Kơdră Anih vei lăng muk drăm Vũ Hồng Thanh akhan, tơdrong athei tĕch, răt tĕh, hnam hăm kơmăy đei lơ tơdrong krê, hơmơt đei tơdrong pơgâm luơ̆t vă găn đĭ tơdrong jang xa tĕch mơdro nai, iŏk pơ ‘nhŏ pơ đĭ ăn 1 păh mưh chă tĕch mơdro, ƀơm ưh ‘lơ̆ng truh tơdrong roi tơbăt rơđăh rơđong tơdrong tĕch mơdro păng tơdrong đei yoa đơ̆ng dôm pang mưh tĕch mơdro hnam, tĕh. Yoa tơpă tơ̆ yăn âu, đei ƀôh tơdrong anih tĕch mơdro tĕh mât mĭnh ƀơ̆r đon hăm băl, yoa vă đei xa lơ kơna pơm tơlĕch tơdrong tơsŭl tơsăl tơ̆ anih tĕch mơdro, ưh đei roi tơƀôh trŏ tơdrong ‘mĕh tĕch, ‘mĕh răt păng kơjă tĕh, hnam.

Dôm bơngai tang măt athei tơchĕng hơlen găh tơdrong kăl chih tơlĕch tơdrong hơgăt ăn rim tơdrong tĕch mơdro kiơ̆ anih chă tĕch tĕh, hnam oei. Tổng Thư ký, Kơdră Anih pơvih ăn Kuô̆k hô̆i Bùi Văn Cường đei nơ̆r pơma: “Tơdrong hơgăt tơm vă chih hơdăh tơdrong tĕch mơdro tĕh, hnam oei hăm tơdrong ming man, tĕch mơdro hnam, tĕh vă tĕch hơlơ̆k dơ̆ng, mă ưh kơ đei iŏk yoa sư. Mă lei, tơdrong vă băt ưh kơsĭ vă oei mă vă tĕch ‘nŏh tam mă chih hơdăh. Yoa thoi nŏh jing tôch mơmat vă gơ̆h băt đe răt hnam vă oei dăh mă tĕch mơdro hơlơ̆k dơ̆ng. Kơlih thoi nŏh athei tơchĕng mă hơlen dơ̆ng”.

Kơdră Anih bơ̆ jang ăn bơngai tang măt, yă Nguyễn Thị Thanh roi tơbăt tơdrong đei ƀôh tơ̆ dôm tơring, tơdrong jang đơ̆ng dôm anih tĕch mơdro tĕh, hnam oei ưh kơ lơ mă lăp athei pơgơ̆r chă rơih kơjă tĕch mă lăp hăm tĕh đĕch. Pơma truh tơdrong “bơngai pơdro tĕh” tôch jĭ kăl tơ̆ tơring, yă Nguyễn Thị Thanh athei chih hơdăh bơngai yơ răt tĕh vă pơdro hăm bơngai răt tĕh yoa kăl tơpă. Atŭm hăm ‘nŏh athei đei tơdrong drơ̆ng nơ̆r lơ̆m hla ar chih pơkăp tơdrong tĕch mơdro tĕh, hnam oei: “Tơroi răt tĕh ‘nŏh vă man hnam tĕch dơ̆ng. Đơ̆ng rŏng kơ man đang ‘nŏh tĕch hnam ăn tơpôl. Mưh bơngai răt, răt đei tĕh ‘nŏh đe ưh đei pơm kiơ̆ hla ar chih vă man hnam tĕch ăn tơpôl, tơtă druh kiơ̆ 1 tơdrong hơgăt đơ̆ng Luơ̆t tĕh, đe chĕng pơm lơ lô đang kơ ‘nŏh tĕch. Nhôn akhan tơdrong ‘nâu sư pơvĕr luơ̆t, ƀât vă răt pơma pha, răt đang jang tơ̆ nai dơ̆ng”. ‘Nâu jĭ 1 tơdrong đei ƀơm truh tơdrong kăl đei drơ̆ng nơ̆r păng chih tơmât hrơ̆ch ‘lơ̆ng lơ̆m dôm kơ luơ̆t đei ƀơm truh tơ̆ tĕh”.

Kơdră Kuô̆k hô̆i Vương Đình Huệ pơma hơdăh: tĕch mơdro tĕh, hnam oei ‘nŏh jĭ 1 lơ̆m dôm tơdrong jang pơm ‘lơ̆ng ăn tơdrong jang tŏk mŭk drăm. Tơdrong chih hơmet ming Luơ̆t tĕch mơdro tĕh, hnam oei ‘nŏh tôch kăl mă lei tôch pơmat tat, athei ‘moi kiơ̆ tơ̆ yăn âu vă pơm lăp hăm tơdrong ‘mĕh vă, vĕh ver tơdrong hơmet đang bơih mă ưh đei sek tơlang tơdrong kiơ, dăh mă pơm tơlĕch dơ̆ng dôm tơdrong tơhlăk ‘nao dơ̆ng: “Tih hlŏh lơ̆m tơdrong atŏk tơiung anih tĕch mơdro tĕh, hnam oei ‘nŏh jĭ tơdrong chĕng hơmet păng tơprŏh trong jang. Ƀơm truh trong iŏk yoa tĕh, tưk tơiung dôm tơdrong jang, hơmet ming anih tĕch mơdro. Tơdrong mă bơ̆n oei kơƀăh hlŏh jĭ tơdrong chĕng hơmet, tơprŏh trong jang kiơ̆ khei ‘năr. Bơ̆n chĕng hơmet kiơ̆ groi tĕh. Tơdăh lơ̆m 1 khei ‘năr đei lơ tơdrong jang ‘nŏh tơdrong tĕch lơ hlŏh kơ tơdrong chă răt, lơ tĕh, hnam tĕch ưh kơ đei. Tơdrong hơmet ming kăl đei bơ̆ jang hăm anih tĕch mơdro, anih jang xa, tĕh, hnam hai păng athei đei kiơ̆ trong tơprŏh jang, inh ƀôh tơdrong ‘nâu tam mă pran ‘lơ̆ng kiơ”.