Kiơ̆ Công ty tơm jang unh điên Tơring tŏk bŏk (EVNCPC), sơnăm 2024 tơdra adrol akŏm đĭ đăng kơsư̆k pơm tơlĕch unh điên gô đei 4.194 MW, tŏk hlŏh 10% pơting hăm sơnăm sơ̆. Lơ̆m pơyan tŏ hang kơnê̆ hrei ‘nâu, kơsô̆ unh điên đei iŏk yoa truh 87,6 triu kWh 1 năr. Tơ̆ hơnăp tơdrong ‘nâu, EVNCPC pơtho ăn dôm anih jang akŏm jơhngâm, tơlĕch jang mă ‘lơ̆ng dôm trong jang pơm hơtŏk tơdrong pơtruh unh điên sơđơ̆ng ‘lơ̆ng ăn tơmoi.

Kiơ̆ kơ ‘nŏh, akŏm tôch đa kơsư̆k truh 1.095 MW đơ̆ng dôm hnam kơmăy unh điên kơdâu hăm đak, tơmât unh điên măt ‘năr pơm kơpal bơbŭng hnam dang 1.970 MW, păng unh điên iŏk đơ̆ng tơlei unh điên teh đak. Anih jang unh điên dôm dêh char, plt găh Tơring Tŏk bŏk - Tây Nguyên hơtŏk hrĕnh dôm tơdrong jang ming man kiơ̆ trong tơlĕch, pơm tơjur ƀiơ̆ tơdrong kơhret hăm tơlei unh điên, kơmăy ƀiên ap oei kơdâu hrei ‘nâu. Lơ̆m khei ‘năr tŏ hang dêh hlŏh hrei ‘nâu, dôm anih jang ưh gơ̆h jang dôm tơdrong athei pơdơ̆h dăh mă tơjur unh điên; ưh kơ jô̆ hăm tơdrong athei hơmet ming unh điên cham âu to. Atŭm hăm ‘nŏh hơtŏk khul jang vă vei lăng, pơm ‘lơ̆ng, hơmet tơtom dôm tơdrong sar bar lơ̆m dang 2 jơ, jăh pơtruh dơ̆ng unh điên ăn kon pơlei yoa.