H’Mên Teh, bơngai M’nông jĭ bơngai đảng viên ‘nao pôk tơmơ̆t lơ̆m năr 22/12/2023 au ki, tơ̆ chi ƀô̆ pơlei Diêo, tơring Bông Krang, apŭng Lăk. H’Mên Teh tơbăt, đei dơ̆ng lơ̆m khul Đảng ‘noh jĭ tơdrong tôch chơt hơ iă hloh kơ yuơ dôm tơdrong hơdrin đĭ ai đơ̆ng kơdih lơ̆m khei năr au ki đei kơdră kơpal ƀôh hơdăh drơ̆ng nơ̆r:“Ĭnh đei mơ̆t lơ̆m khul Đảng ‘noh chơt hơ iă dêh. Lơ̆m 1 sơnăm pơm đảng viên pơprŏ ĭnh hơdrin tôch kơnŏng vă hŏk pơhrăm jơhngơ̆m đon ‘lơ̆ng kơ bơngai đảng viên păng kăl hơdrin hloh dơ̆ng vă 12 khei đơ̆ng rŏng đei jing đảng viên tơpă.”

Đei dơ̆ng lơ̆m khul kơ Đảng đơ̆ng sơnăm 2018, mŏ Lữ Thị Thái bơngai hơdrung Thái, dang ei ‘noh đảng viên jang sa hơgei kơ chi ƀô̆ pơlei Thái, tơring Bông Krang, apŭng Lăk. Yak hơdrol lơ̆m tơdrong jang tơplih ‘nao ‘long pơtăm, kon tơrong tơ̆ tơring, hrei au hăm trong rong rơmo bek ‘lơ̆ng, rong sơdrông pơm brai, pơtăm ‘long sa plei, hlôi hơnhăk ăn ŭnh hnam mŏ Thái đei truh 400 triu hlak jên. ‘Ngoăih kơ ‘noh mŏ Thái ling lang pơm jŭk yŭk trong hơlau lơ̆m tơdrong jang păng rim ‘măng chă hơvơn tơ̆ pơlei nhen plang ăn teh pơm trong pơlei, ŭnh hơyuh tơ̆k hơdăh pơlei pơla, pơm trong pơkao v.v. “Jĭ bơngai đảng viên ba hơnơ̆ng pơm jŭk yŭk trong hơlau, mă blŭng ‘nŏh pơrô̆ pơrôp kon pơlei jang kiơ̆ trong bơ̆ jang đơ̆ng Đảng, khôi luơ̆t Teh đak, hăm kơdih ba ‘nŏh hơnơ̆ng yŭk trong hơlau găh tôm tơdrong. Jang kiơ̆ Tơdrong tơchơ̆t 05 kơ hơnih Đảng apŭng ‘nŏh ba jei tơlĕch jang kiơ̆ yan au hloi, kơdih ba jei jang hơdrol vă kon pơlei jang kiơ̆ kơna hlôi đei tơplih bơ̆n ‘long pơtăm, kon tơrong lơ̆m pơlei hlôi truh 70%, sơ̆ pơtăm chehphe ‘nŏh ưh kơ lăp hăm groi teh chuơ̆h lơ lau, kơna chă tơplih pơtăm ‘long pơtăm anai trŏ lăp hăm groi teh đei iŏk yua kơjăp ăn kon pơlei.”

Ư̆h khan lăp lăng ba kơjăp atŏk tơ iung đảng viên kon kông lơ̆m rim chi ƀô̆, bơ̆ jang atŏk tơ iung đảng viên kon kông tơklep hăm tơmơ̆t bơngai kang ƀô̆ kon kông jang lơ̆m khul chinh trĭ, hơnih bơ̆ jang Teh đak ling lang đei Hơnih Đảng apŭng Lăk lăng ba kơjăp. Truh dang ei, akŏp măt bơngai kang ƀô̆ ‘noh bơngai đảng viên kon kông lơ̆m apŭng ‘noh 1.547 ‘nu. Lơ̆m au, tơ̆ tơring đei 227 ‘nu. ‘Nhŏng Y Wu Sruk - Kơ iĕng Kơdră chĕp pơgơ̆r Hơnih vei lăng kon pơlei tơring Yang Tao, apŭng Lăk tơbăt, tơdrong atŏk tơ iung đảng viên bơngai kon kông tơklep hăm tơmơ̆t jang pơm kang ƀô̆ kơ bơngai kon kông hlôi pơjing đei jơhngơ̆m pran kơ rim hơnih Đảng tơ̆ tơring. Đơ̆ng noh, tơgop kơtang lơ̆m trong tơlĕch jang atŏk tơ iung mŭk drăm-tơpôl tơ̆ tơring; atŭm hăm ‘noh, bơ̆ jang pơrô̆ pơrôp, hơvơn kon pơlei oei tơ̆ rim pơlei pơla jang kiơ̆ trong bơ̆ jang, tơdrong Tơchơ̆t đơ̆ng Đảng, Teh đak hlôi rơvơn hloh, jơnei hloh:“Tơring Yang Tao tơmơ̆t 95% măt bơngai kon kông, ba băt hơdăh tơdrong oei sa joăt joe kơ kon pơlei tơ̆ au, mă kăl găh nơ̆r pơma vă chă pơma dơnuh hăm kon pơlei, ba jĭ bơngai kơtă tơ̆ au, kơna ƀôh hơdăh tơdrong hơrih dsa kơ kon pơlei, tơdrong tơnap tap kơ kon pơlei; ham tơdrong hlôh vao ‘noh kơna ba chă tơblang hơdăh dôm trong bơ̆ jang đơ̆ng Đảng hăm nơ̆r kon kông bơ̆n vă kon pơlei ƀônh hlôh vao, pơm kiơ̆ kơtang.

Apŭng Lăk hrei au đei 75.000 ‘nu kon pơlei, lơ̆m au măt bơngai kon kông tơmơt 63%. Yă Đào Thị Thanh An, Kơ iĕng Kơdră chĕp pơgơ̆r Đảng apŭng Lăk, dêh char Đăk Lăk tơbăt, vă atŏk tơ iung đảng viên tơ̆ dôm chi ƀô̆, pơlei pơla atăih yăih, tơring kon kông, Khul kơdră chĕp pơgơ̆r Đảng apŭng pơjao ăn Hơnih jang chĕp pơgơ̆r Đảng apŭng iung jang hơdoi hăm rim hơnih jang tơ iung pơjing Đảng hơnơ̆ng pơtho tơbăt bơ̆ jang au to vă hơmet pơ ‘lơ̆ng tơdrong tơhlăk tơhlĭn, adoi chă pơrô̆, pơtho khan, dăr lăng tơdrong jang kiơ̆ bơ̆ jang atŏk tơ iung đảng viên tơ̆ pơlei pơla. Hrei au lơ̆m apŭng oei đei 737 ‘nu kon pơlei ‘lơ̆ng tŏk bŏk jing dôm bơngai vă lăng hơlen, pôk tơmơ̆t jang Đảng ăn sơnăm 2024. Yă Đào Thị Thanh An sơkơ̆t hơdăh: “Rim sơnăm nhôn jei tơ iung pơjing rim trong vă jang, rim hla bơar vă pơrô̆ athei rim hơnih Đảng đơ̆ng blŭng sơnăm hloi kăl lăng hơlen dôm kon pơlei ‘lơ̆ng ăn năm hŏk pơhrăm găh đảng. Vă pơm hơtŏk ‘lơ̆ng khul vă tơmơ̆t rim sơnăm nhôn jei tơ iung pơjing trong pơprŏ jang pơjao ăn rim kơdră jang lơ̆m Khul kơdră chĕp pơgơ̆r Đảng jur năm vang hop akŏm đảng hăm rim chi ƀô̆ pơlei vă pơchoh trong, ‘ngoăih atŏk tơ iung muk drăm-tơpôl, tơ iung pơjinbg vei lăng sơđơ̆ng dơ̆ng kơjăp pơlei pơla jei kăl pơtho tơbăt ăn đảng viên tơ̆ rim chi ƀô̆ pơlei pơla lăng ba kơjăp bơ̆ jang tơ iung pơjing Đảng, lăng ba kơjăp pơjing khul vă pôk tơmơ̆t pơm đảng viên.”

Khul kang ƀô̆, đảng viên bơngai kon kông tơ̆ Lăk hlôi jang ‘lơ̆ng hơnăp jang tơm dơnơm lơ̆m khul chinh trĭ tơring, ling lang pơm jŭk yŭk trong hơlau tơ iung pơjing tơgoăt tơgoăl pôm nơ̆r ƀơ̆r đon kon pơlei pơla, vei lăng păng atŏk tơ iung tơring.