VOV4.Bahnar - Tơ drong vang tơ gop jên tơ gŭm băl tŏk klăih đơ̆ng mơ mat tat tơ̆ Anih chĕp kơ̆l pơ gơ̆r khul linh xăh Hoà Phú, plt Buôn Ma Thuột, dêh char Dak Lak dôm sơ năm âu ki iŏk đei lơ tơ drong ‘lơ̆ng. Đơ̆ng anih mong jên âu, đe linh dân quân vang tơ gŭm băl jang tŏk mŭk drăm unh hnam, pơm sơ đơ̆ng tơ drong arih xa, sơ đơ̆ng jơ hngâm bơ̆ jang.

Jĭ bơ ngai jang chĕh phe păng tiu, tơ ƀâp mơ mat tat yoa ‘long kră păng kơ jă jur, ‘nhŏng Phan Sự tơ̆ thôn 1, xăh Hoà Phú hlôi đei đon tơ chĕng vă tĕch hnam năm tơ̆ Bình Dương pơm công nhân. Mă lei, kơ sô̆ jên tŏk iŏk đei 20 triu đơ̆ng anih mong jên dân quân xăh sơ năm 2016, tơ gŭm ‘nhŏng đei dơ̆ng kon jên vă hơ met ming pơ gar hnam xă hlŏh 1 ha. ‘Nhŏng Sự pơ̆n buch hŭt chĕh phe păng tiu, chă pơ tăm dơ̆ng gao xiêm, mit thái; man hơ drong nhŭng vă rong nhŭng lai hơ ke. Tơ drong rong kon tơ rong hiôk hian, ‘long pơ tăm jing ‘lơ̆ng, kơ na mŭk drăm lơ̆m hnam roi đunh roi tŏk: “’Nhŏng ŏh tơ gŭm asong tŏk iŏk 20 triu, đơ̆ng kơ sô̆ jên âu inh răt nhŭng yŏng rong, rong đunh jing lơ. Đơ̆ng nŏh inh rong lơ nhŭng yŏng, dang ei đei 6 tŏ nhŭng yŏng bơih, 1 sơ năm nhŭng yŏng su 2 vât, đei đơ̆ng 100 - 150 tŏ nhŭng kon. Ba tĕch ƀơt nhŭng kon iŏk jên man dơ̆ng hơ drong vă rong roi lơ, hrei ‘nâu đei iŏk yoa tôch sơ đơ̆ng, hlŏh 200 triu 1 sơ năm”.  

‘Nhŏng Sự vei rong nhŭng lai hơ ke

Ưh lăp tơ gŭm băl jang xa đĕch, Anih mong jên dân quân đơ̆ng Anih chĕp kơ̆l pơ gơ̆r khul linh xăh Hoà Phú oei tơ gŭm ăn lơ unh hnam mơ mat tat, ưh kơ pŭn ai hai. ‘Nhŏng Nguyễn Đăng Huỳnh, Phŏ Kơ dră Anih chĕp kơ̆l pơ gơ̆r khul linh xăh Hoà Phú ăn tơ băt: tơ dăh ưh đei ‘nhŏng ŏh tơ gŭm băl, ‘nhŏng đĭ apinh pơ dơ̆h bơih, chă tơ drong jang nai dơ̆ng yoa kon hơ ‘lơ̆p hơ nơ̆ng jĭ jăn, oei mŭk drăm lơ̆m hnam ‘nŏh tôch mơ mat tat: “Inh đei 2 ‘nu kon, kon kơ dră ưh pŭn jĭ plei nuih. Lơ̆m khei ‘năr ‘nŏh ‘nhŏng ŏh vang tơ gop asong ăn inh tŏk iŏk 40 triu vă răih hơ met jĭ ăn kon păng asong inh tŏk iŏk dơ̆ng 20 triu vă jang xa. Anih mong jên tơ gŭm ăn inh tŏk klăih đơ̆ng mơ mat tat, kon inh dang ei pran jăng bơih”.  

‘Nhŏng Nguyễn Văn Tuyển, Kơ dră Anih chĕp kơ̆l pơ gơ̆r khul linh xăh Hoà Phú, bơ ngai jang lơ̆m grŭp tơ gop jên ăn tơ băt: Anih mong jên đei trong jang xa tôch rơ đăh kơ na bu bu kŭm ‘mĕh mât jang ngăl. Rim khei, rim bơ ngai kiơ̆ đơ̆ng kơ dih kâu đei vang tơ gop đơ̆ng 200 rơ bâu truh 500 rơ bâu. Unh hnam mơ mat tat đei tơ gŭm tŏk iŏk tŏ sĕt hlŏh ‘nŏh 10 triu hlak jên, lơ hlŏh ‘nŏh 100 triu. Anih mong jên hơ nơ̆ng tơ gŭm ăn bơ ngai mơ mat tat tŏk iŏk jên: “Jên hơ păh ăn ‘nhŏng ŏh tŏ sĕt đĕch, ưh kơ măh vă rong ‘me unh hnam, ƀao hiêm y tê̆ ưh đei. Kŭm đei lơ bơ ngai mơ mat tat, klo kăn hle. Nhôn pơ jing anih mong jên âu vă tơ gŭm băl tŏk klăih đơ̆ng mơ mat tat păng vei sơ đơ̆ng jơ hngâm đon bơ̆ jang. Vă ‘nhŏng ŏh lui, chă iŏk mơng jên đơ̆ng anih mong jên âu huei kơ tŏk iŏk tơ̆ ‘ngoăih, jên kon lơ dăh mă ƀât tŏk iŏk jên tơ̆ anih mong jên truh năr kla mă lei ưh tam pơ pơ̆ đei jên ‘nŏh tŏk iŏk đơ̆ng âu. Tơ dăh ưh đei jên âu ‘nŏh lơ bơ ngai gô pơ dơ̆h jang”.

Anih mong jên dân quân tơ gŭm ăn dôm bơ ngai jang, janmg atŏk tơ iung mŭk drăm

Kiơ̆ ƀok Nguyễn Hữu Toàn, Kơ dră vei lăng kon pơ lei xăh Hoà Phú: đơ̆ng đei kơ sô̆ jên mong âu, dôm bơ ngai jang đei jên jang xa, rong kon tơ rong, nhŭng iĕr, rơ mo, pơ tăm ‘nhot rơ gŏh, jang pơ gar, pơih anih tĕch mơ dro iĕ, pơm hơ tŏk iŏk yoa, hơ met ‘lơ̆ng tơ drong arih, dar dĕh tŏk klăih đơ̆ng tơ nuh hin: “Kơ sô̆ jên ‘nâu đei vei lăng tôch rơ đăh rơ đong. Dôm bơ ngai mơ mat tat đei asong tŏk iŏk jên vă tơ gŭm băl jang xa, pơ jing mŭk drăm lơ̆m hnam. Đang kơ ‘nŏh dôm bơ ngai năm pơm linh 2 sơ năm đei vih dơ̆ng tơ̆ pơ lei mă tam mă đei tơ drong jang ‘nŏh kŭm đei tơ gŭm tŏk iŏk jên vă jang xa ‘năi. Đang kơ ‘nŏh anih chĕp kơ̆l khul linh xăh vang jang hăm đe druh dăm, jang hăm khul kơ dră tơ ring chă pơ ma nuh hăm tơ ring jang kơ măy, roi tơ băt bơ ngai jang ăbn dôm hnam kơ măy”. 

Anih mong jên Dân quân xăh Hoà Phú đei pơ jing păng bơ̆ jang đơ̆ng sơ năm 2016 hăm 20 ‘nu bơ ngai jang. Đơ̆ng rŏng 7 sơ năm, dôm bơ ngai jang vang tơ gop ăn anih mong jên hlŏh 360 triu. Kiơ̆ đơ̆ng anih mong jên âu, dôm bơ ngai jang đei tŏk iŏk vă jang xa, tĕch mơ dro. Tơ drong arih xa roi đunh roi sơ đơ̆ng tơ gŭm ăn dôm bơ ngai jang sơ đơ̆ng jơ hngâm bơ̆ jang tơ drong jang đơ̆ng anih jang kơ pal pơ jao. 

Tuấn Anh: Chih

Dơ̆ng: Tơ blơ̆