VOV4.Bahnar - Puăn tơ drong tơ chơ̆t đơ̆ng Hop akŏm mă 5, Khul kơ dră chĕp kơ̆l Trung ương Đảng jăl 13 ‘nŏh jĭ dôm tơ drong tơ chơ̆t đei kăn ƀô̆, đảng viên păng kon pơ lei tôch gô chang. ‘Nâu jĭ dôm trong jang tih, trŏ ƀlep đơ̆ng Đảng vă pơih trong ăn lơ tơ drong ‘lơ̆ng, tưk tơ iung jơ hngâm pran jang tŏk mŭk drăm, tơ pôl păng hơ met Anih jang Đảng pran kơ jăp. Đảng viên, kon pơ lei, dôm bơ ngai vei lăng păng juăt jang tôch hơ mĕng hăm 3 Tơ drong tơ chơ̆t vă atŏk tơ iung mŭk drăm.

Tơ drong tơ chơ̆t kơ sô̆ 18 găh "Hơ nơ̆ng tơ plih, hơ met pơ ‘lơ̆ng trong pơ gơ̆r, tơ drong tơ gŭm, hơ tŏk tơ drong pran, đei yoa mưh vei lăng păng iŏk yoa tĕh, hơ nhăk tĕh đak bơ̆n tŏk jing tĕh đak pơ drŏng, đei iŏk yoa lơ" ‘nŏh jĭ tơ drong tơ chơ̆t iŏk đei tơ drong tơ rĕk dêh hlŏh đơ̆ng đĭ đăng kon pơ lei. Dôm tơ drong ưh kơ lăp lơ̆m luơ̆t ƀơm truh tơ̆ tĕh păng dôm tơ drong tơ gŭm hrei ‘nâu, jing đei tơ drong sek tơ lang ưh kơ tang hăm dôm tơ drong jang ưh đei tơ lĕch bơ̆ jang, tơ drong răt mong akŏm tĕh, tơ drong tơ gŭm hrŭ ‘mong tĕh, kơ jă tĕh... đơ̆ng nŏh pơm mơ mat tat ăn lơ tơ ring mưh hrŭ ‘mong, chưk pơ ‘ngoăih tĕh, tơ gŭm, pơ jing tơ ring oei xa ‘nao, iŏk pơ dreu tĕh...

Ƀok Lưu Ngọc Hà, Kơ dră vei lăng kon pơ lei Kuơ̆n Bắc Từ Liêm, Hà Nội ăn tơ băt: “Tơ drong jang chưk pơ ‘ngoăih tĕh mưh bơ̆ jang vei lăng, iŏk yoa tĕh đei 1,2 tơ ring tơ ƀâp lơ mơ mat tat vă hơ len năng tĕh đơ̆ng yơ păng mă tơ pă đei iŏk yoa pha ra băl. Kơ lih thoi nŏh tơ drong tơ gŭm hrŭ ‘mong jên tĕh vă hơ met pơ ‘lơ̆ng kŭm nhen kăl đei nơ̆r pơ tho rơ đăh ‘lơ̆ng mơ̆i na bơ̆n gơ̆h chưk pơ ‘ngoăih đei tĕh. Đei 1 tơ drong mơ mat dơ̆ng ‘nŏh jĭ hrei ‘nâu athei chih hơ dăh kơ jă tĕh vă hrŭ păng tơ gŭm tĕh oei rĕh ƀiơ̆ kơ jă tơ̆ ‘ngoăih, jing tôch mơ mat tat mưh bơ̆ jang hăm kon pơ lei mưh ưh đei tĕh vă ăn đe sư tŏk oei dơ̆ng, mă lăp ăn đe sư tŏk oei tơ̆ hnam tơ̆ng đĕch.”

Tơ drong tơ chơ̆t 18 hăm lơ trong jang tih găh tĕh nhen jang kĕh tơ drong chih hơ met ming Luơ̆t tĕh sơ năm 2013 păng dôm luơ̆t nai đei ƀơm truh.... đei hơ mĕng ưh lăp hơ met pơ ‘lơ̆ng dôm tơ drong ưh kơ lăp hrei ‘nâu đĕch mă oei pơm lơ̆ng ăn tơ drong vei lăng tĕh roi kơ jăp, đei yoa hlŏh dơ̆ng, tưk tơ iung đei jơ hngâm pran đơ̆ng tơ mam tôch kăp gĭt găh tơ mam yoa kơ đĭ đăng kon pơ lei âu.

Yă Bùi Thị An, Kơ dră Anih vei lăng tơ mam drăm, cham char păng atŏk tơ iung tơ pôl hơ mĕng: “Lơ̆m khei ‘năr iŏk yoa tĕh bơ̆n đa tơ ƀâp lơ tơ drong glăi, tôch huach, hiong răm lơ găh jên tĕh đak, kŭm nhen pơm ăn tơ drong arih xa kơ 1 kơ sô̆ kon pơ lei jing ưh sơ đơ̆ng. Kơ lih thoi nŏh, Tơ drong tơ chơ̆t 18 lĕch kơ plăh dang ei tôch kơ trŏ, vă iŏk yoa pơ đĭ tơ drong ‘lơ̆ng đơ̆ng tĕh, thu thêm jên ăn tĕh đak kiơ̆ đơ̆ng thuê̆, pơ jao tĕh, tĕch mơ dro tĕh roi lăp ƀiơ̆, hơ tŏ ƀiơ̆. Inh tơ chĕng tơ dăh bơ̆n bơ̆ jang kiơ̆ ‘lơ̆ng tơ drong Tơ chơ̆t 18 âu, gô sek tơ lang đei lơ tơ drong ƀơm truh tơ̆ tĕh păng dôm tơ drong ưh hơ iă đei khei ‘năr âu ki.”

Rim tơ ring păng kon pơ lei jang chŭn mir kŭm tôch tơ rĕk truh tơ drong tơ chơ̆t kơ sô̆ 19 găh "Choh jang xa, bơ ngai jang chŭn mir, tơ ring tơ rang truh sơ năm 2030, trong jang truh sơ năm 2045 ‘nâu ưh lăp tơ drong jang tŏk ‘moi kiơ̆ tơ drong Tơ chơ̆t kơ sô̆ 26 đơ̆ng Trung ương jăl 10 găh choh jang xa, bơ ngai jang chŭn mir, tơ ring tơ rang đĕch mă oei đei hloi lơ tơ drong jang tŏk ‘nao, dôm tơ drong vă jang ‘nao, tôch hơ iă.

Sơng iŏk tơ drong tơ chơ̆t ‘nao, ƀok Nguyễn Trí Ngọc, Phŏ Kơ dră chĕp kơ̆l khul Choh jang xa păng atŏk tơ iung tơ ring tơ rang Việt Nam tơ roi: Hăm tơ drong chơt hơ iă đơ̆ng pơ jing tơ ring tơ rang ‘nao, um ai tơ ring tơ rang roi đunh roi tơ plĭh ‘lơ̆ng, tơ drong arih xa kơ kon pơ lei jang chŭn mir roi tŏk, Tơ drong tơ chơ̆t 19 ‘nao tơ lĕch vă tưk tơ iung dơ̆ng jơ hngâm pran ăn tơ drong choh jang xa, tơ ring tơ rang. Pơm ‘lơ̆ng ăn tơ drong jang tŏk kơ plăh tơ ring tơ rang hăm tơ ring kơ drâm, kơ plăh dôm tơ ring kiơ̆ trong “choh jang xa rơ gŏh ‘lơ̆ng, tơ ring tơ rang tơ plih ‘nao, kon pơ lei jang chŭn mir rơ gei:

“Tơ drong tơ chơ̆t ‘nao tơ ƀôh hơ dăh đon pơ hnŏng đơ̆ng rim anih jang chinh trĭ hăm tơ drong choh jang xa, bơ ngai jang chŭn mir, tơ ring tơ rang. Vă tơ drong tơ chơ̆t gơ̆h jang kiơ̆, nhôn tơ chĕng athei đei trong jang pran ‘lơ̆ng. Hơ drô̆ găh tơ drong choh jang xa pơ ma atŭm, tơ drong rei pơ tăm pơ ma hơ drô̆ nhôn ƀôh kăl đei trong jang pran ‘lơ̆ng găh chih pơ kĕh luơ̆t tĕh, yoa trong vei lăng tĕh tôch gĭt kăl hăm tơ drong atŏk tơ iung choh jang xa, mă loi ‘nŏh atŏk tơ iung choh jang xa pơm tơ lĕch tơ mam drăm mưh bơ̆n tơ plih ming đon tơ chĕng đơ̆ng choh jang xa jing jang mŭk drăm đơ̆ng choh jang xa.”

Tơ drong tơ chơ̆t 20 găh "Hơ nơ̆ng tơ plih ‘nao, tưk tơ iung păng hơ tŏk tơ drong đei yoa đơ̆ng mŭk drăm atŭm lơ̆m chăl ‘nao" hlôi lăng ƀôh lơ tơ drong tam mă pran păng yoa kiơ đei tơ drong tam mă pran ‘lơ̆ng lơ̆m tơ drong jang mŭk drăm atŭm. Tơ drong tơ chơ̆t chih hơ dăh dôm tơ drong vă jang păng rim trong jang tơm vă atŏk tơ iung mŭk drăm atŭm tơ̆ hơ năp kơnh. Kăl loi chih tơ mât, hơ met pơ kĕh khôi luơ̆t, trong jang, tơ drong tơ gŭm vă pơ lung, tưk tơ iung tơ drong jang mŭk drăm atŭm, dôm khul grŭp jang mŭk drăm hơ dai.

 Nguyên Nhung: Chih

Dơ̆ng: Tơ blơ̆