Tih vơ̆ djơ̆ ‘lơ̆ng lơ̆m pơlei pơla ƀĕnh ƀang tơdrong joăt joe kĕch mang Nghệ An, bơngai tơdăm Hoàng Ngọc Linh rơnĕh sơnăm 1982, lăp đơ̆ng rŏng lĕch ‘măng khoă jăl pêng hlôi pơm hla bơar apĭnh mơ̆t pơm ƀô̆ đô̆i. Pơtôch ƀar sơnăm hơnăp jang pơm ƀô̆ đô̆i, ‘nhŏng apĭnh năm hŏk hloi tơ̆ hnam trương Cao đẳng Quân y 2 pơlei tơm Hồ Chí Minh.

Lĕch ‘măng khoă hăm ƀang hơgei, ‘nhŏng đei ăn năm bơ̆ jang tơ̆ Dơnŏ anĭh Ƀô̆ đô̆i vei lăng sơlam tĕh đak dêh char Gia Lai. Sơnăm 2018, Hoàng Ngọc Linh đei ăn năm jang tơ̆ Kơđông ƀô̆ đô̆i vei lăng sơlam tĕh đak Ia R'vê, apŭng Ea Súp, dêh char Đắk Lắk iŏk jang vei lăng Hơnĭh khăm Ƀô̆ đô̆i kon pơlei, iung jang tơdrong jang chă khăm jơhngơ̆m jăn ăn kang ƀô̆ ƀô̆ đô̆i lơ̆m Kơđông păng kon pơlei lơ̆m tơring. Thượng úy Hoàng Ngọc Linh tơbăt."Găh tơring sơlam tĕh đak lơ̆m pơyan ‘mi hơnơ̆ng đei jĭ pơlŏ lĕch đe; găh pơyan phang ‘nŏh jĭ klak chrŏh, jĭ klak, hơnơ̆k hơdrap ... păng lơ̆m mĭnh năr đei đơ̆ng 10 - 15 ‘nu bơngai jĭ năm khăm păng nhôn chă ming hơmet klăih ngăl. Lơ̆m mĭnh sơnăm đei hlŏh 4.000 ‘nu bơngai jĭ đei hơmet tơtom. Mă đơ̆ng lơ mă lei tơdrong vei lăng năng tông jơhngơ̆m jăn ăn kon pơlei ‘nŏh pơđĭ kang ƀô̆ nhôn jei chơt hơ iă păng hơdrin. Atŭm hăm chă khăm phăl hơlăng ‘nŏh ‘nhŏng ŏh oei chă pơtho tơbăt, pơrô̆ kon pơlei pơm kiơ̆ vei lăng rơgŏh hnam oei, pơm kiơ̆ sŏng sa sĭn, nhă đak rơ̆ ... sơđơ̆ng ‘lơ̆ng ăn jơhngơ̆m jăn."

Ƀok Vi Văn Ngút 67 sơnăm oei tơ̆ thôn 5, tơring Ia R’Vê, apŭng Ea Sŭp tơbăt, thôn hơtăih kơ apŭng Ea Súp hlŏh 60 km, trong nơnăm mơmat tat dơ̆ng, mă kăl lơ̆m pơyan ‘mi. Đơ̆ng mă đei hơnĭh khăm jĭ Ƀô̆ đô̆i kon pơlei Kơđông ƀô̆ đô̆i vei lăng sơlam tĕh đak Ia R’Vê, kon pơlei pă đei năm trong hơtăih vă khăm ming hơmet jĭ jăn bơih. Ư̆h khan lăp lơ lŏh đĕch ôh, kang ƀô̆ ƀok thây pơgang ƀô̆ đô̆i oei năm trŭh rim ŭnh hnam vă chă khăm, ming hơmet jĭ jăn ăn đe kră jĭ, bơngai jĭ ăl ... jei gơnơm đơ̆ng nŏh hơnĭh khăm au păng ƀok thây pơgang Hoàng Ngọc Linh mă bơngai jĭ jăn đunh sơnăm nhen hơkăn ƀok gơ̆h chă yak tơ̆ au tơ̆ to. Ƀok Vi Văn Ngút tơroi:"Hơkăn ĭnh jĭ kơting kơdŭ, hnam pơgang tơroi khan pă kĕ chă ming hơmet klăih bơih, hơkăn ĭnh ư̆h kơ gơ̆h chă yơyak au to. Ĭnh kơtơ̆ng tơ̆ Hơnĭh khăm jĭ Ƀô̆ đô̆i kon pơlei đei ƀak si Linh gơ̆h chơ̆m kưu hơmet klăih kơna ĭnh ba hơkăn ĭnh năm khăm. Hlŏh đơ̆ng ming hơmet chơ̆m kưu dang 18 năr ‘nŏh hơkăn ĭnh hlôi dă ƀiơ̆, gơ̆h chă yơ yak. Ŭnh hnam bơ̆n chhôk hơ iă dêh."  

Ia R'vê ‘nŏh tơring sơlam tĕh đak hơtăih hlŏh kơ apŭng Ea Sŭp, hăm 6.800 ‘nu bơngai găh 28 hơdrĕch hơdrung ‘nhŏng ŏh vang erĭh sa hơdoi. Mŭk drăm mơnat tat pơm ăn tơdrong vei lăng năng tông jơhngơ̆m jăn ăn kon pơlei oei đei lơ tơdrong jang tim mă ‘lơ̆ng. Kiơ̆ kơ ƀok Lê Văn Hoàng Lâm-Kơdră chĕp pơgơ̆r Dơnŏ anĭh vei lăng kon pơlei tơring Ia R’Vê, dôm sơnăm au ki, hơnĭh khăm jĭ Ƀô̆ đô̆i kon pơlei găh Kơđông ƀô̆ đô̆i vei lăng sơlam tĕh đak Ia R’Vê hlôi iung jang ‘lơ̆ng tơdrong bơ̆ jang khăm, ming hơmet jĭ jăn ăn kon pơlei lơ̆m tơring sơlam tĕh đak. Kơdĭh kau Thượng úy Hoàng Ngọc Linh hlôi sơng iŏk đei lơ jơhngơ̆m đon ‘mêm kơ eng đơ̆ng kon pơlei rim hơdrĕch hơdrung."’Nhŏng Hoàng Ngọc Linh ‘nŏh mĭnh ‘nu ƀak si tơnăp, phăl hơlăng, jơhngơ̆m đon ‘lơ̆ng, bơ̆ jang tôch tơnăp lơ̆m chă khăm ming hơmet jĭ jăn ăn kon pơlei. Rim ‘măng kon pơlei chă krao hơvơn ‘nŏh ư̆h kơ ‘nhoen trong hơtăih, gơmăng dăh tơ̆ kơ ‘năr, trong hơtăih hơtŏ jei năm trŭh hăm kon pơlei ngăl. Atŭm hăm khăm ming hơmet jĭ, sư oei chă pơrô̆, pơtho khan ăn kon pơklei vei lăng trong cham hnam mă rơgŏh ‘lơ̆ng, pơm kiơ̆ sŏng sa pai sĭn, nhă đak rơ̆, pơtho hơvơn kon pơlei vang iung jang kiơ̆ tang găn jĭ hơbŭh Covid-19, pơjing đei jơhngơ̆m đon lui yom kơtang đơ̆ng kon pơlei..."  

Hăm kơrŭn đĭ jơhngơ̆m lơ̆m bơ̆ jang, Thượng úy quân y Hoàng Ngọc Linh hlôi đei kơdră kơpal, hơnih jang pôk ăn tơmam drăm gĭt kăl. Mă lei hăm ‘nhŏng, tơdrong chơt hơ iă hlŏh ‘nŏh đei bôl boăl, kon pơlei rim hơdrung ‘mêm kơ eng, lui yom, vang tơgop lơ̆m tơ iung pơjing tơring sơlam tĕh đak roi năr roi pơdrŏng ‘lơ̆ng liĕm hloh dơ̆ng.