Ƀok Phạm Quốc Lựu, 70 sơnăm, oei tơ̆ thôn Đăk Tô 5, xah Đăk Tô truh Hơnih jang Hanh chĭnh kŏng xah vă pơm hla bar xa jên tơgŭm tơpôl ăn mĕ sư. 'Nou jĭ 'măng mă blŭng ƀok Lựu truh pơm hla bar tơ̆ hơnih jang akŏm minh hơnih:

 “Truh tơ̆ ou noh kan ƀô̆ tơgŭm tôm tơdrong, kăl yă kiơ adoi đei pơtho hơdah. Kan ƀô̆ mă lơ noh oei mơlôh, đei hơlen rơih, pơm jang 'lơ̆ng. Inh hơpơi 'meh khul jang ou ning mônh kơnh jing khul jang dơnơm kơ khul kan ƀô̆ xah Đăk Tô”.

Pơm kiơ̆ pơkăp jơnŭm pơgơ̆r tơring 2 tăl, xah Đăk Tô hlôi keh kong jơnŭm jang, asong hơdah sơnong jang ăn kan ƀô̆, bơngai jang păng pơm kiơ̆ tôm tơdrong jang đei tơlĕch. Kan ƀô̆ xah hlôi kơchăng jang hơdoi hăm rim anih jang kơ dêh char vă đei tơdrong pơtho jang, tơdrong jang lăng atŭm sơđơ̆ng 'lơ̆ng.

Gah tơplih kơmăi kơsô̆, đơ̆ng rŏng kơ tơmơ̆t hơdai, kơmăi kơmŏk so pă đei yua, kan ƀô̆ athei pơm juăt hăm phân mêm 'nao noh ƀơ̆t blŭng oei hơlơ̆k hơle. Mă tam đei bơngai juăt jang, khul kan ƀô̆ tơ̆ Hơnih jang Hanh chĭnh kŏng xah hlôi kơdih chă hŏk hơlen, vei sơđơ̆ng tơdrong pơm jang păng akŏm hô sơ trư̆k tuyê̆n tơnăp. Dang ei, 100% hô sơ hanh chĭnh kơ xah đei pơm keh đang trŏ pơkăp. Ƀok Mai Huy Hưng, Phŏ Kơdră Anih jang vei lăng kon pơlei xah Đăk Tô ăn tơbăt, kan ƀô̆ hơnơ̆ng hơdrin găn hloh tơnap tap, lơ 'năr pơm jang truh kơmăng kơmơ̆t noh pơtơm keh đang tơdrong jang:

 “Pơm jang ưh đei pơdơh ah 'năr tơdrou, 'năr tơpơh hloi. Phơ phŏ 'nhŏng oh jang truh 10 jơ kơmăng hloi, vă chă hơlen rah, apinh lăng đơ̆ng kơdră kơpal vă băt hơdah. Rim sơnong jang sơđơ̆ng, mă lei tơdrong hŏk juăt jang noh tam mă đei tôm. Minh ƀar tơdrong jang nhen tơplih kơmăi kơsô̆ kơyuơ iŏk jang lơ tơdrong jang mă lei kan ƀô̆ adoi kơdih chă hŏk hơlen, tơlĕch jang tôm tơdrong pơgơ̆r jang”.

Đơ̆ng rŏng 4 khei pơm jang, xah Đăk Rve, dêh char Quảng Ngãi iŏk jang lơ tơdrong dêh hnang, lơ̆m kơplah noh tơdrong kloh klĕch kơ đe kan ƀô̆, bơngai jang tam mă hơtŏ dih băl. Đơ̆ng tơdrong noh, xah hlôi đei hla bar pơkăp pơtruh ăn dêh char tơgŭm, asong bơngai jang tơ̆ dôm tơdrong jang tơm nhen kŏng ngê̆ thŏng tin, jang gah pơgang hơmet jĭ jăn, pơtho pơhrăm... Dang ei, kan ƀô̆ xah Đăk Rve hơnơ̆ng tơrĕk hăm dôm anih jang kơ dêh char vă đei tơgŭm gah tơdrong juăt jang. Gơnơm đơ̆ng noh, lơ tơdrong jang hơdrol ki ưh đei tôm bơngai jang dang ei hlôi đei hơmet 'lơ̆ng, pă đei tơdrong “klui pơm jang” dah mă jang ưh kơ tôm.

Ƀok Huỳnh Ngọc Phong, Kơdră Anih jang vei lăng kon pơlei xah Đăk Rve, dêh char Quảng Ngãi ăn tơbăt, kơmăi kơmŏk, anih jang kŏng ngê̆ thŏng tin tơ̆ lơ thôn tam mă đei asong trŏ ƀlep, noh tơdrong jang hơdoi oei adar. Vă hơmet tơdrong ou, xah pơtơm tơdrong chă hŏk hơlen kơdih, hơtŏk tơdrong juăt jang lơ̆m khul kan ƀô̆, bơngai jang:

“Hơtŏk kơtang tơdrong iŏk yua kŏng ngê̆ thŏng tin lơ̆m tơdrong pơm jang, băt hơdah tơdrong jang tơ̆ thôn tenh kuăng, tơguăt hăm sơnong jang kơ đe kơdră thôn. Kăp gĭt hloh noh hơvơn tôm kan ƀô̆, bơngai jang athei kơdih chă hŏk hơlen, pơm jang tơnăp sơnong jang kơyuơ kơ kon pơlei mă pơm jang. Inh pơtruh nơ̆r hăm đe 'nhŏng oh lơ̆m jơnŭm pơgơ̆r Anih jang vei lăng kon pơlei xah, đe kơdră anih jang athei vei sơđơ̆ng kiơ̆ pơkăp "5 hơdah’" vă chă hơlen păng pơgơ̆r tơdrong pơm jang”.

Kiơ̆ tơdrong chih akŏm lơ̆m Kơmăi pơkăp pơm hla bar hanh chĭnh kơ dêh char Quảng Ngãi, khei năr ou ki, kơsô̆ hô sơ tơ̆ dôm xah, phương, anih jang tơm hlôi đei pơm keh đang hơdrol kơ năr pơkăp păng trŏ năr pơkăp đei jê̆ 99%. Anih jang Kơpal Tĭnh uy pơgơ̆r hăm rim anih jang pơtoi pơtruh kan ƀô̆ juăt jang chă tơgŭm, mă kăl noh tơdrong jang gah groi teh, mŭk drăm – cham char, jên hu tơ̆ dôm tơring đei dôm tơdrong tơlĕch jang dơnơm nhen trong gre treng kơdou hrenh, trong kơdou hrenh Quảng Ngãi - Bờ Y, jăl trong tơter đak dơsĭ Dung Quất - Sa Huỳnh…; atŭm hăm noh, hơtŏk pơhrăm pơtho trư̆k tuyê̆n păng kơtă ăn xah. Ƀok Nguyễn Hoàng Giang, Kơdră Anih jang vei lăng kon pơlei dêh char Quảng Ngãi sơkơ̆t hơdah, kan ƀô̆ dêh char pơtoi yak hơdoi, tơgŭm ăn dôm tơring chă pơm jang kiơ̆ tơplih kơmăi kơsô̆ vă pơm hla bar ăn kon pơlei tơnăp hloh:

“Nhôn kiơ̆ tơnăp tơdrong jang kơ jơnŭm pơgơ̆r 2 tăl, tơtom hơmet tơnap tap, pơklaih tơhlăk tơhlĭn. Rim bơngai jang tơ̆ kơpal vei lăng minh bơngai jang lơ̆m Tĭnh uy, rim bơngai jang lơ̆m Tĭnh uy vei lăng minh dah mă ƀar xah, tơroi tôm tơdrong hăm anih jang kơpal. Vei sơđơ̆ng jơnŭm pơgơ̆r 2 tăl pơm jang sơđơ̆ng hơnơ̆ng, mă kăl noh tơdrong tơlĕch jang trư̆k tuyê̆n, tơguăt hăm kon pơlei păng anih jang mŭk drăm".