‘Năr 10/11/2023, Quốc hội hlôi drơ̆ng nơ̆r ăn tơdrong tơchơ̆t găh jên thu mong, tơlĕch jang kơ teh đak sơnăm 2024, kiơ̆ kơ ‘nŏh Quốc hội asong iŏk jên jang kơ teh đak bơ̆ jang 03 Tơdrong jang tơm kơ teh đak sơnăm 2023 tơmât ăn sơnăm 2024 dơ̆ng. Tơdrong dăr hơlen ăn ƀôh, tơdrong tơlĕch jên jang hiơ̆, ‘nao đei dang 15% (hơtŏ hăm 3.800 ti hlak jên). Tơdăh ưh gơ̆h pơdui jên jang đơ̆ng sơnăm 2023 ăn sơnăm 2024 ‘nŏh gô jing đei tơdrong athei hŭt lê̆ jên vă tơlĕch jang sơnăm 2023 dang 16.000 ti.

Pơma tơ̆ hop akŏm, Kơdră Quốc hội Vương Đình Huệ akhan, tơdrong akŏm jơhngâm hơmet pơ ‘lơ̆ng jên jang mă lăp mă lei athei trŏ hăm tơdrong hơgăt, ưh ăn đei tơdrong tơjră băl găh luơ̆t păng athei hơlen năng tơdrong đei ƀơm truh tơ̆ tơdrong thu mong, tơlĕch jên jang. Lơ̆m pơgê ‘năr 15/11 mơ̆n, Anih chĕp kơ̆l pơgơ̆r Quốc hội tơl tơblang, chih iŏk, hơmet ming Luơ̆t khul linh vang vei lăng sơđơ̆ng tơ̆ tơring păng tơgop nơ̆r ăn tơdrong tơjur thuê̆ hơtŏk kơjă tơmam.