Kơsô̆ jên tơgŭm noh 350 rơtuh hlj, iŏk đơ̆ng mong tơgŭm tơpôl kơ Anih jang Unh hơyuh tơring Tŏk bŏk păng PC Đăk Nông. Atŭm hăm tơdrong tơgŭm man hnam, Anih jang adoi dui tơlei unh hơyuh truh tơ̆ hnam păng răt axong ăn rim unh hnam minh ƀar tơmam drăm kăl lơ̆m unh hnam nhen tivi, gŏ pai por hăm unh hơyuh, hla pơi kơdâu hăm unh hơyuh...

Đei băt khei năr âu ki, Anih jang Unh hơyuh Đăk Nông hlôi hăt hot tơlĕch jang dôm tơdrong jang tơgŭm tơpôl, tơrĕk hăm tơpôl. Lơ̆m 5 xơnăm tơjê̆ âu, Anih jang hlôi tơgŭm man 21 tŏ hnam ‘mêm kơ eng; chă hơmet ming dôm tơmam yua hăm unh hơyuh, tơplih trong tơlei chô̆ đơ̆ng rŏng kơ kŏng tơ tơgŭm unh hnam hin dơnuh, unh hnam mă teh đak tơchơ̆t tơgŭm; axong tơmam drăm yua hăm unh hơyuh ăn dôm hnam trưng hŏk; chă pơlăp chô̆ kơƀŏng unh tơ̆k hơdăh ăn dôm jăl trong vih vơ̆t lơ̆m pơlei pơla... hăm kơsô̆ jên hloh 3,4 rơtăl hlj.