Jĭ bơngai đei bưng ai, grih tih tơ̆ plei Hiệp Đoàn, xăh Ea Mdroh, dêh char Đắk Lắk, ƀok Bàn Tôn Nhất ưh lăp đei kon pơlei lui yom yoa arih xa tơpăt ‘lơ̆ng, jang tơnăp đĕch, mă oei yoa dôm tơdrong tơgop ưh đei pơdơ̆h mưh chă krao hơvơn kon pơlei. Đơ̆ng tơdrong roi tơbăt trong jang, tơdrong tơgŭm đơ̆ng Đảng, khôi luơ̆t teh đak truh krao hơvơn kon pơlei vei kơjăp tơdrong sơđơ̆ng, sut pơđĭ dôm tơdrong juăt ưh ‘lơ̆ng, pơjing tơdrong arih xa gơ̆h hơgei, tơ̆ yơ đei tơdrong pơmat tat tơ̆ nohđei ƀok năm truh. Tơroi găh hơnăp jang đơ̆ng kơdih, ƀok Nhất akhan: Tơdrong jang đơ̆ng bơngai đei kon pơlei lui yom ‘nŏh roi tơbăt ăn kon pơlei hlôh vao, jang vă kon pơlei lui, vă kon pơlei mât 1 ƀơ̆r đon, jang xa, vei lăng pơlei pơla hiôk sơđơ̆ng, ‘lơ̆ng hơiă.

“Kŭm hăm khul vei sơđơ̆ng ăn pơlei păng chi ƀô̆, inh chă krao hơvơn kon pơlei pơm kiơ̆ khôi luơ̆t păng vei lăng ‘lơ̆ng tơdrong sơđơ̆ng lơ̆m pơlei. Inh hơnơ̆ng krao hơvơn kon pơlei bơngai kon kông tơ̆ tơring lê̆ mơ̆ng bơngai kơnê̆ pơhlŭ. Mưh inh krao hơvơn, đĭ đăng unh hnam pơm kiơ̆ ngăl, mĭnh jơhngâm đon kiơ̆ Đảng."

Mă tơpă ăn ƀôh, tơ̆ dôm tơring đei bơngai grih tih bơ̆ jang tơnăp ‘lơ̆ng, ‘nŏh tơdrong jang lơ̆m pơlei kŭm tŏk pran. Bơngai đei kon pơlei lui yom ưh lăp vang tơgop roi tơƀôh trong jang tih đơ̆ng Đảng păng teh đak truh hăm rim unh hnam kon pơlei đĕch, mă oei tơgŭm ăn anih chĕp kơ̆l đảng, khul kơdră tơring tơtom băt hơdăh đon ‘mĕh vă đơ̆ng kon pơlei. Đơ̆ng noh, tơdrong hơmet ming trong pơgơ̆r jang roi lăp hăm yăn âu ƀiơ̆, pơm lăp đon tơpôl đơ̆ng blŭng hloi. 

Ƀok Lê Văn Chiến, ƀok Pơgơ̆r plei Hiệp Hoà, xăh Ea Mdroh, dêh char Đắk Lắk akhan: “Bơngai đei bưng ai, grih tih lơ̆m pơlei đei hơnăp jang tôch gĭt kăl. Rim ‘măng đei tơdrong hŏk hôp, đei jơ pơma nuh hăm bơngai tăh hla đơ̆ng Jơnŭm pơgơ̆r kon pơlei dêh char, Jơnŭm pơgơ̆r kon pơlei xăh păng lơ̆m pơlei đei tơdrong kiơ kăl ‘nŏh ba dơ̆ng tang, iung pơma ăn kon pơlei, tơgŭm ăn kon pơlei tôch lơ. Đơ̆ng noh sư kŭm tơgŭm ăn kơ ba jang kĕh hơnăp jang đơ̆ng bơngai pơm Ƀok pơgơ̆r pơlei”.

Kiơ̆ yă Nguyễn Thị Thu Hồng, Kơdră vei lăng kon pơlei xăh Ea Mdroh, dêh char Đắk Lắk, lơ̆m xăh dang ei đei 19 ‘nu bơngai đei kon pơlei lui yom. Đe sư jĭ ti păih ‘ma kơ Khul kơdră pơgơ̆r tơring mưh bơ̆ jang krao hơvơn kon pơlei, vei kơjăp tơdrong sơđơ̆ng păng atŏk tơiung mŭk drăm, tơpôl tơ̆ tơring. Bơngai đei kon pơlei lui yom tơ̆ Ea Mdroh hlôi jang ‘lơ̆ng hơnăp jang roi tơƀôh khôi luơ̆t, trong jang đơ̆ng teh đak truh dôm tơdrong tơgŭm kiơ̆ luơ̆t hơgăt. Tơ̆ hơnăp kơnh, tơring hơnơ̆ng năng kăl, hơtŏk hơnăp jang đơ̆ng bơngai đei kon pơlei lui yom tơklep hăm dôm tơdrong jang atŏk tơiung mŭk drăm, tơjur tơnuh hin. Vei lăng bri ‘long, pơjing tơring tơrang ‘nao păng vei kơjăp tơdrong sơđơ̆ng tơ̆ tơring. 

Yă Nguyễn Thị Thu Hồng pơma: “Tơ̆ hơnăp kơnh, hăm hơnăp jang tôch gĭt kăl đơ̆ng khul bơngai đei bưng ai, grih tih, Anih vei lăng kon pơlei xă vă hơnơ̆ng pơih lăm pơtâp pơhrăm, hơtŏk đon hlôh vao găh tơdrong jang kŭm nhen roi tơƀôh dơ̆ng dôm tơdrong ‘nao vă đe sư băt đang kơ ‘nŏh tơroi ăn kon pơlei dơ̆ng. Mă 2 ‘nŏh vă hơnơ̆ng pơngơ̆t truh, roi tơbăt dôm bơngai đei kon pơlei lui yom vă kon pơlei băt, jang kiơ̆”.

Đơ̆ng dôm tơdrong jang tôch rơđăh, đei yoa tơ̆ pơlei pơla, dôm bơngai đei kon pơlei lui yom – dôm bơngai đei kon pơlei “gơnang yoa” lơ̆m tơpôl dôm hơdrĕch kon kông tơ̆ Đắk Lắk oei tơgop vei kơjăp “jơhngâm đon kon pơlei” – tơdrong gĭt kăl vă jang tŏk pran kơjăp tơ̆ tơring. Kŭm đơ̆ng đon jang tơnăp păng bưng ai tih ‘nŏh, tơdrong tơguăt đĭ đăng hơdrĕch hơdrung đei hơmet roi kơjăp, tơdrong sơđơ̆ng tơ̆ tơring đei vei lăng ‘lơ̆ng, pơih trong ăn tơring kon kông tơ̆ Đắk Lắk hơnơ̆ng jang tŏk tơ̆ hơnăp kơnh.