VOV4.Bahnar - Tơ drong 42 ‘nu kon pơ lei Việt Nam kơ dâu klĕnh đơ̆ng anih casino tơ̆ tơ ring sơ lam Campuchia-Việt Nam păng dôm tơ drong pơm kơ dranh ăn bơ ngai năm jang tơ̆ tĕh đak đe glăi luơ̆t tơ jê̆ âu tôch đei tơ pôl pơ ngơ̆t. Lơ̆m hop akŏm roi tơ băt rim khei kơ Anih tơm jang tơ bôl pơ gơ̆r ƀât hơ tuch giĕng adrol ki, bơ ngai chă pơ ma tơ lĕch nơ̆r ăn Anih tơm jang tơ bôl Việt Nam, Lê Thị Thu Hằng pơ ma hơ dăh, dôm anih jang kơ pal păng dôm tơ ring athei roi tơ băt hơ drol, hơ tŏk đon kơ chăng đơ̆ng tơ pôl, đơ̆ng kon pơ lei hăm tơ drong năm jang tơ̆ tĕh đak đe, lơ̆m nŏh tĕh đei tĕh đak Campuchia.

Tơ̆ hơ năp tơ drong roi đunh roi đei lơ bơ ngai Việt Nam put kiơ̆ nơ̆r đe pơm kơ dranh năm bơ̆ jang glăi luơ̆t tơ̆ Campuchia păng đei tơ drong mơ mat tat mưh bơ̆ jang, Bơ ngai chă pơ ma tơ lĕch nơ̆r ăn Anih tơm jang tơ bôl Lê Thị Thu Hằng ăn tơ băt:

" ‘Nâu jĭ tơ drong nhôn tôch tơ tăm. Anih tơm jang tơ bôl, dôm anih jang tang măt ăn Việt Nam tơ̆ Campuchia jang hơ doi kơ jăp hăm dôm anih jang kơ pal, tơ ring tơ rang lơ̆m tĕh đak, mă loi jĭ dôm tơ ring sơ lam hăm Campuchia păng jang hơ doi hăm anih jang kơ pal tơ̆ tĕh đak đe vă chă sơng iŏk nơ̆r roi tơ băt, tơ blang hơ dăh, tơ lĕch lơ trong jang vei lăng kon pơ lei păng tơ gŭm tơ tom ăn kon pơ lei mơ mat tat. Brei drou, dôm anih jang kơ pal hlôi dŏng đei păng chơ vih sơ đơ̆ng ‘lơ̆ng tơ̆ Việt Nam dang hlŏh 500 ‘nu kon pơ lei, tơ gŭm pơm hla ar ăn rơ bâu ‘nu kon pơ lei nai”

Lơ̆m 6 khei blŭng sơ năm ‘nâu, Anih tơm vei lăng Công an hlôi phă đei lơ khul grŭp, rôp lơ bơ ngai chông ba đe năm jang glăi luơ̆t tơ̆ Campuchia păng tơ lĕch nơ̆r tơ tă ăn kon pơ lei ƀơm truh tơ drong ‘nâu. Kiơ̆ bơ ngai chă pơ ma tơ lĕch nơ̆r ăn Anih tơm jang tơ bôl, mưh dôm bơ ngai jang Việt Nam năm jang tơ̆ Campuchia, lơ bơ ngai tơ ƀâp mơ mat tat mưh bơ̆ jang. Mă lei, mưh tơ lĕch trong vei lăng, tơ gŭm ăn kon pơ lei, dôm anih jang tang măt ăn Việt Nam kŭm tơ ƀât lơ tơ drong tơ hlăk. Yă Lê Thị Thu Hằng ăn tơ băt:

“Blŭng a, ‘nŏh jĭ tơ drong tơ lĕch trong dŏng tơ gŭm athei đei trong jang hơ doi mă kơ jăp đơ̆ng anih jang kơ pal tơ̆ tĕh đak ‘nŏh. Lơ bơ ngai jang ưh đei hla ar kơ dih kâu, ưh đei hla ar mât lĕch tơ̆ tĕh đak đe yoa kơ dâu klĕnh glăi luơ̆t kơ na hiong lơ jơ vă pơm hơ dăh, kŭm nhen pơm tơ lĕch lơ tơ drong mơ mat tat, găn trong mưh pơ jao, sơng iŏk. Dôm anih tang măt ăn Việt Nam tơ̆ Campuchia tôch adrin, kơ chăng pơ gơ̆r lơ jơ bơ̆ jang, tơ ƀâp păng hơ nơ̆ng vei kơ jăp tơ drong pơ ma nuh hăm păih Campuchia vă sek tơ lang tơ drong ‘nâu”

Yă Lê Thị Thu Hằng oei pơ ma hơ dăh, tơ̆ hơ năp kơnh, Anih tơm jang tơ bôl păng dôm anih jang tang măt ăn Việt Nam tơ̆ Campuchia vă jang hơ doi hăm anih jang kơ pal, tơ ring tơ rang lơ̆m tĕh đak păng hăm păih Campuchia vă hơ tŏk dôm trong jang tơ gŭm, vei lăng kon pơ lei tơ̆ Campuchia, chơ brŏk tơ̆ tĕh đak dôm bơ ngai pŭh nơ̆r đe hơ lĕnh, pơm kơ dranh ăn bơ ngai năm jang tơ̆ tĕh đak đe glăi luơ̆t, vă vei lăng 'lơ̆ng tơ drong đei yoa tơ găl ăn kon pơ lei Việt Nam. Dôm tơ ring oei hơ tŏk tơ drong dăr lăng, khan hơ drol ăn kon pơ lei tơ̆ tơ ring mưh năm jang tơ̆ tĕh đak đe.

Tơ̆ jơ hôp roi tơ băt, pơ ma truh tơ drong dôm jĭt ‘nu bơ ngai Việt kơ tăh, glơi đak krong, kơ dâu klĕnh đơ̆ng casino tơ̆ tơ ring sơ lam Campuchia, Bơ ngai chă pơ ma tơ lĕch nơ̆r Lê Thị Thu Hằng ăn tơ băt, Anih tang măt ăn Việt Nam tơ̆ Campuchia hlôi bơ̆ jang hăm dôm anih jang kơ pal tơ̆ tĕh đak ‘nâu, athei jăh dăr hơ len, pơm hơ dăh yoa kiơ păng hơ năp jang đơ̆ng dôm pang lơ̆m tơ drong ‘nâu. Dang ei jơ hngâm pran đe kon pơ lei đei vih tơ̆ tĕh đak đĭ sơ đơ̆ng bơih păng tơ drong set hơ len ăn ƀôh đe sư ưh đei yoa ma túy ngăl.

Dơ̆ng: Tơ blơ̆