Iŏk đơ̆ng blŭng sơnăm ‘nâu, Khŭl bơ̆jang kơ Trung ương yua đơ̆ng yă Bùi Thị Minh Hòai, Bí thư Trung ương Đảng, Kơdră Anih krao hơvơn kon pơlei Trung ương pơm kơdră Khŭl hlôi năm ngôi păng asong tơmam ăn kŏng nhân bơ̆jang tơ̆ dêh char Dak Lak. Yă Bùi Thị Minh Hoài pơma hơdăh, Dak Lak jĭ dêh char kơdrơ̆m tơring Tây Nguyên, dôm anih mơdro sa lơ̆m dêh char găh lơ ‘noh anih mơdro sa păh lăp păng iĕ, tơdrong arih sa kơ lơ kŏng nhân bơ̆jang lăng atŭm oei lơ mơmat tat. Yua thoi noh, tơdrong vei lăng ăn bơngai jang ‘noh jĭ hơnăp jang tôch kơ gĭt kăl đơ̆ng rim kơdră, rim anih jang.

Yă Bùi Thị Minh Hoài athei, tơ̆ hơnăp kơnh, rim kơdră chĕp kơ̆l kơ dêh char Dak Lak kăl kơ lĕch ăn dôm trong jang hơdăh ‘lơ̆ng, đei yua vă bơ̆jang kiơ̆ ‘lơ̆ng hloh dơ̆ng tơdrong jang vei lăng tơdrong arih sa ăn bơngai jang, vei sơđơ̆ng tơdrong arih sa tơpôl, tơjur dơnuh hin kơjăp. “Ĭnh athei rim kơdră đảng, khŭl kơdră, liên đoàn lao động kŭm hăm rim kơdră tơring hơnơ̆ng băt hơdăh tơdrong găh tơdrong arih sa, jơhngơ̆m đon tơchĕng ‘meh vă đơ̆ng bơngai jang vă đei trong jang tơgŭm tơtom vă vei sơđơ̆ng ăn kŏng nhân bơngai jang đei sa yua dôm tơdrong jang tơgŭm tơpôl đơ̆ng Đảng păng teh đak. Mă loi ‘noh jĭ bơngơ̆t truh tơdrong jang, jên khei, khôi luơ̆t bơ̆jang, jang kiơ̆ tơdrong tơchơ̆t kon pơlei pơm tơm tơ̆ tơring vei lăng tơmam drăm jơhngơ̆m đon ăn kon pơlei jang tơpă tơklep hăm anih jang công đoàn Việt Nam.”

Vei lăng năng tông truh tơ̆ đe đoàn viên công đoàn, mă loi jĭ dôm đoàn viên đei tơdrong arih xa pơmat tat, jĭ jăn păn hnong, pơ̆k rơka đơ̆ng bơ̆ jang, khei ‘năr âu ki, Liên đoàn lao động jơ̆p tơring lơ̆m dêh char Đắk Lắk đei lơ tơdrong jang năm ngôi, jet gia pơma nuh, pơlung jơhngâm, hơpăh tơmam. Kăl loi jĭ tơdrong jang, Bơbŭng hnam công đoàn đei tơlĕch jang hrơ̆ch ‘lơ̆ng, iŏk đei tơdrong tơgŭm tôch pơnĕh đơ̆ng khul kơdră chĕp kơ̆l đảng, khul kơdră pơgơ̆r tơring, dôm anih jang, khul grŭp tơ̆ tơring tơrang, anih tĕch mơdro păng tơdrong vang tơgŭm đơ̆ng đe kăn ƀô̆, đoàn viên, bơngai jang.

Kiơ̆ kơ ‘nŏh, lơ̆m 5 sơnăm âu ki, lơ̆m dêh char mong tơnôm đei hlŏh 23 ti hlak jên păng tơlĕch trong tơgŭm jên man, pơm hơmet vă jê̆ 600 tŏ hnam công đoàn ăn đe đoàn viên đei tơdrong arih xa pơmat tat găh hnam oei. 1 pôm hnam đei pơjao ưh lăp tơƀôh jơhngâm đon ‘mêm mơnat, tơdrong tơgŭm tôch ‘lơ̆ng đơ̆ng Công đoàn hăm bơngai jang đei tơdrong arih xa pơmat tat găh hnam oei đĕch, mă oei pơjing đon lui, vang bơ̆ jang tơnăp ‘lơ̆ng đơ̆ng đoàn viên, bơngai jang hăm Công đoàn dơ̆ng, vang tơgop bơ̆ jang ‘lơ̆ng tơdrong vei lăng sơđơ̆ng tơdrong arih xa tơpôl đơ̆ng dêh char.

Jĭ 1 lơ̆m dôm ‘nu đoàn viên đei tơgŭm man hnam lơ̆m sơnăm 2023, mŏ H’Phúc Niê, công nhân tơ̆ Mir đak lar 19/8, công ty jang cao su Đắk Lắk, iŏk đei tơdrong hơpơi ‘mĕh man hnam kơjăp ‘lơ̆ng ăn unh hnam. Kiơ̆ kơ ‘nŏh, ƀât hơtuch sơnăm 2023, mŏ đei tơgŭm 40 triu hlak jên đơ̆ng Công đoàn lơ̆m Công ty vă man hnam. Unh hnam mŏ mong kơdih, chă tŏk iŏk dơ̆ng jên ‘nhŏng oh vă gơ̆h man đei hnam xă 45m2 lơ̆m teh đơ̆ng mĕ ƀă chĕng song, hăm kơsô̆ jên vă jê̆ 100 triu.

Lơ̆m hnam ‘nao man mă đơ̆ng iĕ ră mă lei tôch hiôk chơt, mŏ H’Phúc ưh kĕ ôn tơdrong chơt hơiă đơ̆ng kơdih pơma: “Inh tôch hơiă mưh iŏk đei tơdrong tơgŭm đơ̆ng công đoàn tơ̆ công ty, tơgŭm ăn unh hnam nhôn man đei hnam ‘nâu, tơgŭm ăn klo kăn măr nhi sơđơ̆ng jơhngâm ƀiơ̆. Đơ̆ng dang ei năm tơ̆ hơnăp kơnh, klo kăn măr nhi vă adrin bơ̆ jang, plang jơhngâm lơ ƀiơ̆ ăn công ty”.

Yă  Vũ Thu Hà,  Phŏ kơdră Anih vei lăng kon pơlei pơlei tơm Hà Nội pơma hơdăh: Pơlei tơm Hà Nội ling lang băt hơdăh tơdrong jang vei sơđơ̆ng ‘lơ̆ng mưh bơ̆jang ‘noh jĭ tơdrong jang hơnơ̆ng. Dôm tơdrong jang kiơ̆ khei bơ̆jang vei sơđơ̆ng ‘lơ̆ng mưh bơ̆jang hlôi tơlĕch jang hrơ̆ch đơ̆ng pơlei tơm truh tơring, tơgop gĭt kăl lơ̆m hơtŏk tơiung mŭk drăm păng vei sơđơ̆ng tơdrong arih sa tơpôl kơ anih tơm. Akhan, hơdai hăm dôm jơnei iŏk đei lơ̆m pơlei tơm oei đei 1,2 anih jang mơdro sa tơdrong jang ming man oei tam mă bơngơ̆t lơ truh tơdrong jang vei sơđơ̆ng ‘lơ̆ng mưh bơ̆jang, đei ƀôh lơ tơdrong krê hơmơt nhen lơ̆m sơnăm 2023 lơ̆m pơlei tơm oei đei ƀôh 296 tơdrong sar bar bơ̆jang pơm ăn 300 ‘nu bơngai jang đei sar bar.

Yua thoi noh, yă Vũ Thu Hà athei dôm Anih jang lơ̆m pơlei tơm, khŭl kơdră, công đoàn rim tơring, mă loi ‘noh jĭ dôm anih mơdro sa, anih pơm tơlĕch tĕch mơdro, kŏng nhân, bơngai jang kăl kơ akŏm pơgơ̆r dôm tơdrong jang găh vei sơđơ̆ng ‘lơ̆ng mưh bơ̆jang păng tơdrong jang tơpôl đei tơdrong vang akŏm đơ̆ng anih mơdro sa, bơngai jang, pơgơ̆r dôm tơdrong jang pơtho tơƀôh tơgŭm anih mơdro sa, hơmet ‘lơ̆ng tơdrong hiôk bơ̆jang ăn bơngai jang: “Jang kiơ̆ tơdrong jang dăr hơlen, hơlen lăng tơdrong jang vei sơđơ̆ng bơ̆jang, vei rơgoh bơ̆jang, tang găn ŭnh sa đôh tơ̆ anih jang, anih mơdro sa, pơgơ̆r pơtôch, hơlen lăng, ‘moi kiơ̆ hlôh vao lơ̆m tơdrong jang pơgơ̆r khei vei sơđơ̆ng ‘lơ̆ng mưh bơ̆jang, roi tơbăt ăn Anih vei lăng kon pơlei pơlei tơm kiơ̆ tơdrong hơgăt, athei dôm anih jang, anih mơdro sa, dôm anih pơm tơlĕch, tĕch mơdro găh mŭk drăm oei lơ̆m pơlei tơm kơchăng pơjing, tơlĕch trong vă jang hơtŏk loi dơ̆ng tơdrong jang hơdai tơgep, hơmet ‘lơ̆ng tơdrong hiôk bơ̆jang, vei lăng jơhngơ̆m pran, hơtŏk ‘lơ̆ng tơdrong arih sa tơmam drăm, jơhngơ̆m đon ăn kŏng nhân, bơngai jang".

‘Nhŏng Trần Trung Hiếu, plei tơ̆ Quảng Bình, vei lăng bơngai jang păng kơmăy kơmŏk ăn Công ty TNHH Grŭp jang Sơn Hải, oei man jăl trong kơsô̆ 3, Tơdrong jang pơm trong gre kơdâu hrĕnh Khánh Hòa – Buôn Ma Thuột. ‘Nhŏng tơroi, tơ̆ jăl trong âu Grŭp jang Sơn Hải pơtruh vă jê̆ 50 tŏ gre, kơmăy kơmŏk đei: gre lu, kơmăy kôch, gre chưk, gre ben, kơmăy khoan… păng dang 150 ‘nu bơngai jang, klăih song pơm lơ ka, bơ̆ jang prăt măng prăt năr. Rim bơngai huơ̆r gre dăh mă ki sư vei lăng bơ̆ jang đei grŭp jang kla jên khei đơ̆ng 25 – 30 triu 1 khei; oei bơngai jang hmă nhen thơ̆ man, thơ̆ hang pơsei, khoan, pơvih pơvăn… Jur tŏk đơ̆ng 12 – 17 triu 1 khei. ‘Ngoăih kơ jên khei, bơngai jang oei đei xa jên jang thim, jên jang lơ̆m dôm năr pơdơ̆h lêh... 

Ƀât pơdơ̆h lêh 30/4 âu, kơdră chĕp kơ̆l Grŭp jang kĭ tơlĕch jên hơpăh ăn 1 ‘nu bơngai jang ‘nŏh 500.000 hlak, păng tơdăh bơ̆ jang lơ̆m năr pơdơ̆h lêh gô đei xa truh 300% jên kŏng pơting hăm năr hmă mưh jang tơ̆ kơ ‘năr, oei jang tơ̆ kơmăng ‘nŏh xa truh 330%. ‘Nâu jĭ kơsô̆ jên kŏng jô̆ kiơ̆ Luơ̆t Bơ̆ jang oei yoa hrei ‘nâu. ‘Nhŏng Trần Trung Hiếu ăn tơbăt: “Tơdrong arih xa kơ đe công nhân nhôn đei công ty pơngơ̆t ăn tôch ‘lơ̆ng. Găh tơdrong sŏng xa ‘nŏh đei tơmam sŏng xa rơgŏh ‘lơ̆ng, tôm kơchơ̆t, tep pơdơ̆h ‘nŏh đei anih hơdrô̆ đei chô̆ kơmăy điều hòa. Tơdrong arih xa sơđơ̆ng ‘lơ̆ng, ‘nhŏng oh nhôn bơ̆ jang tôch tơnăp, adrin jang đang trŏ khei ‘năr hơgăt mưh pơm trong”

‘Măng pơdơh lêh 30/4 păng 1/5 sơnăm ‘nâu pơdui đunh 5 năr hơnhăk ăn tơdrong hiôk chơt ăn lơ bơngai jang mă lei pơm ăn ưh kơ tŏ sĕt anih mơdro sa, mă loi ‘noh jĭ anih mơdro sa pơm tơlĕch tơƀơ̆p mơmat tat. Lơ anih jang ăn bơngai jang hơtŏk jơ jang, ‘mong ăn jơ năr bơ̆jang đơ̆ng rŏng kơ lêh, đei hơnih kŏng nhân apĭnh bơ̆jang lơ̆m dôm năr pơdơh lêh vă vei sơđơ̆ng tơdrong pơjao tơmam. Oei tơ̆ Bình Dương, hơnih đei lơ bơngai jang, yă Phan Lê Diễm Trang, Phŏ Kơdră Griŭp jang Tanh sĭt Bình Dương roi tơbăt: 60 anih mơdro sa lơ̆m grŭp hăm dôm jĭt rơbâu ‘nu kŏng nhân tŏk bŏk tơƀơ̆p mơmat tat lơ̆m tơdrong proh hơmet pơm tơlĕch yua đơ̆ng năr pơdơh dei dei. Yă Trang tơbăt, pơting hăm sơnăm 2023, sơnăm ‘nâu, hla ar tơmam vih hơlơ̆k dơ̆ng lơ kơna anih mơdro sa hlôi tơlĕch trong jang pơm tơlĕch pơđĭ sơnăm. Tơdrong pơdơh lêh ưh kơ đei roi tơbăt hrôih pơm ăn đe sư tơƀơ̆p mơmat lơ̆m tơdrong proh hơmet kŏng nhân. Mă loi ‘noh, sơnăm ‘nâu, pơm hla ar hăm dôm anih jang hơdai kơđeh khei ‘năr, athei pơjao tơmam ƀlep jơ năr kơna ƀơ̆t iŏk đei roi tơbăt pơdơh lêh, anih mơdro sa athei pơma dơnuh hăm anih jang hơdai tơplih năr pơjao tơmam.

Lơ tơmoi ưh kơ chu kơna athei hơtŏk jơ jang, dăh mă tơplih năr pơdơh nai ăn kŏng nhân vă đe sư sơđơ̆ng jơhngơ̆m, hiôk chơt bơ̆jang. Yă Trang tơlĕch nơ̆r tơgop: "Tơdrong ăn bơngai jang pơdơh đunh ‘noh ‘lơ̆ng dêh, mă lei kăl kơ đei tơdrong proh hơmet hơdrol. Pơtih gia sơnăm ‘nâu teh đak tơchĕng vă ăn pơdơh đunh ‘noh athei đei trong tơlĕch jang hơdrol 6 khei. Ưh kơ sĭ khan lăp roi tơbăt 1 jơnăr kơđeh đang kơ ‘noh akhan vă pơtrŭt tơmang lăng păng ăn bơngai jang đei pơdơh ngôi ôh. Thoi noh, dôm bơngai jang hnam kơmăy pơm tơlĕch nhen nhôn ưh kơ tơm jang kiơ. Lơ̆m 1 jơnăr kơđeh, nhôn hlôi proh hơmet bơih mă đei ‘măng pơdơh đunh thoi noh tươpă ‘noh 1 tơdrong mơnat tat tôch kơ tih ăn dôm anih jang pơm tơlĕch, ưh khan lăp lơ̆m tơdrong jang chơ choh bơ̆n hơbăn ao hrŭk mă oei lơ̆m dôm tơdrong jang pơm tơlĕch nai iŏk yua lơ bơnghai jang”.