Tĭl pơgê tơ̆ jih đak dơsĭ Nha Trang, dôm bro chuơ̆h tơbŭk hlôi vih hơlơ̆k ‘lơ̆ng hơ iă nhen so dơ̆ng. Lơ tơmoi chă yak jơ̆ng lơ̆m kial đơ̆ng đak dơsĭ hơheo tơngiĕt, mŭh măt bu bu jei chhôk hơ iă ‘nă hăl. Dôm hla du să ƀrông ƀrang đei hơtơ̆p tơ̆ jih đak dơsĭ, đe hơ ioh chă pơhle dih băl iơ iơ̆r iơ iăr, đak poh yă gơ gring nhen dui jơhngơ̆m hơrih dơ̆ng đơ̆ng rŏng ‘mi kial hơbŭt hơbông pơrăm kơtang.

Ƀok Trần Văn Tân oei tơ̆ phương Nha Trang tơbăt, lăp mĭnh ƀar năr hơdrol, tơ̆ ou bơ̆n rơ̆m rek kĕt keng kơ yuơ đơ̆ng đak kroong Cái jroh năm tơ̆ ou. ‘Long tơgơ̆, plei ao kro, get chai như̆a, dôm hơnhoăl hrou hăm dơ̆k lơ lôk lơ lak hơtăih truh dôm kây sô̆ hloi. Kơ hrĕng kŏng nhân bơ̆ jang vei lăng cham char atŭm hăm rim hơnih jang ba đe tơmang pơhiơ̆ păng khul jang kơtă, chă hyum hơmet pơ ‘lơ̆ng prăt măng prăt năr hloi. Ƀok Tân tôch lăp đon kơ yuơ đơ̆ng rŏng kơrŭn jang, đak dơsĭ hlôi hlăng hnhơr nhen so hăm jơhngơ̆m đon chơt hơ iă ‘nă hal đơ̆ng pơđĭ kon pơlei păng đe tơmoi:“Rim bơngai vang iung jang, bơngai teh đak đe jei vang tơgum djru mơ̆n. Lăp 2-3 năr hlôi pơm rơgoh ăn đak dơsĭ. Dang ei đak dơsĭ jei hlăng jơk glơch glach dơ̆ng. Dang ei ƀôh lơ loh hơ iă dêh”.

Ưh khan lăp chă hyum rơgoh ăn đak dơsĭ, hơnih jang tơmang pơhiơ̆ Khánh Hòa lơ̆m dôm năr ‘mi kial hơbŭt hơbông jei kơrŭn đĭ ai kơ yuơ kơ kon pơlei pơla. Mơjĭt tong kanô, gre bơbĭt đak, thŏng nan kơ rim hơnih mơdro sa hlôi vang iung jang dŏng tơgŭm kon pơlei tơring đak lip. Mưh đak och, rim hơnih hơnơ̆ng chă pai por ‘nhot, pơtruh ăn tơmam drăm sa kăl, pôk ăn phe, hơbĕn ao, tơgop lơ̆m vei lăng năng tông tơdrong hơrih sa sơđơ̆ng ăn kon pơlei.

Truh dang ei, đĭ đăng rim hơnih jang tơmang pơhiơ̆ tơter đak kroong Cái hlôi plôih ‘măng dơ̆ng đơ̆ng rŏng dôm năr pơdơ̆h. Ƀok Nguyễn Văn Hòa, Kơdră chĕp pơgơ̆r Hơnih vei lăng Joh ayŏ kơdŏ soang-Đă ƀŏng lŏng tơplŏng kơdou păng Tơmang pơhiơ̆ Khánh Hòa tơbăt:“Tơmoi truh năm tơmang pơhiơ̆, pơdơ̆h pơdei hlôi đei lơ. Găh păh hơnih vei lăng joh ayŏ gô pơrô̆ hơvơn, tơgum djru rim hơnih mơdro sa tơmơ̆t jên jang pơih să rim tơmam drăm vă hơvơn đei lơ tơmoi truh. Hơnih bơ̆ jang jei pơgơ̆r rim tơdrong pơgơ̆r gĭt kăl vă hơvơn tơmoi năm truh hăm dêh char Khánh Hòa lơ̆m jơ ‘năr hơtuch sơnăm”.

Ƀok Nghiêm Xuân Thành, Bí thư Đảng dêh char Khánh Hòa, tơbăt: Tơmang pơhiơ̆ tơmơ̆t găh lơ lơ̆m tơdrong mơdro sa kơ Khánh Hòa, đei lăng jĭ “Hơyak tơm” tơgŭm ăn hơmet pơ ‘lơ̆ng mŭk drăm tĕnh koăng hloh. Ƀok pơma:“ ‘Năr đĭ ƀrach hơdăh ‘lơ̆ng, tơmoi tŏk bŏk truh. Kơ yuơ lơ loh, kăl tĕnh koăng tơlĕch jang pơtrŭt tơmang pơhiơ̆ sơđơ̆ng ‘lơ̆ng liĕm. Hơnih jang tơmang pơhiơ̆ gô đei ƀơm truh hăm hơnih jang mơdro sa, pơm tơlĕch tĕch mơdro tơmam drăm, đei ƀơm truh tơdrong thuê̆ kon jên jang teh đak, pơjing tơdrong jang, kơna hơnih jang tơmang pơ hiơ̆ kăl iung jang hloi.