Ƀô̆ trương Anih tơm Pơtho Pơhrăm sơkơ̆t, Anih jang Pơtho Pơhrăm Đăk Nông hlôi đei jơnei kăp gĭt lơ̆m sơnăm hŏk âu ki, tơgop roi năr roi đei jơnei lơ̆m tơdrong jang hơtŏk pơtho pơhrăm kơ tơring Tây Nguyên păng jâ̆p teh đak. Ƀô̆ trương Nguyễn Kim Sơn adoi tơbang hơdah minh ƀar tơdrong oei tơjruh mă dêh char Đăk Nông kăl tơrĕk hơmet.

Dang ei jâ̆p dêh char tŏk bŏk oei kơƀah 1.021 bơngai pơtho tơ̆ dôm jăl hŏk pơtêng hăm sơkơ̆t tơlĕch. Vă tơlĕch jang đei jơnei sơnong jang kơ sơnăm hŏk ‘nao 2023-2024, Ƀô̆ trương Nguyễn Kim Sơn pơkăl, dêh char Đăk Nông akŏm pơgơ̆r păng jang tơnăp minh ƀar trong jang nhen: tơrĕk asong jang lơ hloh ăn pơtho pơhrăm tơring ataih yaih, tơring kon pơlei kon kông; asong bơngai pơtho tôm mah kơsô̆, drơ̆ng minh gah trong pơm jang; hơtŏk pơ-‘lơ̆ng hnam trưng lăm hŏk; hơtŏk pran pơtho pơhrăm lơ̆m tơpôl.