VOV4.Bahnar - Kiơ̆ đơ̆ng rim bơngai joăt jang, lơ̆m khei năr rim tơring jang kiơ̆ ăn oei hơtăih dĭh băl kiơ̆ Nơ̆r athei jang kiơ̆ 16, tơdrong drơ̆ng mĭnh nơ̆r “luồng xanh” dăh bơ̆n akhan “trong hiôk” pơma atŭm, pơ̆ih să trong hiôk chơ tơmam drăm trong đak pơma hơdrô̆ ‘nŏh tôch gĭt kăl vă atŏk kơtang tĕch mơdro, chơ tĕch phe ƀa, tơmam drăm sa, tơmam drăm chŏh jang sa sơđơ̆ng ăn chă jang sa lơ̆m khei ‘năr đei jĭ hơbŭh Covid-19. Ƀai chĭh “Trong hiôk ăn tơmam drăm chŏh jang sa: kăl hơmet pơ ‘lơ̆ng trong găn ga đơ̆ng păh kơdră tơring” kơ yuơ Minh Long bơngai chĭh kơtơ̆ng ang, chĭh tơroi tơbăt tơdrong au.

Ƀok Dương Thanh Tùng, Kơdră chĕp pơgơ̆r Dơnŏ anĭh vei lăng Chŏh jang sa păng Atŏk tơ iung tơring tơrang dêh char Bắc Giang tơbăt, đơ̆ng mă tơring đei jĭ hơbŭh kơtang hlŏh lơ̆m tĕh đak, trŭh dang ei Bắc Giang tŏk bŏk akŏm rim khŭl pơtrŭt kơtang chŏh jang sa, tơgŭm djru rim hơnĭh mơdro sa hơmet pơ ‘lơ̆ng jang sa sơđơ̆ng ăn ƀar păh pơm tơlĕch păng tang găn jĭ hơbŭh. Hlŏh đơ̆ng jang sa yan au đei ƀô̆h, yak hơdoi hăm tang găn jĭ sơđơ̆ng ‘nŏh pơjing rơvơn chơ tĕch mơdro tơmam drăm jei jing tơdrong kăl hlŏh. Tơ ƀô̆h hơdăh tơdrong au ‘nŏh tơdrong chŏh jang sa kơ tơring lơ̆m 6 khei blŭng sơnăm tŏk hlŏh 3 ‘măng trong tơlĕch jang păng tŏk bŏk yak trŭh trong tơlĕch jang 4,6%, iŏk đei jơnei hlŏh 2% trong tơlĕch jang lơ̆m sơnăm au:“Tơlĕch jang kơtang găh tang găn jĭ adoi nhen dăr lăng, lăng hơlen rim tơdrong hơmơt vă pơgơ̆r jang sa, tĕch mơdro tơmam drăm păng tĕch mơdro sơđơ̆ng, dêh char Bắc Giang jei pơjing rơvơn ăn rim tơmam drăm kăl đơ̆ng rim dêh char anai nhen: tơmam drăm hiĕm kon tơrong, tơmam drăm jang sa nhen:hơdrĕch ‘long pơtăm, yŏng kon tơrong chơ pơtrŭh lơ̆m tơring vă jang sa sơđơ̆ng ‘lơ̆ng hơ iă hlŏh. Trong kơnăl đei ƀô̆h, tơdăh vei lăng kơ jăp păng tơlĕch trong jang ƀlep oei sơđơ̆ng ăn rim trong pơkăp sơđơ̆ng dơ̆ng kơ jăp lơ̆m tang găn jĭ hơbŭh Covid-19 păng sơđơ̆ng tơdrong jang atŏk tơ iung mŭk drăm-tơpôl, lơ̆m au đei atŏk tơ iung chŏh jang sa”.

Hăm tơring đei lơ thoong hơboong đak, đĭ đăng rim hnam kmăi pơm tơlĕch phe ƀa tơ̆ jĭh đak kroong hơboong thoong đak, phe ƀa jang sa, pơm tơlĕch tơ̆ tơring Tơmăn đak kroong Cửu Long hlŏh 90% đei chơ ba trong đak ngăl. Kơ yuơ lơ lŏh, tơdrong pơchŏh trong đak ăn duk chơ tơmam drăm gô tơgop gĭt kăl tơgŭm ăn rim bơngai tĕch răt păng hơnĭh mơdro sa tơm tĕch mơdro phe tơ̆ tĕh đak đe iung jang hơnơ̆ng chă răt iŏk phe ƀa tơmam drăm đơ̆ng chŭn na ba trŭh tơ̆ dơnŏk chơ tĕch tơ̆ tĕh đak đe. Mă lei, kiơ̆ đơ̆ng ƀok Nguyễn Tấn Nhơn, Kơ iĕng Kơdră chĕp pơgơ̆r Dơnŏ anĭh vei lăng Choh jang sa păng Atŏk tơ iung tơring tơrang pơlei tơm Cần Thơ, dôm trong tơlĕch jang, tơdrong tơchơ̆t hơmet pơ ‘lơ̆ng tơnap tap hlôi đei pơjing mă lei gô mơ̆ng kiơ̆ lơ̆m rim tơring găh jơhngơ̆m hlô̆h vao păng pơlăp pơm kiơ̆ lơ liơ:“Apĭnh Dơnŏ anĭh tơm vei lăng Chŏh jang sa păng Atŏk tơ iung tơring tơrang đei nơ̆r apinh athei Dơnŏ anĭh tơm vei lăng Trong gre nơnăm vă đei nơ̆r pơtho tơbăt pơjao ăn dêh char ƀơk ăn hla bơar tơchơ̆t găh hơdrĕch nhen trong hiôk hăm gre chơ tơmam drăm vă rim thŏng nan năm răt chơ tơmam drăm sơđơ̆ng. Kăl pơjing trong điên thoăi pơma dơnŭh kăl ƀar păh rim dêh char vă hơmet pơ ‘lơ̆ng ăn rim bơngai mơdro, hơnĭh mơdro sa chă năm răt ƀa tơ̆ rim tơring 'lơ̆ng hơ iă ƀiơ̆. Dang ei đei dôm tơdrong tơchơ̆t tôch phara ‘nŏh đei ‘măng ‘nhŏng ŏh năm trŭh tơ̆ nŏh  ư̆h kơ băt vă krao bơngai bu, gơnang bơngai bu vang chă tơgŭm djru”.

Hla bơar chĭh tơbăt tơdrong jang đơ̆ng Khŭl bơ̆ jang gĭt kăl găh Pơbăh kơ Dơnŏ anĭh tơm vei lăng Chŏh jang sa păng Atŏk tơ iung tơring tơrang tơ ƀô̆h hơdăh, jô̆ trŭh tŏk bŏk khei 8, ƀa pơyan tơ̆ rim dêh char, pơlei tơm lơ̆m tơring Tơmăn đak kroong Cửu Long hlôi kĕch yoă hlŏh 800.000 ha hăm iŏk đei 4 trĭu 500.000 tân. Tơchĕng hơlau đei kĕch yoă lơ lơ̆m khei 8 păng keh đang lơ̆m tŏk bŏk khei 9. Mă lei, tơdrong tơnap tap hlŏh hrei au hăm hơnĭh bơ̆ jang vei lăng chŏh jang sa ‘nŏh tơdrong jang kiơ̆ Nơ̆r athei jang kiơ̆ 16 tơ̆ rim dêh char, pơlei tơm găh Pơbăh pơm ăn trŭh tơ hlăk tơhlĭn chă chơ phe ƀa, tơmam drăm sa đơ̆ng chŭn vĭh tơ̆ hnam kmăi păng đơ̆ng hnam kmăi năm tơ̆ rim dơnŏk duk đak dơsĭ vă chơ tĕch mơdro tơ̆ tĕh đak đe. Kon pơlei tŏk bŏk yô̆ prĕh ƀa, lơ̆m mă rim kơdră tơring, pơlei, pơlăp jang kiơ̆ tang găn jĭ hơbŭh ... pơm ăn trŭh ư̆h kơ măh kơtang khŭl jang yô̆ prĕh ƀa, đơ̆ng bơngai chă răt trŭh tơ̆ bơngai yô̆ prĕh ƀa, tung pơdŭ tăh lơ̆m thŏng nan kmăi. Hmă hmă kon pơlei iŏk yua thŏng nan kmăi vă chă chơ ƀa đơ̆ng chŭn, mălei hrei au, rim thŏng nan kmăi au ư̆h kơ gơ̆h chă kơdau đơ̆ng tơring au năm tơ̆ tơring anai, mă kăl tơ̆ thoong hơboong pơnhă chŭn na pơm tơnap tap ăn chă chơ pơdŭ phe ƀa. Ƀok Nguyễn Quốc Toản, Kơdră chĕp pơgơ̆r Dơnŏ anĭh vei lăng Pơm tơlĕch păng atŏk tơ iung mơdro sa tơmam drăm chŏh jang sa apĭnh, athei:“Tơring tơmam đak kroong Cửu Long chă chơ pơdŭ tơmam drăm trong đak ‘nŏh tơm hlŏh lơ̆m chơ ƀa đơ̆ng chŭn năm trŭh tơ̆ hơnĭh ot ƀa păng chơ ba đơ̆ng hnam kmăi ot ƀa. Hơpơi hlôi đei “trong hiôk” tơ̆ trong tĕh ‘nŏh jei kăl đei “trong hiôk” tơ̆ trong đak kăl đei tơchơ̆t mĭnh nơ̆r ƀar păh rim Dơnŏ anĭh vei lăng Trong gre nơnăm, Khŭl jang dăr lăng trong đak rim tơring păng hla bơar twochơ̆t jei lei lăi dĭh băl sơkơ̆t hơdăh hơnĭh năm păng hơnĭh trŭh vă hơmet pơ ‘lơ̆ng tơdrong tơnap tap”.

Hơmet pơ ‘lơ̆ng tơdrong tơhlăk tơhlĭn tơmam drăm, pơjing rơvơn ăn chơ pơdŭ tơmam drăm chŏh jang sa jing tơdrong jang kăl hlŏh hrei au. Kơ yuơ lơ lŏh kăl hrôih đei nơ̆r pơtho tơbăt ăn vă rim tơring drơ̆ng mĭnh nơ̆r lơ̆m chĕp pơgơ̆r tơlĕch jang kiơ̆ hơmet pơ ‘lơ̆ng tơnap tap, tang găn kơ hret lơ̆m chơ tơmam drăm păng tĕch mơdro tơmam drăm chŏh jang sa, mă kăl ‘nŏh tơmam drăm chŏh jang sa tŏk bŏk lơ̆m khei ‘năr phĕ yô̆. Đei ƀơm trŭh tơdrong au, Dơnŏ anĭh tơm vei lăng Mơdro sa hlôi chĭh pơtrŭh hla bơar apĭnh Thủ tướng tĕh đak lăng hơlen, pơjao ăn rim Dơnŏ anĭh tơm, hơnih bơ̆ jang, tơring đei ƀơm trŭh chă lăng hơlen pơ̆ih “trong hiôk” ăn chơ tơmam drăm trong đak. Jei lơ̆m trong jang ‘nao hlŏh, Dơnŏ anĭh tơm vei lăng Trong gre nơnăm jei hlôi chĭh pơtrŭh hla bơar athei Dơnŏ anĭh vei lăng Trong gre nơnăm rim dêh char pơlei tơm tĕnh koăng bơ̆ jang tơgŭm tơbăt ăn Dơnŏ anĭh vei lăng kon pơlei dêh char, pơlei tơm pơjing rơvơn ăn kon pơlei, hơnĭh bơ̆ jang gre chơ tơmam drăm trong đak lơ̆m tơring vă duk thŏng nan gơ̆h chă kơdau hơnơ̆ng, logistics tơgŭm ăn pơm tơlĕch păng răt iŏk tơmam drăm đơ̆ng kon pơlei.

Bơngai chĭh: Minh Long -  VOV1

Tơblơ̆ nơ̆r: Amazưt