Lơ̆m hnam kơjung iĕ kơ plei Kép, hơnơ̆ng kơtơ̆ng đe drŏ kăn tanh brai vai khăn. Mŏ Rơ Châm Suynh – 1 ‘nu bơngai jang lơ̆m Grŭp tanh brai kơ plei Kép ăn tơbăt, bơngai Jarai đa iŏk kơmâu găm, ƀrê, kok vă tang khăn, hơbăn ao, kơlih thoi noh kơmâu, trong ding dông lơ̆m tơmam tanh kơ bơngai Jarai đei lơ bơngai chă tơmang lăng ‘mĕh răt: “Tơdrong tanh brai đơ̆ng mĕ chă pơtho ăn, đơ̆ng âu inh gơ̆h tanh bơ̆n kơdŭng, hơbăn ao, ‘ngoăih kơ ‘nŏh hrei ‘nâu tơdrong tanh brai oei pơvih ăn tơdrong chă tơmang lăng dơ̆ng, tơmoi truh lăng, thoi noh gơ̆h chĕp vei kơjăp tơdrong jang so hai, đei dơ̆ng kon jên vă pơ ‘nhŏ ăn tơdrong arih xa hai.” 

Hăm kon pơlei tơ̆ plei Kép, khăn, hơbăn ao tanh ưh lăp tơmam yoa đĕch mă oei jing tơdrong tơroi găh tơdrong juăt đơ̆ng sơ̆ kơ 1 hơdrĕch hơdrung. Mŏ Rơ Châm Háo, ăn tơbăt: “Tanh brai vă huei kơ hiơt tơdrong juăt đơ̆ng sơ̆, tanh kơpen, tanh khăn, tanh kơdŭng. Mưh tơmoi truh ‘nŏh tanh kơdŭng iĕ, kơdŭng tih, tanh khăn păng dôm kơloăi nai hai.”

Lơ khăn tanh đei tơmoi chă tơmang lăng lăp đon răt iŏk, mă lei vă tơmam găh truh hăm anih tĕch mơdro, mŏ H’Uyên Niê, 38 sơnăm, bơngai tơlĕch trong pơjing Grŭp tanh brai plei Kép đei đon jang tôch rơgei: pơm dôm tơmam đơ̆ng tanh âu jing tơmam tĕch ăn bơngai chă tơmang lăng, tanh ‘lơ̆ng, yă tĕch lăp hăm rim bơngai tơmang lăng. Mŏ H’Uyên tơroi, vă tơdrong jang gơ̆h đei chĕp vei hơnơ̆ng, tŏk pran kơjăp, athei tơplih ming trong tĕch mơdro: “Mưh đe ngê̆ nhơ̆n tanh đei tơmam, tĕch hăm yă măk, tơmoi ưh gan ‘mĕh răt yoa thoi noh nhôn athei tơplih ming trong jang tanh, pơm dôm tơmam tĕch ăn bơngai chă tơmang lăng dơ̆ng. Pơtih gia nhen 1 blăh che ‘nâu gơ̆h tanh, chơchoh jing kơdŭng ƀăk, kơdŭng mong jên dăh mă dôm tơmam yoa nai, đơ̆ng noh pơm lăp hăm tơdrong ‘mĕh vă đơ̆ng tơmoi mưh truh lăng tơdrong tanh brai vai khăn, lê̆ đe chă răt iŏk dôm tơmam lăp hăm jên kơdih đei.”

Đơ̆ng sơnăm 2019, Grŭp tang brai vai khăn tơklep hăm chă tơmang lăng tơpôl plei Kép đei pơjing hăm 15 ‘nu bơngai jang. Đơ̆ng rŏng hlŏh 5 sơnăm, kơsô̆ bơngai jang tŏk 2 ‘măng, đe ngê̆ nhơ̆n tơ̆ pơlei đei dơ̆ng kon jên đơ̆ng dôm tơmam tanh tĕch ăn tơmoi chă tơmang lăng. Grŭp tanh brai oei đei nơ̆r pơkăp rim ngê̆ nhơ̆n pơlơ̆h băl pơtho tơƀôh ăn tơmoi chă tơmang lăng vă bu jang đei ‘nŏh đei xa yoa hloi.

Mŏ H’Uyên ăn tơbăt: “Lơ̆m trong jang tơmang lăng tơpôl, nhôn ăn ngê̆ nhơ̆n pơlơh băl, nhôn pơjing tơdrong ‘lơ̆ng ăn rim ngê̆ nhơ̆n lơ̆m pơlei gơ̆h tanh brai, tơgŭm hơdrol ăn đe ngê̆ nhơ̆n drŏ kăn tơnuh, yoa đe sư vang mât jang lơ̆m tơdrong tơmang lăng tơpôl ‘nŏh gô đei xa hloi dôm tơdrong kơdih jang đei ‘nŏh jĭ jên khei, đơ̆ng noh đe ngê̆ nhơ̆n gô đei đon tơnăp păng adrin vă chĕp vei kơjăp tơdrong juăt ‘lơ̆ng đơ̆ng hơdrĕch kơdih”.

Lơ sơnăm ‘nâu, rim sơnăm pơlei chă tơmang lăng tơpôl Ia Ly sơng đei đơ̆ng 4.000 truh 5.000 ‘nu tơmoi chă tơmang lăng. Kơsô̆ âu mă đơ̆ng tam mă lơ ră mă lei jĭ tơdrong tôch hơiă, ăn ƀôh trong yak tôch trŏ lơ̆m tơdrong chĕp vei tơdrong juăt so tơklep hăm chă tơmang lăng kơjăp ‘lơ̆ng. Kơlih thoi noh hlôi pơm ăn ngê̆ nhơ̆n Rơ Châm Monh, mă đơ̆ng đĭ kră bơih oei adrin tanh brai vai khăn: “Hơpơi ‘mĕh đe ‘lơ ‘lơ̆p vei kơjăp tơdrong tanh brai đơ̆ng yă ƀok sơ̆, mă đơ̆ng mơmat ră mă athei adrin yoa mưh tanh brai ‘nŏh sư chĕp vei tơdrong jang so hai, đei dơ̆ng kon jên mưh tơmoi chă tơmang lăng răt tơmam hai.”

Ƀok Nguyễn Tiến Dũng, Kơdră vei lăng kon pơlei xăh Ia Ly ăn tơbăt, trong jang chă tơmang lăng tơpôl tơklep hăm tanh brai vai khăn tơ̆ plei Kép tŏk bŏk jing anih truh lăng gĭt kăl tơ̆ tơring: “Mŏ H’Uyên tôch ‘mĕh jang tơmang lăng tơpôl, gơ̆h chă tơdrong jang ăn mih ma duch nă. Mưh tơmoi đơ̆ng teh đak đe truh ‘mĕh lăng, răt tơmam ‘noh sư hơmet Tour năm tơmang lăng, dăh mă tĕch dôm tơmam tanh đei vă chă tơdrong jang ăn kon pơlei jŭm dăr. Lơ̆m tơdrong jang, mŏ H’Uyên tôch tơnăp, jĭ kăn ƀô̆ jang tơ̆ tơring hai, tơdăh đơ̆ng rŏng kơnh oei đei biên chê̆ ‘nŏh vă iŏk sư jang tơ̆ Anih joh ayŏ kơ dŏ xoang tơpôl vă roi tơƀôh găh trong jang atŏk tơiung jŏh ayŏ kơ dŏ xoang lơ̆m tơpôl hai păng dôm tơdrong jang so pơyoa ăn chă tơmang lăng tơ̆ xăh hai.”

Đơ̆ng dôm hơyak blŭng a, mŏ H’Uyên oei adrin chă trong jang hăm dôm công ty chă tơmang, atŭm hăm ‘nŏh chă trong pơih xă anih jang atŭm vă mih ma duch nă đei anih pơtho tanh brai, sơng tơmoi, ming pơdă tơmam tanh đei. Yoa hăm mŏ, rim blăh khăn tanh jĭ 1 “nơ̆r tơbăt đơ̆ng tơdrong juăt sơ̆”, kăl đei vei lăng, tưk tơiung hăm plei nuih păng đon rơgei đơ̆ng bơngai jang. Rim dăng brai, dăh mă trong ding dông ưh lăp nơ̆r tơroi kơ chăl kră sơ̆ đĕch, mă oei pơih đei 1 trong yak ‘nao, trong yak tôch trŏ  đơ̆ng tơdrong chă tơmang lăng tơpôl tơklep hăm vei kơjăp tơdrong joh ayŏ kơ dŏ xoang tơ̆ tơring./.