tơdrong răm đơ̆ng tơdrong iŏk ŭnh om hrôih ƀơm ưh kơ ‘lơ̆ng truh jơhnơr ning nai kơnh, ƀok Cil Kwuyên pơma dơnuh hăm Mục sư Hnam hơkŭm, tơblang hơdăh ăn kon pơlei kiơ̆ lui, kơna hlôi pơtôch đei tơdrong ‘nâu đơ̆ng lơ sơnăm hơdrol. Hăm tơdrong joăt “pơkoĕl kơpô”, kiơ̆ tơdrong joăt 1 tơdrong hơrih kơ bơngai ‘noh athei đei 2 tŏ kơpô tơno tih teh ƀuh et sa kơ hơrih sot, hơkăn 2 tŏ, klo 2 tŏ. ‘Nâu jĭ pŭ trăp hlôi pơm ăn dôm yơ ŭnh hnam huŏng lơ̆m tơdrong hre đom ưh kơ tôch. Ƀok Cil Kwuyên ‘nŏh jĭ bơngai mă blŭng sut hŭt tơdrong joăt “pơkoĕl kơpô” kơ bơngai  Lạch:

“Lơ̆m mĭnh chăl hơrih kơ bơ̆n hoy kơ kĕ jang chă đei 4 tŏ kơpô ‘noh. Ĭnh tơgop nơ̆r lơ̆m dôm bơngai hŏk jrŭ, hlôh vao lơ kơ kon pơlei nhôn hơdai hăm băl athei hŭt tơdrong ‘nâu. Đơ̆ng rŏng ‘noh ăn tơmơ̆t lơ̆m khŭl jang kơ xăh hôp tơgop nơ̆r tơmơ̆t lơ̆m tơdrong tơchơ̆t. Đơ̆ng rŏng tơmơ̆t lơ̆m tơdrong tơchơ̆t bơih ‘noh roi tơbăt pơtho pơhrăm khôi luơ̆t ăn kon pơlei tơdrong ‘nâu ‘noh ưh kơ gơh pơgŏ. Khei ‘năr hơdrol sơ̆ ƀă ưh kơ đei ‘noh đe pơkoĕl truh chăl kon. Dang ei ưh pă đei tơdrong ‘noh dơ̆ng bơih. Ĭnh ƀôh lei lăi nhen 1 tơdrong jang kach mang iĕ ioch găh tơdrong joăt so ưh kơ ‘lơ̆ng”.

Pơyan puih mak âu, ƀok Cil Kwuyên đĭ 69 sơnăm. Mă lei sư ưh kơ rơih iŏk tơdrong hơrih sa hiôk rơhơi mă oei hơdrin vang jang tơdrong jang sek tơlang tơ̆ Hơnih sek tơlang kon pơlei tơring 1 dêh char Lâm Đồng. Đei dôm tơdrong tơgar băl teh, iŏk ŭnh om mơmat tat nhen pă hơnhŏ, mă lei hăm tơdrong lôh vao khôi luơ̆t hăm khôi joăt K’ho, ƀok hlôi hơmet pơ ‘lơ̆ng đĭ đăng hăm tơdrong trŏ lăp.

Tơdrong gĭt kăl, hơdrol kơ đei băt truh 1 ‘nu bơngai chă sek tơlang gơh hơgei, ƀok Cil Kwuyên hlôi jing bơngai rong kơpô hơgei hloh tơring hăm kơpô tŏk truh 80 tŏ. Ƀok kŭm jing bơngai K’ho tơ̆ Lang Biang mă blŭng hŏk pơhrăm, pơtăm 130 tơnơm ‘long Hồng, ăn iŏk yua mŭk drăm lơ. Đơ̆ng hloh 40 sơnăm hơdrol, hơdai hăm jang mŭk drăm hơgei, hăm hơnăp jang ‘noh kang ƀô̆ tư pháp xăh păng plei nuih ling lang hue truh tơpôl, ƀok Cil Kwuyên hlôi năm truh tơ̆ rim pơlei pơla, pŭ ba  hla ar roi tơbăt khôi luơ̆t ăn kon pơlei.

Dang ei, mă đơ̆ng tơdrong hơrih sa ŭnh hnam đĭ tôm măh, mă lei jơ̆ng ƀok Kwuyên oei ưh kơ pơdơh năm, ti oei ưh kơ pơdơh jang. Ƀok tơroi:

“Ĭnh ‘meh ŭnh hnam, kơtum kơtŏng ‘nhŏng oh kŭm nhen đĭ đăng rim bơngai lơ̆m pơlei tơgoăt pôm nơ̆r ƀơ̆r đon, đei trong hơrih hiôk ‘lơ̆ng, ưh kơ pơm glăi khôi luơ̆t, trong jang, tơgŭm đơ̆ng teh đak, sut hŭt dôm tơdrong joăt so ưh kơ ‘lơ̆ng. Sơnăm ‘nao truh, apĭnh thơ thou ăn rim bơngai ling lang  pŭn ai, sơđơ̆ng, jang sa hiôk, vang hơdai băl hơtŏk tơiung mŭk drăm, hơtŏk tơiung pơlei pơla.”

Hăm khŭl kơdră chĕp kơ̆l tơring, ƀok Cil Kwuyên jĭ gơng tơƀưh kơjăp đơ̆ng Đảng hăm kon pơlei. Lơ̆m tơpôl, ƀok Kwuyên jing bơngai jang ‘lơ̆ng ăn kon pơlei lơ̆m pơlei. ‘Nhŏng Jusep, mĭnh ‘nu kon pơlei tơring tơroi:

“Ƀok Kwuyên jĭ bơngai ƀok, bơngai ƀă tôch kơ ‘lơ̆ng lơ̆m ŭnh hnam. Ƀok đei lơ tơgop hăm jang sa păng tơdrong hơrih sa jơhngơ̆m đon kơ kon pơlei tơ̆ âu. Đơ̆ng tơgop nơ̆r, bơ̆jang đơ̆ng ƀok mă tơdrong iŏk ŭnh om hrôih ưh pă đei, kon pơlei lơ̆m tơring hŭt đei tơdrong joăt so ưh kơ ‘lơ̆ng pơkoĕl kơpô. Ƀok kŭm jing bơngai ling lang pơm jŭk yŭk trong hơlâu pơm kiơ̆ dôm trong jang đơ̆ng Đảng, Teh đak kơna đei kon pơlei kŭp yom, lui ngeh”.

Khei ‘năr tơ jê̆ âu ƀok Cil Kwuyên đei lơ tơdrong hiôk chơt. Ƀơ̆t khei 9 âu ki sư đei chơt hơiă kŭm hăm khŭl dêh char Lâm Đồng vang truh pơm Lêh tơbăt 80 sơnăm Quốc khánh 2/9 tơ̆ Hà Nội. Ƀok kŭm chơt hơiă đei vang Hop akŏm Pơjei băl ‘mêm kơ teh đak lơ̆m teh đak ‘măng mă XI âu ki pơgơ̆r hơtuch giĕng hơdrol.

Um rup ƀok Kwuyên hơngŭr hăm dôm jơ hôp kueng kơphô̆, rơhâu tơtă kơ kon sâu veh ver kơ hơlĕnh pơdăr mạng, veh ver kơ tŏk iŏk jên đe tơ̆ ‘ngoăih hăm jên kon lơ ‘noh jĭ um rup ‘lơ̆ng hloh găh 1 ‘nu kon pơlei gơh hơgei tơ̆ hơla jơ̆ng kông Lang Biang. Dôm jơhngơ̆m jang đơ̆ng ƀok hlôi tơgop tơdrong vei ăn kueng kơphô̆ B’Nơr B, phường Lang Biang- Đà Lạt ling lang sơđơ̆ng hiôk chơt.