Bí thư Trung ương Đảng, Kơdră Anih Trung ương MTTQ Việt Nam Đỗ Văn Chiến tơroi: Bơngai tăh hla păng kon pơlei tơƀôh đon lui hăm dôm tơdrong iŏk đei tôch gĭt kăl lơ̆m tơdrong jang tơiung pơjing păng hơmet ming Đảng mă loi jĭ hăm tơdrong tang găn xa pơjĭp, pơm glăi đei nơ̆r pơtho athei bơ̆ jang tôch pran, ƀơ̆r pơma tơ ‘ngla jang hloi, ưh đei lon bu. Lơ nơ̆r pơma đơ̆ng bơngai tăh hla hơpơi ‘mĕh đei trong jang lăp ‘lơ̆ng, gơ̆h jang kiơ̆, vei lăng sơđơ̆ng ‘lơ̆ng vă jang atŏk tơiung tĕh đak hai, athei hơnơ̆ng chih răk nơ̆r pơma apinh đơ̆ng kon pơlei hăm Luơ̆t tĕh (oei hơmet ming), Luơ̆t tĕch mơdro tĕh, hnam (oei hơmet ming), Luơ̆t hnam oei (tŏk bŏk chih hơmet ming) hai... mă loi jĭ dôm tơdrong tơgŭm vă jang atŏk tơiung mŭk drăm, tơpôl:

“Hăm tơdrong jang atŏk tơiung mŭk drăm, tơpôl tơ̆ tơring kon kông păng groi kông. Dôm tơdrong tơgŭm tơpăt ăn kon pơlei găh tĕh oei, tĕh choh jang xa, đak yoa mă trŏ ‘nŏh athei iŏk jên đơ̆ng tơdrong jang, bơ̆n tơtă tơmât lơ̆m jên vă jang kơ tĕh đak. Thoi nŏh athei bơ̆ jang kiơ̆ trong tơlĕch jên jang đơ̆ng tĕh đak kơna jing ưh gơ̆h tơlĕch. Mă 2 dơ̆ng, hrei ‘nâu đei tơring tôch pơmat tat lơ̆m tơdrong tơmât hơdai tơdrong jang vă akŏm jên. Tơmât hơdoi jên jang pơma thoi nŏh đĕch, mă lei ưh đei nơ̆r pơtho yơ găh tơmât hơdai jên jang vă gơ̆h đei yoa ‘lơ̆ng hlŏh kơna đei tơring oei tơhlăk tăk”.

Đơ̆ng tơpă tơ̆ yăn âu tơ̆ dôm tơring, anih jang, bơngai tăh hla apinh Đảng păng tĕh đak pơtho ăn dôm anih jang kơpal tơchĕng hơlen, tơlĕch hla ar hơgăt luơ̆t vă tang găn, hơmet pơ ‘lơ̆ng tơdrong 1 kơsô̆ kăn ƀô̆, bơngai jang kơ tĕh đak, bơngai jang kơpal tơtŭn băl tơdrong jang, kuă jang, hli pŭ iŏk hơnăp mưh ưh kơlăp, “vei sơđơ̆ng ăn kơdih hlŏh tơdrong”, ưh pơ̆n sek tơlang, pơm hiơ̆ hyĭn, ƀơm kơnê̆ truh tơdrong jang xa, tĕch mơdro đơ̆ng anih jang păng tơdrong arih xa kơ kon pơlei.

Tơgop nơ̆r găh tơdrong ‘nâu, Kơdră Anih vei lăng mŭk drăm kơ Kuô̆k hô̆i Vũ Hồng Thanh pơma hơdăh: “Lơ̆m hla ar chih tơroi đơ̆ng Mặt trận ‘nŏh kŭm ƀôh đei đon hli pơngơ̆t pŭ iŏk hơnăp jang mưh jang ưh kơlăp, tơtŭn băl bơ̆ jang. Ƀât mă 1 tơdrong adrol ki kư̆ đei lơ anih jang drơ̆ng nơ̆r ‘nŏh gơ̆h jang hloi. Mă lei dang ei lăp 1 naih jang ưh drơ̆ng nơ̆r đĕch athei chă iŏk nơ̆r pơma păng pơm ming hla ar kơna jing hiong lơ jơnăr, jên jang tŏk hlŏh dơ̆ng.”

Phŏ Kơdră chĕp kơ̆l Kuô̆k hô̆i Trần Thanh Mẫn tơtă: hla ar chih tơroi tơƀôh hơdăh nơ̆r pơma đơ̆ng bơngai tăh hla păng kon pơlei, athei hơmet ming dôm tơdrong găh tơjur ƀiơ̆ tơdrong jang tŏk, ưh jăh kĭ ăn trong tơprŏh jang, hơmet ming trong pơm hla ar vei lăng, hơmet pơ ‘lơ̆ng anih tơmât jên jang xa, tĕch mơdro vă hơmet pơ ‘lơ̆ng hla ar chih tơroi: “Kiơ̆ đơ̆ng tơƀâp bơngai tăh hla, inh ƀôh lơ tơdrong pơm glăi đơ̆ng rim anih khăm hơlen gre lơ̆m tĕh đak ‘nŏh lơ̆m hla ar tơroi athei chih tơmât hai. Mă 2, tơdrong tĕch mơdro, răt yoa, chơ chuĕn ma túy dang ei ưh pă kiơ̆ trong tĕh đĕch bơih mă kiơ̆ trong gre păr hai, tôch kơhlơp. Công an plt Hồ Chí Minh hlôi tơkêng tơdrong yoch păng tơkêng dôm jĭt ‘nu bơngai.”

Hơlen năng hla ar chih găh tơdrong hơpơi ‘mĕh đơ̆ng kon pơlei kơ Kuô̆k hô̆i khei 4/2023, Anih chĕp kơ̆l pơgơ̆r Kuô̆k hô̆i oei chih hơdăh, kiơ̆ đơ̆ng dăr hơlen ăn ƀôh, lơ̆m 18 sơnăm đơ̆ng sơnăm 2003 truh sơnăm 2021, Anih ƀao hiêm tơpôl tơ̆ tơring hlôi thu glăi jên athei răt ƀao hiêm, hlôi đei hlŏh 4 rơbâu tơ ‘ngla unh hnam tĕch mơdro kơ dih đei thu glăi. Kơ dră Anih chih akŏm tơdrong hơpơi ‘mĕh đơ̆ng kon pơ lei Dương Thanh Bình pơma hơdăh: “Yoa tơdrong athei răt ƀao hiêm tơpôl ưh trŏ hăm tơdrong hơgăt đơ̆ng luơ̆t kơna dôm tơ ‘ngla unh hnam tĕch mơdro, lơ bơngai tam mă đei jô̆ trŏ sơnăm nôp ƀao hiêm tơpôl vă gơ̆h xa jên tơgŭm, ƀao hiêm tơpôl, mă loi đei lơ bơngai nôp ƀao hiêm tơpôl vă jê̆ 20 sơnăm bơih, tơdrong ‘nâu pơm ăn kon pơlei tôch tơtŏ đon. Đei bơngai hlôi pơm hla ar tơkêng, athei tơchĕng hơlen, lăng dơ̆ng rim tơdrong, sek tơlang mă kĕh rim nơ̆r pơma athei đơ̆ng bơngai tăh hla”.

Kơdră Kuô̆k hô̆i Vương Đình Huệ kŭm pơma truh lơ tơdrong tam mă ‘lơ̆ng, tam mă lăp găh trong jang jên hu, tĕch mơdro tĕh, hnam oei đei bơngai tăh hla pơma tơlĕch lơ̆m dôm ‘măng tơƀâp, athei Khul kơdră tĕh đak hơlen năng mă ‘lơ̆ng hlŏh dơ̆ng lơ̆m sơnăm 2023, tơblang hơdăh yoa kiơ vă đei trong sek tơlang tơtom. Lơ̆m nŏh, pơgơ̆r jang tơlĕch jên jang mă lăp; akŏm jơhngâm hơmet ming trong pơm hla ar vei lăng, hơmet pơ ‘lơ̆ng anih tơmât jên jang xa, tĕch mơdro, vei kơjăp đon bơ̆ jang pơm hla ar, bơ̆ jang ăn tĕh đak. Atŭm hăm ‘nŏh athei hơlen năng, kơchăng tơlĕch trong tơjră, tang găn ‘lơ̆ng tơdrong jĭ Covid-19.