VOV4.Bahnar - Giĕng âu ki, lơ̆m hop akŏm mă 10, 1 lơ̆m dôm tơ drong gĭt kăl ‘nŏh jĭ Anih chĕp kơ̆l pơ gơ̆r Kuô̆k hô̆i tơ chơ̆t rơih 4 tơ drong vă dăr hơ len đơ̆ng Kuô̆k hô̆i, Anih chĕp kơ̆l pơ gơ̆r Kuô̆k hô̆i lơ̆m sơ năm 2023 păng tơ gop nơ̆r ăn tơ drong vă pơ gơ̆r hop akŏm mă 3, Kuô̆k hô̆i jăl 15.

Lơ̆m 4 tơ drong vă dăr hơ len sơ năm 2023, Kuô̆k hô̆i hơ len 02 tơ drong păng Anih chĕp kơ̆l pơ gơ̆r Kuô̆k hô̆i hơ len năng 02 tơ drong. ‘Nŏh jĭ: Tơ drong krao hơ vơn mong akŏm, vei lăng păng iŏk yoa jên, tơ mam pơ yoa ăn tơ drong tang găn jĭ COVID-19; tơ drong bơ̆ jang kiơ̆ trong tơ gŭm, khôi luơ̆t găh jang pơ gang tơ̆ tơ ring, jang pơ gang tang găn jĭ. Tơ drong tơ lĕch jang kiơ̆ dôm tơ drong tơ chơ̆t đơ̆ng Kuô̆k hô̆i găh dôm tơ drong jang tơm kơ tĕh đak (pơ jing tơ ring tơ rang ‘nao đơ̆ng 2021-2025, tơ jur tơ nuh hin kơ jăp ‘lơ̆ng đơ̆ng 2021-2025, atŏk tơ iung mŭk drăm tơ pôl tơ̆ tơ ring kon kông păng groi kông đơ̆ng 2021-2030). Tơ drong bơ̆ jang kiơ̆ tơ drong Tơ chơ̆t 88 sơ năm 2014, Kuô̆k hô̆i jăl 13 păng tơ drong tơ chơ̆t kơ sô̆ 51 sơ năm 2017, Kuô̆k hô̆i jăl 14 găh tơ plih ‘nao trong pơ tho, hla ar hŏk phô thŏng. Tơ drong bơ̆ jang kiơ̆ trong tơ gŭm, khôi luơ̆t găh atŏk tơ iung unh hơ yuh rơ gŏh.

Đei nơ̆r athei chih tơ mât tơ drong dăr hơ len hăm tơ drong pôk hơ tŏk, tơ plih kăn ƀô̆ bơ̆ jang đơ̆ng sơ năm 2011 truh dang ei yoa tơ drong xa pơ jĭp roi đunh roi krê; tơ drong bơ̆ jang hiơ̆ hyĭn mưh chĕp kơ̆l pơ gơ̆r, vei lăng tơ̆ 1,2 tơ ring; tơ drong chih pơ jing păng tơ lĕch trong pơ gơ̆r jang ‘lơ̆ng dăh ưh gô mơ̆ng đơ̆ng khul kăn ƀô̆ chĕp kơ̆l pơ gơ̆r ngăl. Mă lei, Tổng Thư ký Kuô̆k hô̆i Bùi Văn Cường akhan, tơ drong rơih dôm tơ drong vă hơ len năng đei bơ̆ jang kiơ̆ tơ drong hơ găt. Lăng kiơ̆ rim tơ drong đei tơ̆ yăn âu vă tơ lĕch lơ̆m dôm ‘măng apinh jet păng tơl nơ̆r apinh jet dăh mă lơ̆m tơ drong iang dăr lăng lơ̆m 1 khei ‘năr yơ ‘nŏh mă lăp ‘lơ̆ng.

Hơ drô̆ hăm nơ̆r athei dăr lăng găh tơ drong ‘mơ ‘met, tang găn pơ huach kư̆ kă, Kơ dră Kuô̆k hô̆i Vương Đình Huệ akhan: “Sơ năm yơ bơ̆n kŭm hơ len năng hla ar chih tơ roi găh tơ drong ‘mơ ‘met, tang găn pơ huach kư̆ kă. Bơ̆n dang ei oei hơ len năng mă hơ tuch găh tơ drong ‘nâu. Kơ na kơ dih kâu inh ƀôh ưh lăp hăm tơ drong hơ len năng tơ drong đĭ chih tơ roi hơ nơ̆ng lơ̆m rim sơ năm bơih. Nhen thoi tơ drong ‘mơ ‘met, tang găn pơ huach kư̆ kă sơ năm yơ kŭm đei hla ar chih tơ roi, ưh lăp chih tơ roi hŏh đĕch mă oei pơ gơ̆r pơ ma nuh tơ̆ Kuô̆k hô̆i dơ̆ng. Mưh pơ ma truh dăr hơ len ‘nŏh jĭ đei ƀơm truh tơ drong arih xa kơ kon pơ lei”.

Kiơ̆ tơ drong vă pơ gơ̆r hop akŏm mă 3, Kuô̆k hô̆i hôp hơ dai tơ̆ Hnam Kuô̆k hô̆i. Mă lei oei lê̆ hiă trong pơ gơ̆r hôp trư̆k tuyê̆n tơ dăh kăl. Jơ năr vă bơ̆ jang đơ̆ng Kuô̆k hô̆i lơ̆m hop akŏm âu ‘nŏh 20 năr. Kuô̆k hô̆i vă pơ gơ̆r đơ̆ng năr 1, ‘năr 23/5, pơ tôch lơ̆m ‘năr 17/6. Khul kơ dră tĕh đak athei kơ dŭn năr roi tơ băt tơ drong Hơ met ming Luơ̆t tĕh yoa lơ̆m khei ‘năr chih hơ met Luơ̆t ‘nâu đei ƀôh 1,2 tơ drong ‘nao kăl đei dơ̆ng jơ năr vă tơ chĕng hơ len.

Kơ dră Anih vei lăng mŭk drăm kơ Kuô̆k hô̆i Vũ Hồng Thanh ăn tơ băt: “Ƀơm truh tơ̆ Luơ̆t tĕh, nhôn oei adrin jang hơ doi hăm Anih tơm vei lăng tơ mam drăm, cham char vang truh hop akŏm, pơ ma nuh, chih hơ met tôm nơ̆r tơ gop ăn Luơ̆t tĕh. Dôm anih jang oei athei tơ lĕch lơ tơ drong jang pha ra băl ‘năi vă gơ̆h pơm ‘lơ̆ng ăn khôi luơ̆t âu. Ƀât lăp luơ̆t ‘nâu oei athei apinh nơ̆r tơ gop đơ̆ng kon pơ lei dơ̆ng. Vă gơ̆h pơm ‘lơ̆ng ‘nŏh lê̆ Khul kơ dră tĕh đak hơ met mă hơ len ‘mơ̆i păng tơ roi ăn Kuô̆k hô̆i lơ̆m ‘măng hop akŏm mă 4".

Khul kơ dră tĕh đak athei roi tơ băt ăn Kuô̆k hô̆i pơ drơ̆ng nơ̆r ăn Luơ̆t hơ met ming, chih tơ mât dơ̆ng 1,2 tơ drong lơ̆m Luơ̆t Công an kon pơ lei; tơ chơ̆t pơ dui khei ‘năr tơ mât yoa Tơ drong tơ chơ̆t 42 sơ năm 2017, Kuô̆k hô̆i jăl 14 găh trong jang pơ long năng sek tơ lang jên hre ưh kĕ kla tơ̆ dôm anih mong jên; Tơ chơ̆t găh jang pơ long năng 1,2 trong tơ gŭm gĭt kăl vă atŏk tơ iung dêh char Khánh Hòa. Tơ roi ăn Kuô̆k hô̆i vang tơ gop nơ̆r ăn 03 kơ luơ̆t: Luơ̆t Trong tĕh; Luơ̆t Vei sơ đơ̆ng tơ̆ trong gre tĕh; Luơ̆t Khul linh vang vei sơ đơ̆ng tơ̆ tơ ring. Atŭm hăm ‘nŏh tơ roi ăn Kuô̆k hô̆i tơ chơ̆t găh trong jang tơ mât jên ăn 05 tơ drong jang tih: Trong ver 4 tơ̆ Anih tơm Hà Nội; Trong ver 3 plt Hồ Chí Minh; Trong gre kơ dâu hrĕnh Châu Đốc - Cần Thơ - Sóc Trăng; Trong gre kơ dâu hrĕnh Khánh Hòa - Buôn Ma Thuột; Trong gre kơ dâu hrĕnh Biên Hòa - Vũng Tàu.

Ƀơm truh tơ drong pơ ma nuh găh tơ lĕch jang tơ drong jang pơm dơ̆ng trong Hồ Chí Minh, Kơ dră Anih jang Khoa hŏk kơ măy kơ mŏk păng cham char kơ Kuô̆k hô̆i Lê Quang Huy pơ ma truh tơ drong oei ưh kơ lăp tơ̆ yăn âu hrei ‘nâu ‘nŏh jĭ tơ drong tơ lĕch jên jang: “Jên tĕh đak tơ mât ăn tơ drong jang, 1 lơ̆m dôm tơ drong hơ găt ‘nŏh jĭ dôm tơ drong jang ‘nŏh oei jang tam kĕh, pă tŏ sĕt đĕch vă pơm hơ tŏk tơ drong đei yoa. Nhôn apinh lơ ‘măng vă jăh tơ lĕch jên jang, mă lei oei tôch hiơ̆, dang ei oei đei dang 200 km. Trong Hồ Chí Minh kơ dâu klĕch 30 dêh char. Hrei ‘nâu pă dang 200 km dơ̆ng sư tơ ƀưh hăm 9 dêh char Thái Nguyên, Phú Thọ, Hòa Bình, Hà Nội. Găh Pơ băh, Pơ mât Pơ băh ‘nŏh tơ ƀưh hăm Kiên Giang, Bạc Liêu păng Cà Mau… Nhôn tơ lĕch nơ̆r athei pơ gơ̆r pơ ma nuh, pơ ma nuh dang yơ ‘nŏh mơ̆ng khul kơ dră kơ pal tơ chơ̆t”.

Kơ dră Kuô̆k hô̆i Vương Đình Huệ athei năng kăl pơm hơ tŏk tơ drong ‘lơ̆ng đơ̆ng chih akŏm nơ̆r pơ ma, tơ gop đơ̆ng dôm bơ ngai tang măt Kuô̆k hô̆i pơ ma tơ̆ grŭp păng tơ̆ hnam hôp; jang hơ doi, hơ met mă ‘lơ̆ng rim tơ drong găh hla ar chih, roi tơ băt, dôm tơ drong kăl găh tơ mam drăm, kơ măy kơ mŏk tang găn jĭ vă hơ met ‘lơ̆ng hlŏh ăn hop akŏm.

                                               Lại Thị Hoa: Chih

Dơ̆ng: Tơ blơ̆