Plei M’riu dang ei đei 300 unh hnam hăm vă jê̆ 1400 ‘nu bơngai, mă lơ ‘nŏh jĭ kon pơlei kon kông. Lơ̆m dôm sơnăm âu ki, Công ty jang unh điên Đắk Lắk hơnơ̆ng roi tơbăt, pơlung kon pơlei bơ̆ jang ‘lơ̆ng dôm trong jang đơ̆ng Đảng, khôi luơ̆t teh đak; hơtŏk đon kơchăng tơ̆ hơnăp tơdrong phă ngơ̆r đơ̆ng hơyăt.

Vă tơgŭm ăn kon pơlei da ƀiơ̆ kơ pơmat tat, Công ty tơmât jên man hnam hŏk hôp tơpôl, hnam chă pơyơ̆ng plei M’riu; hơnơ̆ng năm ngôi, hơpăh tơmam ăn kon pơlei lơ̆m năr lêh, têt; răt 13 tŏ rơmo yŏng hơpăh ăn dôm unh hnam tơnuh vă rong, jang atŏk tơiung mŭk drăm lơ̆m hnam.

Akŏm đĭ đăng kơsô̆ jên mă Anih jang unh điên Đắk Lắk tơgŭm ăn pơlei M’riu lơ̆m khei ‘năr âu ki hlŏh 950 triu. Tơ̆ hơnăp kơnh, 2 păh tơlĕch 5 tơdrong jang tơm vă hơnơ̆ng pơjing tơdrong pơvei, mât 1 ƀơ̆r đon păng tơgŭm ăn kon pơlei jang atŏk tơiung mŭk drăm, vei lăng sơđơ̆ng chinh trĭ.