Hăm hơnăn “Tơdrong jang ‘mêm bơnat – Asong tơdrong ‘mêm kơ-eng”, khei jang ‘mêm bơnat đei pơgơ̆r lơ̆m khei 4 âu kơnh tơ̆ 3 dêh char Thái Nguyên, Sơn La, Điện Biên. Dôm tơdrong jang hơdah nhen: plang hlôt nhang ƀlŏk tơbăt kơ đe linh lôch tang tơ̆ dôm anih gru grua kơ hnưr hơrih kăch mang; plang pham ‘mêm kơ-eng; tơroi khăm hơlen, asong pơgang hơmet jĭ ăn hloh 7.000 ‘nu bơngai đei tơdrong hơrih tơnap tap; pơjao trong pơm jang ăn 70 unh hnam hin dơnuh kơ dêh char Điện Biên; Kơchơ ‘Mêm bơnat asong kơphĭu răt tơmam ăn 700 ‘nu bơngai hin dơnuh, bơngai đei tơdrong hơrih tơnap tap.

Yă Bùi Thị Hòa, Kơdră Anih jang ‘Long pơglang brê Việt Nam ăn tơbăt, Khei jang ‘mêm bơnat sơnăm âu, Jơnŭm jang hơdrin hơvơn đei jên jang truh 400 tih hlj vă tơlĕch dôm tơdrong jang lơ̆m Khei jang ‘mêm bơnat.