VOV4.Bahnar - Pơ gê ‘năr 21/4, ‘măng hop akŏm mă 10 kơ Anih chĕp kơ̆l pơ gơ̆r Kuôk hô̆i tơ gop nơ̆r lơ̆m Hla ar chih ming Luơ̆t Khăm jĭ, hơ met jĭ. Pơ ma tơ̆ jơ hop akŏm, Kơ dră Kuôk hô̆i Vương Đình Huệ hơ len lăng hla ar chih ‘măng âu hlôi đei chih iŏk, chih pơ keh lơ tơ drong gĭt kăl, kŭm nhen  tơ roi đei lơ tơ drong ‘nao đei ƀôh kiơ̆ yan âu tang găn jĭ hơ buh âu ki, tơ ƀôh tơ drong hơ drin đơ̆ng Khŭl kơ dră teh đak păng Anih tơm vei lăng găh jang pơ gang. Hla ar chih ming luơ̆t đei tôm gơh pơ truh ăn Kuôk hô̆i ăn tơ gop nơ̆r tơ̆ ‘Măng hop akŏm mă 3.

Kơ dră Kuôk hô̆i Vương Đình Huệ pơ ma tơ̆ jơ hop akŏm

Ƀok Vương Đình Huệ kŭm pơ ma hơ dăh, luơ̆t hơ met ming ‘măng âu kăl vei sơ đơ̆ng đei ‘meh vă vei lăng bơ ngai jĭ, vei lăng khŭl jang pơ gang kŭm nhen tơ roi rơ đăh tơ drong jang khăm hơ met jĭ; trong jang ‘lơ̆ng tôm ƀiơ̆ trong jang vang tơ gop đơ̆ng tơ pôl lơ̆m khăm hơ met jĭ. Athei hơ met pơ ‘lơ̆ng đei tơ drong iŏk yua kơ măy kơ mŏk, ki thuơ̆t ‘nao, tŭn kơ jă pơ vih pơ văn khăm hơ met jĭ tŏk lơ dêh hnang pơ têng hăm tơ drong kĕ kla đơ̆ng lơ kon pơ lei.

Thuem: Tơ blơ̆