VOV4.Bahnar - Lơ̆m ‘măng hop akŏm mă 10 ‘nao âu đơ̆ng Anih chĕp kơ̆l pơ gơ̆r Kuô̆k hô̆i, dôm bơ ngai tang măt 1 ‘măng dơ̆ng tơ gop nơ̆r ăn Luơ̆t tang găn tĕh dong lơ̆m unh hnam (oei chih hơ met). Anih chĕp kơ̆l pơ gơ̆r Kuô̆k hô̆i drơ̆ng nơ̆r găh tơ drong kăl chih pơ jing luơ̆t, atŭm hăm ‘nŏh athei chih tơ mât tơ drong glăi tĕh dong lơ̆m unh hnam vă tơ ƀôh hơ dăh lơ̆m tơ drong areih xa, huei kơ lon tơ drong glăi, kăl loi athei hơ len năng tơ drong mĕ hle tĕh dong kon klo dăh mă klo hle ƀơ ƀrơ̆h, tĕh dong kon hơ kăn hle.  

Đơ̆ng rŏng vă jê̆ 15 sơ năm bơ̆ jang kiơ̆, Luơ̆t Tang găn tĕh dong lơ̆m unh hnam hlôi pơm tơ plih đei đon tơ chĕng, tơ gop vang vei lăng bơ ngai đei tĕh dong lơ̆m unh hnam, sek tơ lang dôm tơ drong pơm glăi luơ̆t tang găn tĕh dong lơ̆m unh hnam. Mă lei, oei đei lơ tơ drong ƀôhg tôch sơ ‘ngon, tĕh dong, ƀơ ƀrơ̆h bơ ngai lơ̆m hnam tôch hlơp, ưh ê păng hơ nat vă gơ̆h sek tơ lang kiơ̆ tơ drong hơ găt đơ̆ng luơ̆t hrei ‘nâu. Kiơ̆ tơ drong dăr hơ len lơ̆m tĕh đak đei roi tơ băt sơ năm 2020, mưh đei 3 ‘nu drŏ kăn ‘nŏh vă jê̆ 1 ‘nu bơ ngai đei klo tĕh dong, ƀơ ƀrơ̆h hơ kâu jăn. Krê loi, hlŏh 90% drŏ kăn đei klo tĕh dong, ƀơ ƀrơ̆h ưh năm chă tơ drong tơ gŭm.

Dôm nơ̆r pơ ma athei hơ tŏk dôm trong jang roi tơ ƀôh găh tang găn tĕh dong lơ̆m unh hnam; dôm trong jang roi tơ ƀôh pơm tơ plih đon păng trong tơ gŭm vei lăng, tang găn tĕh dong lơ̆m unh hnam. Atŭm hăm ‘nŏh, vă pơ tho đon, kơ luơ̆t athei chih hơ găt kiơ̆ trong mưh iŏk đei nơ̆r tơ kêng găh tĕh dong lơ̆m unh hnam ‘nŏh Công an xă gơ̆h athei bơ ngai tĕh dong hnam tơ nŏ năm tơ̆ anih Công an xă vă hơ len năng, pơm hơ dăh nơ̆r tơ kêng păng sek tơ lang tơ drong tĕh dong lơ̆m unh hnam.

Mă lei, Kơ dră Anih vei lăng tơ drong sơ đơ̆ng tĕh đak kơ Kuô̆k hô̆i Lê Tấn Tới akhan, luơ̆t âu tam mă pơ jao hơ năp jang ăn công an xăh: “Tơ drong tĕh dong lơ̆m unh hnam ‘nŏh jĭ tơ drong pơm glăi luơ̆t. Mă yoch tih, yoch iĕ dăh mă pơm glăi luơ̆t ‘nŏh công an xăh athei truh sek tơ lang. Pơ jao ăn công an xăh dăr lăng tơ drong kâm ưh ăn tơ ƀâp, pơ ma nuh…’nâu jĭ tơ drong jang trăp đei pơ jao ăn công an xăh. Chih hơ dăh công an xăh athei bơ ngai pơm glăi tĕh dong unh hnam năm tơ̆ anih vei lăng xăh. Tơ dăh 3 tơ drong ‘nâu, đe ưh chu pơm kiơ̆ ‘nŏh công an xăh pơm thoi yơ? Yoa thoi nŏh athei pơ jao hơ năp jang mă rơ đăh ăn công an xăh lơ̆m luơ̆t ‘nâu”.

Anih chĕp kơ̆l pơ gơ̆r Kuô̆k hô̆i athei chih tơ mât dơ̆ng dôm tơ drong glăi găh tĕh dong lơ̆m unh hnam vă tơ ƀôh hơ dăh lơ̆m tơ drong arih păng huei lon tơ drong glăi, mă loi jĭ kơ plăh khei ‘năr hrei ‘nâu ƀât mă tơ drong tĕh dong lơ̆m unh hnam đei năng roi krê, hăm lơ tơ drong pơ vĕr roi hlơp. Tơ drong chih hơ dăh dôm tơ drong glăi tĕh dong lơ̆m unh hnam kăl đei ƀơm truh trong tang găn, vei lăng păng tơ gŭm ăn bơ ngai răm, đei trong sek tơ lang bơ ngai tĕh dong hnam tơ nŏ.

Kơ dră tơm vei lăng pơ tho pơ hrăm Nguyễn Kim Sơn roi tơ ƀôh dôm tơ drong đei tơ pă tơ̆ yăn âu, đei năng jĭ tơ dỏng tĕh dong hŏk tro kơ tă lơ̆m unh hnam kơ dih: “Hơ dai hăm tơ drong rong ‘nŏh jĭ tơ drong pơ tho. Hŭt, kuă pơ tho păng pơ tho hil hlŏh tơ drong athei năng  jĭ tơ drong ƀơ ƀrơ̆h hăm hŏk tro ‘năi. Mă 2, pơ gŏ chă rơih hŏk tơ drong jang, tơ ƀôh tơ drong jang ưh lăp hăm đon hơ pơi ‘mĕh đơ̆ng đe ŏh. Mĕ ƀă kư̆ ‘mĕh kon hơ ‘lơ̆p jang tơ drong ưh lăp hăm đon hlôh vao, đon hơ pơi ‘mĕh đơ̆ng đe ŏh. Găh nŏh dơ̆ng, tơ drong tang găn đe ŏh pơm kiơ̆ dôm tơ drong ‘mĕh vă tôch tơ găl đơ̆ng đe sư, tơ drong ‘nâu kŭm kăl đei hơ len mă nhen ‘năi”.

Tơ̆ hơ năp tơ drong ‘nâu, Kơ dră Kuô̆k hô̆i Vương Đình Huệ athei hơ nơ̆ng chih tơ mât, pơm hơ dăh bơ ngai tĕh dong hnam tơ nŏ hăm dôm bơ ngai hlôi arih xa hơ dai hăm băl, đei khei 'năr rong 'me băl nhen “kon rong”; mĕ ƀă kuă rong kon hơ 'lơ̆p mă lei oei arih xa hơ dai; mă loi 'nŏh athei hơ len năng dôm tơ drong đơ̆ng mĕ hle tĕh dong, ƀơ ƀrơ̆h kơ kon klo dăh mă klo ƀơ ƀrơ̆h, tĕh dong kon hơ kăn hle sư: “Lăng ƀôh, băt thoi yơ, trong jang lơ liơ vă akŏm jơ hngâm bơ̆ jang. Tĕh dong băl ƀơm truh tơ drong ‘nâu tôch mơ mat. Dôm bơ ngai jang tơ̆ anih jang tư phap, khoa hŏk luơ̆t yoch tih, công an, Anih dăr hơ len, anih sek tơ lang…athei tơ chĕng hơ len dơ̆ng. Kăl loi athei tơ rĕk truh mĕ hle tĕh dong, ƀơ ƀrơ̆h kon klo. Ƀă hle dăh mă pơ yô, tam mă jing unh om mă lei ƀơ ƀrơ̆h, tĕh dong kon hơ drô̆ kăn sư. Inh ƀôh lơ̆m luơ̆t ‘nâu, hơ pơi ‘mĕh chih hơ dăh dôm tơ drong ‘nâu”.

        Lại Thị Hoa: Chih

Dơ̆ng: Tơ blơ̆