Ƀô̆ trương Hầu A Lềnh tơbăt, tơdrong tơnap tap hloh hrei au ‘nŏh tơlĕch jang kiơ̆ Tơdrong jang teh đak găh atŏk tơ iung mŭk drăm-tơpôl tơring kon kông păng groi kông. Khei năr kơnh Trung ương gô atŏk kơtang pơjao pơgơ̆r jang ăn rim khul vă tơring tơlĕch jang. Kơ iĕng Thủ tướng jei pơma hơdăh khei năr kơnh atŏk kơtang hơmet pơ ‘lơ̆ng păng pơm pơkeh tơdrong tơchơ̆t kơjăp vă Tơdrong jang đei tơlĕch kon jên jang ƀlep hăm tơdrong ‘meh vă. 

‘Măng apĭnh jet pơgơ̆r tôch kơ tơpăt hăm nơ̆r chă apĭnh đơ̆ng rim kơdră tang măt Kuô̆k hô̆i pơma truh dôm tơdrong jang tim mă lăp, tim mă trŏ ƀlep lơ̆m jang kiơ̆ 3 tơdrong jang teh đak găh tơ iung pơjing tơring tơrang ‘nao; atŏk tơ iung mŭk drăm-tơpôl tơring kon kông păng groi kông; xut xa pơngot rơvĕt tơjur dơnuh kơjăp ‘lơ̆ng. Bơngai tang măt Mai Văn Hải, khul Thanh Hóa apĭnh hơlen:“Đơ̆ng rŏng hloh 2 sơnăm tơlĕch jang kiơ̆ Tơdrong jang tơm Teh đak atŏk tơ iung mŭk drăm, tơpôl tơring kon kông păng groi kông jăl jang 2021-2025 hlôi iŏk đei jơnei mĭnh ƀar tơdrong. Mă lei ‘ngoăih kơ ‘noh tơdrong jang kiơ̆ tơdrong vă jang kơ Tơdrong jang tơlĕch kon jên tơmơ̆t jang oei hiơ hiơ̆ păng đei tôch kơ lơ tơdrong tơhlăk tơhlĭn lơ̆m bơ̆ jang vei lăng. Apĭnh Ƀô̆ trương tơroi lăng ƀơ̆t yơ tơnap tap, tơhlăk tơhlĭn tih tên hloh, tơdrong tơm pơm ăn păng trong vă hơmet pơ ‘lơ̆ng. Bơnê kơ Ƀô̆ trương”.

Ƀô̆ trương, Kơdră chĕp pơgơ̆r Hơnih bơ̆ jang vei lăng kon kông tơbăt,  găh tơdrong atŏk tơ iung mŭk drăm, tơpôl tơring kon kông păng groi kông ‘noh tơnap tap hloh. Kơ yuơ tơdrong jang au tih să păng lơ̆m găh tơring tơnap tap, mơmat tat. Rim tơdrong vă jang, rim trong jang tơgŭm djru hlôi đei tơmơ̆t lơ̆m Tơdrong jang au ‘nŏh pơđĭ trong jang tơgŭm djru jăl hơdrol oei gơ̆h jang kiơ̆:“Tơdrong oei hơnơ̆ng tơchĕng hloh hrei au ‘nŏh lơ̆m tơlĕch jang tơpă yan au kơ yuơ đei tơdrong vă jang tơlĕch jang hơdăh truh tơ̆ pơlei pơla, truh hăm rim ŭnh hnam hloi. Găh tơdrong tơchơ̆t pơtho tơbăt au to jei hlôi pơm tôm tong bơih, mă lei jei đei tơdrong mơmat tat lơ̆m yan au đei dôm tơdrong ‘nao đei dơ̆ng. Trung ương gô atŏk kơtang bơ̆ jang dăr lăng, pơrô̆ pơrôp păng pơtho tơbăt hơmet pơ’lơ̆ng tơtom dôm tơdrong tơnap tap, tơhlăk tơhlĭn ăn tơring. Hăm rim tơring, lơ̆m rim hla bơar pơtho tơbăt jang kiơ̆ au gô atŏk kơtang pơjao pơgơ̆r jang tôm tong vă tơring gơ̆h tơchơ̆t, akŏm khul jang vă tơlĕch jang kiơ̆”.

Jei tơ̆ ‘măng apĭnh jet mơ̆n, Ƀok Hâù A Lềnh, Ƀô̆ trương, Kơdră chĕp pơgơ̆r Hơnih vei lăng Kon kông tơl hơdăh găh dôm tơdrong tơnap tap, tơhlăk tơhlĭn lơ̆m trong jang tơgŭm djru kon kông đei ƀơm truh tơchơ̆t hơdăh tơring, pơlei pơla kon kông, groi kông: “Dôm tơring, pơlei đei 15% ‘noh bơngai kon kông năm tơ̆ lơ, đei sơkơ̆t hơdăh jĭ tơring dăh mă pơlei, tơring kon kông. Mă ƀar tơring dơnuh, pơlei dơnuh ‘nŏh dôm tơring đei 15% măt bơngai kon kông erih sa tơ̆ au đei ŭnh hnam dơnuh năm tơ̆ lơ ‘noh tơring dơnuh. Tơdrong tơchơ̆t au đei mĭnh ƀar tơdrong au to nhen, mư̆h sơkơ̆t hơdăh tơring dơnuh, pơlei dơnuh, ‘nŏh găh tơring, pơlei đei ŭnh hnam dơnuh tim mă truh 15% lei pă đei jô̆ khan tơring dơnuh, tơring tơnap tap hlŏh bơih-păng ‘nau jĭ mĭnh tơdrong tim gan lăp”.

Đei ƀơm truh tơdrong pơtho pơhrăm ăn kon kông, bơngai tang măt Nguyễn Lân Hiếu, khul Bình Định apĭnh:“Hơnih bơ̆ jang hlôi đei dăr lăng lơ liơ găh tơdrong măt bơngai ưh kơbăt chư dơ̆ng kơ rim hơdrung kon kông đơ̆ng hơdruh tơdăm păh kơchoong năm tơ̆ bơngai ‘lŏ kră. Ih hăm đei trong yă kiơ vă jang hơdoi hăm  Mặt trận Tổ quốc păng Hơnih tơm vei lăng hnam trương pơtho pơhrăm vă xek tơlang tơdrong au”

Ƀô̆ trương Hầu A Lềnh tơl:"Kiơ̆ hla bơar chih jô̆ kơ nhôn truh dang ei, kon pơlei kon kông tim gan băt pơma, chih nơ̆r Yuăn dang 15%, ‘nau jei jing tơdrong tŏk bŏk oei pơngơ̆t kơtang. Nhôn gô iung jang hơdoi hăm Hơnih tơm vei lăng hnam trương pơtho pơhrăm vă đei trong jang trŏ lăp lơ̆m rim hla bơar tơchơ̆t jang tơgum djru găh pơtho pơhrăm khei năr au kơnh vă xek tơlang keh đang tơdrong au hăm tơring kon kông, mă kăl ‘nŏh 6 Tơdrong tơchơ̆t đơ̆ng Hơnih tơm Chĭnh trĭ găh atŏk tơ iung 6 tơring mŭk drăm, lơ̆m au đei tơdrong jang atŏk tơ iung pơtho pơhrăm đei pơma truh tơdrong au; chă tơchĕng hơlen păng đei trong tơchơ̆t tơgŭm djru vă xut xa ưh kơbăt chư ăn kon kông".

Bơngai tang măt Vũ Thị Lưu Mai, khul pơlei tơm Hà Nội athei Ƀô̆ trương tơƀôh hơdăh tơdrong tơlĕch kon jên ăn rim tơdrong jang tơm teh đak tôch tŏ sĕt sot lăp đei 4.634 ti, hơtŏ 51%. Lơ̆m mă noh, jei đei lơ kon jên ăn pơgơ̆r hop akŏm, pơtho hŏk pơhrăm bơ̆ jang. Mă kăl, tơlĕch kon jên ăn Hop akŏm găh tơdrong hơtŏ hơnơ̆ng drŏ nglo drŏ kăn ‘noh 64 ti hlak jên. Pơtho tơbăt găh tơdrong iŏk ŭnh om chom gŏ ‘nŏh 102 ti hlak jên. Dăr lăng hơlen hop akŏm ‘noh 88 ti hlak jên. Lơ̆m mă noh tơ iung pơjing bơ̆ jang pơgang tơring lăp đei 38 ti hlak jên. Ƀok Hầu A Lềnh, Ƀô̆ trương, Kơdră chĕp pơgơ̆r Hơnih vei lăng kon kông pơma hơdăh: Tơdrong vă jang au đei hơmet ăn lơ̆m khei năr au ‘noh 2.382 ti hlak jên hăm lơ tơdrong jang, lơ̆m au đei tơdrong chă pơtho ăn bơ̆ jang, pơrô̆ pơrôp au to. Kơ yuơ lơ loh, kơna kon jên jang teh đak vă tơgŭm djru ăn bơngai drŏ kăn khul drŏ kăn hlôi iŏk yua vă ăn bơ̆ jang pơtho pơhrăm hơdrol, rim tơdrong bơ̆ jang anai gô tơlĕch jang lơ̆m khei ‘năr tơ̆ hơnăp kơnh”.

Tơ̆ hơnăp Kuô̆k hô̆i, Kơ iĕng Thủ tướng Teh đak Trần Lưu Quang iŏk chiu pŭ tơ̆ hơnăp Kuô̆k hô̆i păng kon pơlei tŏk bŏk erih sa tơ̆ tơring kon kông, groi kông mưh tơlĕch jang kiơ̆ hiơ hiơ̆ tơdrong jang atŏk tơ iung mŭk drăm-tơpôl tơring kon kông păng groi kông. Truh năr 31/5/2023, kon jên bơ̆ jang kơ sơnăm 2022 ăn tơdrong jang au lăp jơnei 58% kon jên tơmơ̆t jang atŏk tơ iung, kon jên jang sơnăm 2023 lăp iŏk đei jơnei 17% kon jên tơmơ̆t jang atŏk tơ iung. Lơ̆m mă lăp pă 2 sơnăm 1 poăt vă jang kiơ̆ jăl jang mă 1 kơ tơdrong vă jang au, hloh dơ̆ng, lơ kon kông iŏk yua sa hơpăh hăm tơdrong jang au tŏk bŏk erih sa tơ̆ tơring sơlam teh đak, tŏk bŏk tơƀơ̆p tôch lơ tơdrong tơnap tap vă vei lăng năng tông groi teh kơ Teh đak. Kơ iĕng Thủ tướng tơƀôh hơdăh dôm tơdrong tơhlăk tơhlĭn lơ̆m tơlĕch jang kiơ̆ tơdrong jang ‘nŏh kơ yuơ hla bơar pơjing ăn tôch kơ lơ kơna đei hơgrop dih băl pơm tơnap tap ăn tơdrong tơlĕch kon jên jang trung ương. Kơ iĕng Thủ tướng pơma hơdăh, khei năr kơnh atŏk kơtang hơmet pơ ‘lơ̆ng, pơm pơkeh tơdrong tơchơ̆t kơjăp vă Tơdrong jang đei tơlĕch kon jên bơ̆ jang trŏ ƀlep hăm tơdrong ‘meh vă:“Tơdrong kăl hloh ‘noh bơ̆n atŏk kơtang pơjao gơ̆h jang ăn tơring vă rim kang ƀô̆ tơ̆ au pơ̆n tơlĕch jang dôm tơdrong mă đe sư ‘nŏh băt vă pơm lơ liơ mă trŏ ƀlep hloh. Nhôn jei gô kơrŭn đĭ jơhngơ̆m vă hơnơ̆ng xek tơlang dôm tơdrong jang mă nhôn băt gô đei ƀôh dôm tơdrong hle dơ̆ng, pơm lơ liơ xek tơlang keh đang tơdrong au ƀlep khei năr pơkă kiơ̆ ƀlep tơdrong tơchơ̆t păng ƀlep hăm tơdrong mă rim bơngai hơpơi ‘meh vă”.

Pơtôch apĭnh jet găh tơdrong kon kông, Kơdră chĕp pơgơ̆r Kuô̆k hô̆i Vương Đình Huệ hôn bơnê ‘măng apĭnh jet au đei pơgơ̆r ‘lơ̆ng, tơpăt dih băl. Tơƀôh hơdăh dôm tơdrong tim mă’lơ̆ng, tim mă trŏ lăp mă kăl hiơ hiơ̆ tơlĕch jang rim Tơdrong jang tơm Teh đak. Mĭnh ƀar pơtho tơbăt bơ̆ jang đei pơjing hiơ hiơ̆ dăh mă ưh kơ tôm tong, tim mă hơdăh, tim mă sơkơ̆t hơdăh, Kơdră chĕp pơgơ̆r Kuô̆k hô̆i athei lơ̆m khei năr kơnh tơlĕch jang kơtang hloh dơ̆ng rim trong bơ̆ jang vă iung jang kiơ̆ tôm tong, tơtom rim trong tơlĕch jang, trong pơchoh ăn kăl găh bơ̆ jang tơgŭm djru kon kông ăn jăl jang 2021-2030. Hơvơn rim khul vă tơmơ̆t jang atŏk tơ iung mŭk drăm-tơpôl tơring kon kông păng groi kông; lơ̆m au, akŏm lơ̆m tơring tơnap tap, khul kon pơlei oei tơnap tap păng tơnap tap hloh … Jang kiơ̆ keh đang rim trong jang tơgŭm djru teh oei, teh choh jang sa, tơplih tơdrong jang sa ăn rim ŭnh hnam kon kông tim mă đei dăh mă ưh kơ măh teh oei, teh choh jang sa păng sơđơ̆ng ăn đĭ đăng groi teh bri păng teh hlôi đei pơprŏ ăn jang atŏk tơ iung bri jang sa đei pơjao, ăn mơng hăm rim tơ-‘ngla bri jang ‘lơ̆ng.