VOV4.Bahnar - Năr 16/3, ‘Măng apĭnh hơlen mă blŭng đơ̆ng Dơnŏ anĭh chĕp pơgơ̆r Kuô̆k hô̆i jăl XV hlôi đei pơgơ̆r hăm dôm tơdrong apĭnh Kơdră Dơnŏ anĭh tơm vei lăng Mơdro sa Nguyễn Hồng Diên tăp dăr tơdrong vei lăng tĕch răt păng kơ jă đak xăng đak dau, minh tơmam drăm kăl hlŏh trŭh tơdrong jang sa pơma atŭm.

Kơdră chĕp pơgơ̆r Nguyễn Hồng Diên tơbăt: Lơ̆m tĕh đak đei 17.000 hơnĭh tĕch mơdro đak xăng đak dau, khŭl bơ̆ jang hlôi dăr lăng 16.800 hơnĭh tĕch mơdro, hlôi xek phak, ƀô̆h 211 hơnĭh tĕch mơdro pơdơ̆h tĕch mơdro. Găh tơdrong tơm pơm ăn, găh lơ pơdơ̆h tĕch mơdro kơ yuơ vă ming hơmet, đei mĭnh ƀar hơnĭh tĕch đak xăng đak dau đĭ đak xăng đak dau kơ yuơ hơnĭh tĕch ăn đak xăng đak dau đơ̆ng Hnam kmăi hlŏng rơgŏh đak dau Nghi Sơn pơdơ̆h ư̆h kơ tom băt. Adoi tơbăt, Dơnŏ anĭh tơm vei lăng Mơdro sa hlôi xek tơlang kơ hret tơdăh ƀô̆h răk mong vă tĕch măt hlŏh dơ̆ng. Dang ei, Dơnŏ anĭh tơm tok bŏk jang dăr lăng 33 Dơnŏ anĭh mơdro sa, ư̆h kơ đei chă dŏng ôn. Rim kơdră apĭnh hơlen Dơnŏ anĭh tơm vei lăng Mơdro sa hăm đei trong jang ayơ vă pơm tơjur kơ jă đak xăng đak dau, hơmet pơ ‘lơ̆ng tơnap tap lơ̆m pơm tơlĕch, tĕch mơdro, Kơdră chĕp pơgơ̆r Dơnŏ anĭh tơm vei lăng Mơdro sa akhan, tơdrong au gô mơ̆ng kiơ̆ tơdrong tĕch mơdro lơ̆m apŭng plĕnh tĕh lơ liơ ‘mơ̆i.

Tơblơ̆ nơ̆r: Amazưt