‘Nâu jĭ nơ̆r roi tơbăt đei tơlĕch lơ̆m Hop akŏm hơlen năng tơdrong jang 6 khei blŭng sơnăm, tơdrong vă jang tơm lơ̆m 6 khei hơtuch sơnăm 2023 găh tơdrong jang xa, bơngai đei kŏng păng tơpôl yoa Anih tơm vei lăng bơngai jang xa, linh jĭ rơka păng tơpôl pơgơ̆r kơ sơ̆ 21/7 tơ̆ plt Huế, dêh char Thừa Thiên Huế. 6 khei blŭng sơnăm ‘nâu, tơdrong jang xa năng atŭm sơđơ̆ng ‘lơ̆ng, dôm tơdrong hơgăt đei tŏk ƀiơ̆. Bơngai đei tơdrong jang ‘nŏh 51,2 triu ‘nu, tŏk hlŏh 900 rơbâu ‘nu pơtêng hăm khei âu sơnăm sơ̆.

Rim anih jang akŏm jơhngâm hơmet pơ ‘lơ̆ng trong tơgŭm, khôi luơ̆t găh tơdrong tơgŭm lơ̆m tơpôl; bơ̆ jang tơgŭm rim khei ăn hlŏh 3,3 triu ‘nu bơngai păng hlŏh 300 rơbâu unh hnam, rim bơngai đei iŏk vei rong, tơgŭm rim khei. Tơ̆ hop akŏm, bơngai tang măt dôm anih jang, tơring tơrang pơma nuh, tơlĕch lơ trong jang tŏk, hơlen năng rim tơdrong jang, dôm tơdrong arih xa tơpôl; Hơnơ̆ng bơ̆ jang dôm trong jang pơih xă păng atŏk tơiung khul bơngai vang răt ƀao hiêm tơpôl, ƀao hiêm ưh đei tơdrong jang.