Kiơ̆ nơ̆r tơroi tơ̆ jơ pơm lêh, jen vă man 1.200 tŏ hnam ăn unh hnam tơnuh pơhlom dang 96 ti. 4 anih mong jên đei Agribank, Vietcombank, Viettinbank păng BIDV tơgŭm 60 ti, oei đei dơ̆ng ‘nŏh yoa khul linh Công an tơgop tơgŭm.

Truh akŏm păng pơma tơ̆ jơ pơm lêh, Thượng tướng Lương Tam Quang, Phŏ Kơdră tơm vei lăng Công an, bơnê kơ dôm anih tơgŭm vang yak hơdoi, tơgŭm jên vă man hnam ăn dôm unh hnam, tơnuh, pơmat tat găh hnam oei tơ̆ dêh char Đắk Lắk. Thượng tướng Lương Tam Quang pôk pơ ư Công an dêh char păng khul kơdră tơring lơ̆m khei ‘năr ưh kơ đunh đĭ man đei 2 tŏ hnam hơpăh ăn 2 unh hnam pơmat tat găh hnma oei tơ̆ apŭng Cư M’gar păng athei Công an dêh char Đắk Lắk, dôm anih jang ming man tơlĕch jang hrơ̆ch ‘lơ̆ng, man dơ̆ng 1.198 tŏ hnam oei đei, man mă kơjăp păng athei man đang adrol kơ ‘năr 31/10 sơnăm ‘nâu.