Ƀok A Hring, bơngai Sê Đăng tơ̆ plei Đắk Manh, xăh Đắk Rơ Nga, apŭng Đăk Tô (Kon Tum) akhan: unh hnam ƀok kŭm nhen 120 unh hnam lơ̆m pơlei đei tơdrong arih xa sơđơ̆ng, hiôk jơnap nhen hrei ‘nâu ‘nŏh gơnơm đei tơdrong tơgŭm tôch pơnĕh đơ̆ng kăn ƀô̆ pơtrŭt choh jang xa kơ apŭng truh pơtho ăn trong jang xa, chă rơih hơdrĕch ‘long lăp ‘lơ̆ng hăm tĕh, tŏ ‘mi kial păng hơnhăk ăn iŏk yoa kơjăp. Tơdrong arih xa roi tŏk, 1 păh ‘nŏh gơnơm tơdrong tơgŭm tôch ‘lơ̆ng đơ̆ng jên asong tŏk iŏk hăm jên kon tŏ sĕt. Mă lei vă gơ̆h đei yoa ‘lơ̆ng, đơ̆ng rŏng kơ tŏk iŏk, athei yoa jên mă trŏ hăm rim tơdrong jang ‘năi: đơ̆ng choh jang, rơih tơđăh, chă phŏng, vei rong athei băt trong jang mă ‘lơ̆ng ‘mơ̆i. 1,2 unh hnam lơ̆m pơlei đei tĕh, đei tŏk iŏk jên vă jang xa, mă lei jang xa ưh đei iŏk yoa kơ lih yoa iŏk yoa jên tam mă trŏ hăm tơdrong jang. Unh hnam ƀok ‘nŏh pha, băt trong tơchĕng hơlen vă tơlĕch jên trŏ tơdrong jang, trŏ khei ‘năr, thoi nŏh gơ̆h đei yoa ‘lơ̆ng.

Dôm năr ‘nâu ƀât ‘nao vă mât lơ̆m pơyan phĕ chĕh phe, mă lei ƀok A Hring đĭ ‘măn hlŏh 100 triu hlak, răt akŏm 50 tân ich rơmo, phŏng vi sinh vă tuh ăn ‘long pơtăm đơ̆ng rŏng kơ phĕ: "Inh tŏk iŏk jên tơ̆ Agribank apŭng Đăk Tô hlŏh 1 ti, vă răt tơđăh ‘long cao su, phŏng, mơ̆r, răt tơđăh ‘long mắc-ca (ƀât dŏh sơ̆ đei kơjă 55 rơnâu 1 pôm tơđăh). Dang ei inh đei hlŏh 7 ha ‘long cao su, 4 ha ‘long mắc-ca... Lơ̆m sơnăm ‘nâu inh vă kla tôm jên tŏk iŏk, hơdai hăm ‘nŏh vă hơnơ̆ng măn jên ăn tơdrong jang xa dơ̆ng’’.

Kŭm tơ̆ plei Đắk Manh mơ̆n, unh hnam ƀok A Chăc đei truh 10 ha cao su, 6 ha chĕh phe, mắc ca. Hơdrô̆ pơyan phĕ plei blŭng a âu ki, lơ̆m 4 ha mắc ca đei pơtăm hơlam hăm ‘long chĕh phe đĭ phĕ đei truh 5 tân plei. Hăm kơjă tĕch mắc ca hơdrih kơtă tơ̆ pơgar 1 tân đei 32 triu hlak, unh hnam ƀok iŏk đei hlŏh 150 triu bơih. Ƀok A Chắc man đei hnam kơjăp ‘lơ̆ng, răt đei gre ô tô păng mong jên rong kon hơ ‘lơ̆p năm hŏk hai: “Gơnơm đei tŏk iŏk jên tơ̆ Anih mong jên chŏh jang xa păng atŏk tơiung tơring tơrang apŭng Đăk Tô inh đei jên vă pơtăm ‘long mắc-ca, chĕh phe, sầu riêng păng dôm kơ loăi ‘long pơtăm nai, răt bơ̆n phŏng, pơgang sơdrông... Yoa tơlĕch jên jang xa trŏ trong kơna kon pơlei tơ̆ âu đei iŏk yoa tôch sơđơ̆ng, mă loi ‘nŏh, yoa băt trong pơtăm chĕh phe kơna kon pơlei kla tôm jên ăn anih mong jên. Năng atŭm, pơtêng hăm 10 sơnăm adrol sơ̆, tơdrong arih xa kơ kon pơlei tŏk ‘lơ̆ng ƀiơ̆ tơpă’’.

Ƀok A Như, ƀok pơgơ̆r Pleilay, xăh Ya Chim, plt Kon Tum ăn tơbăt: Pleilay đei 296 unh hnam, hăm 960 ‘nu bơngai, mă lơ ‘nŏh jĭ bơngai Jơrai. Vă rim unh hnam kon pơlei tơtă tŏk iŏk jên tơ̆ Anih mong jên tơgŭm tơpôl păng Anih mong jên Agribank vă choh jang xa ngăl. Ƀok A Dit, 1 unh hnam ‘nao tŏk oei tơ̆ Pleilay, ‘nao man đang hnam đei kơjă văjê̆ 150 triu, pơma: “Inh jĭ bơngai Jarai, bơnê kơ anih mong jên asong inh tŏk iŏk jên hăm jên kon tŏ sĕt, tŏk iŏk đei 50 triu. Inh iŏk jên sir sơlŭng rong ka, vei rong pơgar ‘long chĕh phe, tiu, unh hnam nhôn đĭ da ƀiơ̆ pơmat tat ƀiơ̆ kơ adrol sơ̆ bơih. Phĕ, tĕch tiu kŭm đei jên ‘năi kơna tôch hơiă. Inh bơnê kơ anih mong jên tơgŭm ăn kon pơlei nhôn đei jên vă choh jang xa”.

Mŏ Y Cô Viên, tơ̆ plei Kep Ram, xăh Hòa Bình, plt Kon Tum đei pơgar ‘long cao su xă 2,5 ha, đei 13 tŏ bơbe, 1 ha ƀum, 8 sao chŭn na ƀa đak 2 pơyan. Đơ̆ng pơgar ‘long cao su, ƀum, bơbe, sơnăm 2022 mŏ mong đei hlŏh 80 triu hlak jên. Mŏ Y Cô Viên ăn tơbăt: Dang ei oei pơm hla ar tŏk iŏk jên tơ̆ anih mong jên 150 triu vă man anih mong tơmam păng pơm anih tĕch mơdro: “Inh tơlĕch jên pơtăm cao su, rong rơmo păng bơbe. Iŏk jên răt ‘ngiĕt ăn rơmo, vei rong rơmo, bơbe unh hnam mă ‘lơ̆ng. Mă 2 dơ̆ng inh iŏk jên man anih tĕch phŏng. Iŏk phŏng công ty hơnhăk tĕch tơ̆ âu vă kon pơlei chă răt, chơ vih vât jê̆, hiôk hian ƀiơ̆, tĕch hăm kơjă lăp ai vă kon pơlei đei phŏng vei rong 'long pơtăm. Mă 3 dơ̆ng ‘nŏh vă man anih tĕch tơmam ăn kon pơlei vă gơ̆h đei đăi 1,2 hlak.

Ƀok Nguyễn Công Thành phương, phŏ Kơdră Anih mong jên Agribank tơ̆ Kon Tum tơroi: Jên asong tŏk iŏk tơ̆ tơring kon kông oei đơ̆ng Agribank Kon Tum đei văjê̆ 650 ti, hăm hlŏh 4 rơbâu ‘nu bơngai tŏk iŏk. Vă rim kon pơlei tŏk iŏk jên, iŏk yoa jên trŏ hăm tơdrong jang ngăl kơna đei yoa ‘lơ̆ng ăn tơdrong sŭt pơđĭ pơngot, tơjur tơnuh hin: “Đei lơ khul bơngai tŏk iŏk jên âu vă pơ ‘nhŏ ăn tơdrong rong kon tơrong, rei pơtăm. Hơdai hăm tơdrong bơ̆ jang kiơ̆ trong tơgŭm asong tŏk iŏk jên hăm jên kon tŏ sĕt, Agribannk Kon Tum oei kơchăng vang jang hơdoi chă roi tơbăt dôm trong jang, tơdrong tơgŭm đơ̆ng Đảng, teh đak, ră roi dôm trong jang rơgei đei yoa, trong jang xa ‘nao vă pơm hơtŏk đon hlôh vao ăn kon pơlei kon kông”.