Khŭl y, ƀak si năm jang tơgŭm ‘mêm mơ nat kơ hnam pơgang Trung ương Huế tŏk bŏk pơgơ̆r tơdrong jang khăm hơmet jĭ ‘mêm mơnat ăn kon pơlei tơ̆ dôm tơring hơtăih hơtŏ tơ̆ dêh char Lâm Đồng. Tơchĕng hơdrol gô đei dang 2.000 ‘nu kon pơlei đei sa yua đơ̆ng tơdrong jang. Mă hơdăh, đơ̆ng ‘năr 6-10/8, khŭl y ƀak si năm jang tơgŭm gô pơgơ̆r khăm hơmet jĭ ‘mêm mơnat tơ̆ dôm xăh Đạ Chais păng Đưng Knớ, apŭng Lạc Dương păng Đông Thanh, Phúc Thọ, apŭng Lâm Hà. ‘Nâu jĭ dôm tơring hơtăih hơtŏ, đei lơ bơngai kon kông arih sa.

Kon pơlei gô đei khăm păng pơtho tơƀôh jơhngơ̆m pran, asong đĕch pơgang dôm tơdrong jĭ lơ̆m hơkâu, hơ ioh jĭ, tơdrong jĭ măt păng jĭ bơ̆n hơnĕnh tơƀŏk. Lơ̆m tơdrong jang khăm jĭ tơ̆ xăh Đưng Knớ, apŭng Lạc Dương ‘năr 7/8, khŭl hlôi khăm jĭ, asong đĕch pơgang ăn kơ vă jê̆ 500 ‘nu kon pơlei. Pơjao 400 tơpu tơmam ‘măn asong ăn dôm ŭnh hnam teh đak tơgŭm, ŭnh hnam dơnuh hin, ŭnh hnam mơmat tat lơ̆m xăh.