Jê̆ kơ-'năr dơ̆ng, klo hơkăn pơmai Đinh Thị Lá (29 sơnăm) oei hăt hot atŭm hăm bơngai jang man hnam, oei lŭk xi măng vă man hnam 'nao. Pơmai ƀrơ̆k jơhngơ̆m akhan, tơdrong hơrih dôm sơnăm hơdrol ki hĕl hol, dang ei hlôi tơplih bơih. Truh ah kơmăng, unh hơyuh tơ̆k hơdah jơ̆p pơlei pơla, đe hơ-ioh rơ-ông rơ-ang hŏk ƀai, pơlei pơla tôch chơt hơ-iă: “Hơdrol ki noh răt kơmăi pơm tơlĕch unh hơyuh, dang ei teh đak tơgŭm dui unh hơyuh. Dang ei sơnăm 2025 đei unh hơyuh sơđơ̆ng noh anih jang păng unh hơyuh 'lơ̆ng hloh kơ dôm sơnăm hơdrol ki "

Tơdrong jang dui tơlei unh hơyuh ăn pơlei Canh Tiến đei jên asong jang hloh 9 tih hlj, pơtơm pơm jang đơ̆ng khei 12/2024 păng keh đang ah khei 4/2025. Kiơ̆ kơ ƀok Đinh Văn Tào, Ƀĭ thư Chi ƀô̆ adoi jang Kơdră pơlei Canh Tiến, đơ̆ng đei unh hơyuh, kon pơlei tơpă “tơplih tơdrong hơrih”: “Đei unh hơyuh noh hiôk hian hloh ăn tơdrong hơrih xa rim năr, ah kơmăng, mă kăl noh ăn kon hơ-ioh hŏk pơhrăm. Hơdrol ki kon pơlei hơpơi 'meh đei tivi, đei unh hơyuh bơih noh lơ unh hnam chă răt bơ̆n tivi lăng păng hŏk hơlen dôm kơtơ̆ng ang lơ̆m tơpôl, iŏk yua khua hŏk kih thuơ̆t lơ̆m choh pơtăm, rong kon tơrong...”

Pơlei Canh Tiến đei 176 unh hnam mă lơ noh bơngai Bahnar păng Chăm. Đơ̆ng minh tơring tơklah hơdrô̆, Canh Tiến tŏk bŏk đei hơyak hơtŏk kơjăp. Atŭm hăm unh hơyuh teh đak, trong nơnăm adoi đei tơrĕk ming man. Tơdrong plang teh pơih trong hlôi đei kon pơlei pơm jang tơnăp. Ƀok Dương Hiệp Hòa, Kơdră Anih jang vei lăng kon pơlei xah Canh Vinh sơkơ̆t hơdah: “Teh đak dui unh hơyuh jĭ trong pơkăp jang trŏ ƀlep đei kon pơlei tơgŭm tôm. Unh hơyuh truh tơ̆ yơ noh hơtŏk tơ-iung truh dang noh hloi. Dang ei xah tŏk bŏk akŏm vă tơ-iung pơjing pơlei Canh Tiến jing pơlei tơmang pơhiơ̆ tơpôl kiơ̆ tơdrong pơgơ̆r đơ̆ng dêh char vă hơtŏk mŭk drăm tơpôl kơ tơring.”.