VOV4.Bahnar - Tơ drong pơm hơ tŏ găh jên tơ gŭm ăn đĭ đăng hơ drĕch kon kông tơ̆ dôm tơ ring kon kông ‘nŏh jĭ tơ drong tơm pơm tơ lĕch tơ drong jang tŏk ưh đei hơ nơ̆ng. Kơ plăh ‘nŏh mă tơ pă, tơ drong mơ mat tat pha ra băl, đon hlôh vao pha ra băl, tơ drong juăt pha ra băl păng trong jang xa pha ra băl. Kơ na tơ drong tơ mât jên jang ‘nŏh hơ nat vă gơ̆h đei yoa nhen thoi ‘mĕh vă. Kơ lih thoi nŏh, trong jang yơ vă atŏk tơ iung mŭk drăm, tơ pôl tơ̆ tơ ring kon pơ lei kon kông păng groi kông ‘nŏh jĭ tơ drong mă dôm anih jang chă tơ chĕng hơ len găh hơ drĕch kon kông hlôi akŏm jơ hngâm hơ len năng khei ‘năr âu ki.

Mă tơ̆ pă tơ̆ 1,2 tơ ring kon pơ lei kon kông oei, 1 unh hnam kon pơ lei kon kông ƀât lăp iŏk đei tơ drong tơ gŭm đơ̆ng 4 tơ drong jang pha ra băl, mă lei tơ drong tơm pơm tơ lĕch tơ nuh hin ‘nŏh jĭ ưh kơ măh tĕh choh jang xa păng đon hlôh vao găh trong jang xa, dang ei 2 tơ drong ‘nâu kon pơ lei tam mă iŏk đei. Kiơ̆ đơ̆ng chă dăr lăng tơ̆ tơ ring kon kông ăn ƀôh: kơ sô̆ unh hnam tơ nuh lơ̆m dôm sơ năm âu ki jur hrĕnh, mă lei tam mă kơ jăp, tơ drong krê tơ nuh hơ lơ̆k dơ̆ng oei dêh đĕch, lơ unh hnam ưh kơ măh tĕh choh jang xa, tĕh oei, tam đei yoa đak rơ gŏh. Tơ̆ 1,2 tơ ring, tơ drong tơ gŭm oei hơ drom băl, ưh băt vă tơ gŭm ăn yă kiơ tơm.

‘Năr 14/10/2021, Thủ tướng tĕh đak tơ lĕch tơ drong jang tơm kơ tĕh đak atŏk tơ iung mŭk drăm, tơ pôl tơ̆ tơ ring kon pơ lei kon kông păng groi kông đơ̆ng 2021- 2030. Jăl 1 đơ̆ng 2021 truh sơ năm 2025 vă tơ lĕch 10 tơ drong jang vă sek tơ lang tơ drong ưh kơ măh tĕh choh jang xa, tĕh oei, pơ truh đak rơ gŏh; chĕng hơ met tĕh, pơ jing ming pơ lei oei xa; tưk tơ iung tơ drong choh jang xa, pơ tăm ‘long kơ jăp ‘lơ̆ng; tơ lĕch jên man anih jang, pơm trong; atŏk tơ iung pơ tho pơ hrăm, pơm hơ tŏk ‘lơ̆ng khul jang vei lăng, tưk tơ iung kơ jă kăp gĭt đơ̆ng jŏh ayŏ kơ dŏ xoang, tơ drong juăt ‘lơ̆ng đơ̆ng sơ̆ hơ dai hăm chă tơ mang lăng, vei lăng jơ hngâm pran ăn kon pơ lei kon kông, bơ̆ jang pơm hơ tŏ băl kơ plăh drŏ kăn hăm drŏ nglo; tơ mât jên atŏk tơ iung grŭp kon pơ lei kon kông tŏ sĕt bơ ngai păng grŭp kon kông oei mơ mat tat; hơ len năng păng pơ gơ̆r bơ̆ jang kiơ̆ tơ drong jang.

Kiơ̆ ƀok Bùi Sỹ Lợi, sơ̆ pơm Phŏ kơ dră Anih vei lăng dôm tơ drong lơ̆m tơ pôl kơ Kuô̆k hô̆i, tơ drong jang tơm kơ tĕh đak jang atŏk tơ iung mŭk drăm tơ pôl tơ̆ tơ ring kon pơ lei kon kông păng groi kông đơ̆ng 2021-2030 đei tơ lĕch ƀât mă bơ̆n oei đei 2 tơ drong jang tơm kơ tĕh đak. ‘Nŏh jĭ tơ drong jang tơm kơ tĕh đak pơ jing tơ ring tơ rang ‘nao, păng Tơ drong jang tơm kơ tĕh đak găh tơ jur tơ nuh hin kơ jăp ‘lơ̆ng. Yoa thoi nŏh athei hơ len năng mă tôm 2 tơ drong jang ‘nâu vă pơm hơ dăh dôm tơ drong tơ mât jên jang ăn tơ ring kon kông, groi kông iŏk đei jơ nei truh dang yơ. Oei dôm tơ drong kăl yơ tam mă đei sek tơ lang ‘nŏh tơ drong jang tơm kơ tĕh đak atŏk tơ iung mŭk drăm, tơ pôl tơ̆ tơ ring kon kông păng groi kông athei sek tơ lang pơ ‘lơ̆ng. Kiơ̆ tơ drong tơ chơ̆t 88 đơ̆ng Kuô̆k hô̆i ‘nŏh jĭ tơ mât jên vă chă tơ drong jang xa ăn kon pơ lei kon kông păng groi kông hăm tơ drong tơm ‘nŏh pơm hơ tŏk iŏk yoa, hơ met pơ ‘lơ̆ng tơ drong arih xa păng dar dĕh pơm tơ jur ƀiơ̆ tơ drong ưh hơ tŏ băl đơ̆ng tơ ring groi kông păng tơ ting tơ măn.

Ƀok Bùi Sỹ Lợi pơ ma hơ dăh: “Lơ̆m 10 tơ drong jang ‘nŏh, hrei ‘nâu oei chih hơ dăh kơ sô̆ jên vă tơ mât jang jăl blŭng đei 50 rơ bâu ti vă pơ yoa ăn tơ drong jang tŏk păng 54 rơ bâu ti vă kla ăn tơ drong jang hơ nơ̆ng, năng kơ sô̆ âu ‘nŏh tôch hơ dăh bơ̆n tam mă gan tơ rĕk truh tơ drong tơ mât jên jang tŏk, mă oei hue lăng truh tơ drong tơ lĕch jên vă bơ̆ jang, kơ na athei tơ chĕng hơ len dơ̆ng, pơm thoi yơ vă hue lăng truh tơ drong tơm chă tơ drong jang, pơm tơ plih đon hlôh vao ăn kon pơ lei kon kông păng groi kông, đei tơ drong ‘lơ̆ng vă đe vang bơ̆ jang lơ̆m trong jang atŏk tơ iung choh jang xa, pơm hơ tŏk iŏk yoa.”

Băt hơ dăh, khei ‘năr adrol ki đei lơ tơ drong tơ gŭm ƀơm truh tơ ring âu, mă lei ƀât lăp lơ tơ drong tơ gŭm ưh hơ nhăk ba tơ drong đei yoa ‘lơ̆ng hơ nơ̆ng, ƀât lăp sư oei hơ drom băl dơ̆ng, ƀok Đỗ Văn Sinh, Kơ dră jang lơ̆m Anih vei lăng mŭk drăm kơ Kuô̆k hô̆i pơ ma truh tơ drong tơ chơ̆t 88 đơ̆ng Kuô̆k hô̆i Kĭ ăn tơ drong jang tơm vă atŏk tơ iung mŭk drăm, tơ pôl tơ̆ tơ ring kon pơ lei kon kông păng groi kông đơ̆ng 2021-2030 đei chih tôm păng ‘lơ̆ng hlŏh gô sek tơ lang đei dôm tơ drong kăl. Păng mưh bơ̆ jang Tơ drong jang tơm kơ tĕh đak atŏk tơ iung mŭk drăm, tơ pôl tơ̆ tơ ring kon pơ lei kon kông păng groi kông đơ̆ng 2021-2030 kiơ̆ tơ drong Tơ chơ̆t 88 đơ̆ng Kuô̆k hô̆i, ‘nŏh gô đei lơ trong jang hrơ̆ch ‘lơ̆ng păng akŏm đei lơ jên, tơ mam vă sek tơ lang dôm tơ drong đei tơ lĕch tơ̆ tơ ring.

Ƀok Đỗ Văn Sinh akhan: “Khei ‘năr âu ki đei lơ tơ drong jang TƯ, ƀât lăp đơ̆ng TƯ đei lơ anih tơm, anih jang kơ pal pha ra băl, tơ̆ tơ ring kŭm đei lơ anih jang pha ra băl ‘năi. Kiơ̆ inh athei akŏm 1 anih, tơ̆ TƯ gơ̆h pơ jao ăn 1 Anih tơm, tơ̆ tơ ring kŭm pơ jao ăn 1 anih jang đĕch vă bơ̆n gơ̆h akŏm đei jên, tơ mam drăm, pơm thoi yơ vă bơ̆n gơ̆h đei tơ drong tơ gŭm trŏ, ưh đei ƀơm găh âu găh to, ưh đei lon bu. ‘Nâu jĭ tơ drong tôch gĭt kăl.”

Hrei ‘nâu, dôm tơ ring hlôi tơ lĕch lơ trong tơ gŭm ăn kon pơ lei kon kông tơ̆ tơ ring, pơm ‘lơ̆ng “tơ drong tơ gŭm gơ̆h truh hăm kon pơ lei” hrĕnh hlŏh păng đei yoa hlŏh, pơ jing trong klăih song jên jang mă lăp, pơ ‘nhŏ hơ drol ăn dôm tơ ring bơ̆ jang pơ long năng tơ drong jang tơm kơ tĕh đak. Ƀok Dương Văn Hào, Phŏ Kơ dră vei lăng kon pơ lei apŭng Võ Nhai, dêh char Thái Nguyên pơ ma akhan: “Kiơ̆ đơ̆ng dôm tơ drong tơ gŭm ‘nŏh, hlôi pơ jing đei tơ drong đei yoa tôch ‘lơ̆ng ăn tơ drong arih xa kơ kon pơ lei. Mă hơ dăh ‘nŏh đon hlôh vao đơ̆ng kon pơ lei roi tŏk, găh nŏh dơ̆ng tơ drong jang tŏk mŭk drăm kŭm đei tơ plih kiơ̆, tơ drong chơ chuĕn, tĕch mơ dro tơ mam đơ̆ng dôm tơ ring kŭm roi ‘lơ̆ng”.

Ƀât mă jĭ Covid 19 oei tôch hơ mơt, đei đunh păng jên jang ưh kơ lơ, Khul kơ dră tĕh đak oei pơ ‘nhŏ jên vă bơ̆ jang hơ drol dôm tơ drong jang tơm, tơ drong hơ găt gĭt kăl, akŏm ăn dôm tơ ring mơ mat tat dêh hlŏh păng sek tơ lang đei tơ drong kăl hlŏh hăm kon pơ lei kon kông.

Dơ̆ng: Tơ blơ̆