Kơchơ tơ̆ xăh groi kông Tu Mơ Rông, dêh char Quảng Ngãi (adrol sơ̆ găh apŭng Tu Mơ Rông, dêh char Kon Tum) ưh lăp anih tĕch mơdro tơmam đĕch mă oei jing anih tơƀâp băl đơ̆ng kon pơlei Xơ Đăng tơ̆ tơring, vang tơgop pơm tơplih tơdrong juăt jang xa so jing choh jang xa rơgŏh ‘lơ̆ng. Kơchơ đei pơgơ̆r kiơ̆ khei, 1 khei 1 vât, sơng đei lơ kon pơlei truh akŏm. Đơ̆ng rŏng 3 ‘măng pơgơ̆r, Kơchơ Tu Mơ Rông tơpă jing trong jang pơlong năng tôch hơiă, pơjing đei anih tĕch mơdro ‘lơ̆ng, tơgŭm ăn kon pơlei Xơ Đăng tơplih ming đon jang xa. 

Mŏ Y Khương tơ̆ plei Ngọc Leng, xăh Tu Mơ Rông ăn tơbăt: “Kơchơ pơgơ̆r ‘măng mă 1 kon pơlei oei ơm, ưh pơ̆n hơnhăk tơmam jur tĕch tơ̆ kơchơ hli đe ưh kơ răt. Lăp đei 6, 7 unh hnam đĕch. Truh tơ̆ noh 1 unh hnam kŭm tĕch đei 300.000 hlak jên, đe sư vih tơroi ăn dôm unh hnam nai dơ̆ng. ‘Măng mă 2, ‘măng mă 3 pơgơ̆r ‘nŏh roi lơ ƀiơ̆, tơpôl vang tơgŭm thim bơ̆n kơdeng ming tơmam, kon pơlei tôch hơiă.”

Kơchơ tơm tơ̆ xăh Tu Mơ Rông đei et hơtŏk ‘năr 20/8/2025 lơ̆m teh xă vă jê̆ 1 ha, đei hnam 500 m² păng lơ anih tĕch tơmam, hăm kơsô̆ jên man hlŏh 4 ti yoa Anih vei lăng kon pơlei apŭng Tu Mơ Rông, dêh char Kon Tum (so) tơlĕch jên man. ‘Moi kiơ̆ tơdrong jang ‘nâu, khul kơdră chĕp kơ̆l xăh Tu Mơ Rông pơgơ̆r “Kơchơ ưh đei huach jên păng đei huach jên”, pơjing tơdrong ‘lơ̆ng vă kon pơlei tĕch mơdro, tơplih tơmam hăm băl.

Kiơ̆ ƀok Dương Đăng Khoa, Phŏ Kơdră Anih vei lăng kon pơlei xăh Tu Mơ Rông, tơdrong hơiă hlŏh đơ̆ng pơgơ̆r “Kơchơ ưh huach jên păng đei huach jên” âu sư gĭt kăl hăm tơpôl hai, pơjing đei jơhngâm pran vă jang tŏk mŭk drăm hai. “Ưh đei huach jên” ‘nŏh jĭ dôm tơmam yoa kăl, hơbăn ao yoa đơ̆ng xăh mong akŏm lơ̆m tơpôl asong đĕch ăn kon pơlei. Oei “đei huach jên” ‘nŏh jĭ tơmam đơ̆ng choh jang xa đei, ‘long pơgang đơ̆ng kon pơlei đei anih tĕch mơdro, HTX răt iŏk vă pơlung jơhngâm adrin jang xa. Dôm ‘măng pơgơ̆r kơchơ âu đei pơgơ̆r lơ̆m ‘năr 20 rim khei, tơklep hăm dôm jang lơ̆m tơpôl nhen Têt Trung thu, Năr Drŏ kăn Việt Nam 20/10 dăh mă truh âu kơnh jĭ Năr Thây kô Việt Nam 20/11. 

Ƀok Dương Đăng Khoa ăn tơbăt, tơ̆ hơnăp kơnh, xăh Tu Mơ Rông vă hơtŏk tơdrong pơgơ̆r kơchơ tĕch tơmam thoi âu 1 khei truh 2 ‘măng: “Tơplih ming tơdrong juăt, đon hlôh vao ăn kon pơlei ưh đei ƀônh kiơ, kơna nhôn jang dar deh, pơjao ăn kăn ƀô̆ vei lăng pơlei roi tơbăt, tơgŭm ăn kon pơlei hơnhăk tơmam tĕch tơ̆ kơchơ. Tơmam ưh đei huach jên, gô tơjur ƀiơ̆, oei tơmam đơ̆ng choh jang xa, ‘long pơgang hơnhăk tĕch roi lơ ƀiơ̆.”

Lơ̆m dêh char Quảng Ngãi hrei ‘nâu đei 181 kơchơ, 3 anih tĕch mơdro, 12 siêu thĭ. Tơ̆ tơring groi kông păng tơring sơlam, jô̆ păh lăp 1 xăh đei 2 kơchơ. Tơdrong man hơmet pơ ‘lơ̆ng kơchơ sư pơjing đei tơdrong hiôk hian vă tĕch mơdro tơmam đơ̆ng tơring jang đei. Lơ tơmam ‘lơ̆ng, mă loi ‘nŏh jĭ ‘long pơgang đơ̆ng kon pơlei kon kông hlôi đei hơnhăk tĕch tơ̆ dôm kơchơt păng anih tĕch mơdro, vang tơgop atŏk tơiung mŭk drăm tơ̆ tơring tơrang, vei sơđơ̆ng ‘lơ̆ng tơdrong arih xa kơ kon pơlei”./.