VOV4.Bahnar - ‘Năr 29/8, Anih tơm vei lăng găh pơ tho pơ hrăm đei hla ar gơih ăn Kơ dră chĕp kơ̆l Anih vei lăng pơ tho pơ hrăm dôm dêh char, pơ lei tơm găh tơ drong tơ lĕch jang 1,2 tơ drong jang blŭng sơ năm hŏk 2022-2023. Mĭnh lơ̆m dôm tơ drong jang mă Anih tơm vei lăng găh pơ tho pơ hrăm athei dôm hnam trưng ‘noh jĭ bơ̆ jang kiơ̆ ƀlep tơ drong hơ găt găh vei lăng iŏk, tơ lĕch păng roi tơ băt hơ dăh dôm jên iŏk, tơ lĕch blŭng sơ năm hŏk ‘nao. Anih tơm kŭm athei rim Anih vei lăng găh pơ tho pơ hrăm pơ gơ̆r jang kiơ̆ tơ drong jang tơm sơ năm hŏk 2022 - 2023, hăm hơ năn sơ năm hŏk ‘noh jĭ “ Tơ goăt 1 jơ hngơ̆m đon, hơ gei, khŏm jang đang ‘lơ̆ng dôm hơ năp jang păng tơ drong hơ găt tơ plih ‘nao, hơ met ming păng hơ tŏk ‘lơ̆ng pơ tho pơ hrăm”. Kơ chăng dăr hơ len, hơ met ming hnam trưng, lăm hŏk, thây kô pơ tho, bơ ngai jang lăp hăm tơ drong yan âu kơ tơ ring păng biên chế đei pơ jao kiơ̆ tơ drong hơ găt. Rim anih vei lăng găh pơ tho pơ hrăm athei pơ gơ̆r rim hnam trưng tơ lĕch jang trong jang vei sơ đơ̆ng hnam trưng hŏk, lơ̆m noh tơ rĕk truh dôm trong jang kơ chăng tang găn đei yua hăm tŏ ‘mi kial, jĭ COVID-19 păng dôm tơ drong jĭ hơ buh nai.

Thuem: Tơ blơ̆