Vă kơchăng tơjră hăm tơdrong kơhret đơ̆ng kơjă tơmam roi tŏk, Khul kơdră teh đak, Thủ tướng teh đak, Phó Thủ tướng – Kơdră Anih pơgơ̆r vei lăng kơjă pơtho ăn dôm anih tơm, anih jang kơpal, tơring tơrang pơgơ̆r bơ̆ jang mă ‘lơ̆ng dôm trong jang mŭk drăm lơ̆m teh đak kŭm nhen vei măh mah mai dôm tơmam yoa păng tơmam vă pơ ‘nhŏ ăn tơdrong jang xa.

Phó Thủ tướng Lê Minh Khái pơma hơdăh: Vă bơ̆ jang đei tơdrong jang đơ̆ng Quốc hội tơlĕch, tơdrong vei lăng kơjă lơ̆m sơnăm 2024 kăl đei bơ̆ jang mă ‘lơ̆ng hlŏh dơ̆ng, tơdra mă trŏ hăm yăn âu, bơ̆ jang mă kơchăng, hơbĕch hơbal, vei lăng ‘lơ̆ng ưh ăn kơjă tơmam tŏk hlŏh tơdrong kiơ̆ tơdrong hơgăt đơ̆ng Quốc hội. Phó Thủ tướng Lê Minh Khái tơtă, đơ̆ng ‘năr 1/7/2024 vă hơtŏk jên khei, hơdai hăm ‘nŏh jên asong tŏk iŏk kŭm tŏk kiơ̆, lơ tơdrong ưh gơ̆h băt hơdrol nhen kơjă jur tŏk hăm 1,2 tơmam yoa kăl, yoa thoi nŏh athei tơdra mă trŏ hăm yăn âu, athei kơchăng tôch ai, ưh gơ̆h lăng pơhơi, hơmet hiă rim trong jang vei lăng mă lăp, tơtom, đei yoa.