Vă jing tơdrong joăt, kư̆ rim pơgê păng tơ̆ kơsơ̆ “Al loa vei lăng sơlam teh đak” kơ Kơđông ƀô̆ đô̆i vei lăng sơlam teh đak Huổi Luông, găh Dơnŏ anĭh Ƀô̆ đô̆i vei lăng sơlam teh đak dêh char Lai Châu re jơ̆p tơring sơlam teh đak. Trong jang au jing trong jang jơnei hlŏh mư̆h jĭ hơbŭh Covid-19 pơrăm kơtang păng đei vei kơjăp trŭh dang ei. Lăp mĭnh tŏ al loa, mĭnh tŏ USB đei nơ̆r pơtho tơbăt lơ̆m nŏh păng mĭnh tong gre bơbit ‘nŏh kang ƀô Ƀô̆ đôi vei lăng sơlam teh đak gơ̆h yak năm trŭh rim tơring đei kon pơlei oei păng jang sa vă pơrô̆ pơrôp, pơtho tơbăt.

Đại úy Phan Thành Nam, Chính trị viên phó, Kơđông Ƀô̆ đô̆i vei lăng sơlam teh đak Huổi Luông tơbăt; Lơ̆m tơring găh lơ rim hơdrung Dao, Mông, Hà Nhì erĭh sa. Dôm nơ̆r pơrô̆ pơrôp, pơtho tơbăt hlôi đei kang ƀô̆ vei lăng teh đak chĭh tơlĕch hăm nơ̆r yuăn atum hăm nơ̆r kon kông, trŏ lăp hăm tơdrong hlô̆h vao kơ kon pơlei. Kơ yuơ lơ lŏh, bu bu jei băt hlôh dôm nơ̆r pơrô̆ pơrôp, pơtho tơbăt păng tơmrot chă mơ̆ng mư̆h rim ‘măng “Al loa vei lăng sơnam teh đak” chă pŏk.“Hăm dôm nơ̆r chă đŏk pơrô̆ pơrôp, pơtho tơbăt Khôi luơ̆t vei lăng Sơlam teh đak Việt Nam lơm tơring, nhôn hlôi chih tơlech dôm tơdrong chă pơrô̆ pơrô̆, pơtho tơbăt, iung jang 2 giĕng mĭnh ‘măng tơ̆ rim tơring. Trong jang au tôch hơ iă, kơ yuơ hlôi pơtho tơbăt dôm tơdrong kăl hlŏh ăn kon pơlei. Lơ̆m khei năr kơnh, nhôn hlôi iung jang hơdoi hăm kơdră tơring, iung jang lơ trong jang hlŏh dơ̆ng găh chă pơtho tơbăt ăn kon pơlei”.

Kơ yuơ erĭh sa tơnap tap, kơna đei lơ ŭnh hnam ư̆h kơ đei kon jên chă răt bơ̆n tivi, dăh mă kmăi tinh tơgoăt hăm internet chă lăng kơtơ̆ng ang au to. Hlŏh dơ̆ng, al loa rapor jei gơ̆h hơnhăk kơtơ̆ng ang re vang vơch jơ̆p koeng ƀôt, kơna kon pơlei oei tơ̆ hnam dăh mă năm jang tơ̆ mir jei kơtơ̆ng ngăl. Roi đunh tơdrong chă mơ̆ng kơtơ̆ng ang kiơ̆ al loa rapor hlôi jing tơdrong joăt hăm kon pơlei tơring sơlam teh đak.

‘Nhŏng Trần Chỉnh Hoàng, bản A Sa Phìn, tơring Huổi Luông, apŭng Phong Thổ tơbăt: Kư̆ mă lơ̆m năr tơdrau păng năr tơpơ̆h rim giĕng, al loa rapor tơ̆ pơlei hơnơ̆ng chă rapor dôm kơtơ̆ng ang găh trong bơ̆ jang đơ̆ng Đảng, khôi luơ̆t Teh đak. Pleh plŏh dĭh băl ƀar giĕng mĭnh ‘măng ‘nŏh dôm tơdrong pơtho tơbăt găh khôi luơ̆t Vei lăng sơlam teh đak Việt Nam; rim trong bơ̆ jang đei ƀơm trŭh tơring sơlam teh đak, vei lăng sơlam teh đak hơdrơ̆ng sơlam teh đak ... Dôm nơ̆r pơtho tơbăt kơđeh, ƀônh hlôh vao kơna bơngai bu mơ̆ng ‘nŏh hlôh hloi. “Kon pơlei lơ̆m pơlei nhôn hlôi băt hơdăh găh tơdrong vei lăng trong sơlam păng trong sơlam teh đak. Hơdrol kon pơlei vă năm trŭh tơ̆ hơnĭh hơdrơ̆ng sơlam teh đak, trong sơlam teh đak jei tơroi tơbăt ăn ƀô̆ đô̆i vei lăng sơlam teh đak ngăl, vă đe ma dăr lăng păng đơ̆ng nŏh kon pơlei jei băt hơdăh hlŏh dơ̆ng găh trong sơlam, hơdrơ̆ng sơlam”.

Atŭm hăm rim ‘măng chă pơrô̆ pơrôp yak năm tơ̆ rim pơlei pơla, pơtho tơbăt hăm al loa rapor kơ tơring, Kơđông Ƀô̆ đô̆i vei lăng sơlam teh đak Huổi Luông jei ăn kang ƀô̆, ƀô̆ đôi năm truh rim ŭnh hnam vă pơtho tơbăt kơtă hloi. Đơ̆ng mă noh, tơgŭm ăn kon pơlei atŏk jơhngơ̆m đon kơchăng hăm dôm trong hơlĕnh pơdăr, pơhlŭ pơhlôm đơ̆ng khŭl ayăt păng rim tơdrong pơm glăi au to. Mŏ Lò Thị Trưởng, kon pơlei oei lơ̆m pơlei Hồ Thầu, tơring Huổi Luông, apŭng Phong Thổ tơroi:“Khei năr au ki ĭnh jei đei mơ̆ng ƀô̆ đô̆i vei lăng sơlam teh đak chă pơtho tơbăt găh trong sơlam, hơdrơ̆ng sơlam. Ba jei băt bơih, tơring sơlam teh đak ‘nŏh gĭt kăl hlŏh ư̆h kơ gơ̆h mơ̆t glăi ôh. Jĭ mĭnh ‘nu kon pơlei oei tơ̆ tơring sơlam teh đak, kơna ba jei gô hơdrin atŭm hăm kang ƀô̆ ƀô̆ đô̆i vei lăng sơlam teh đak vang vei lăng kơ jăp sơđơ̆ng tơdrong pơm tơm kơdih, tơdrong sơđơ̆ng dơ̆ng kơjăp kơ Teh đak”.

Kiơ̆ đơ̆ng Đại tá Lê Công Thành, Kơ iĕng Kơdră chĕp pơgơ̆r Đảng Dơnŏ anĭh Ƀô̆ đô̆i vei lăng sơlam teh đak dêh char Lai Châu tơbăt, bơ̆ jang pơrô̆ pơrôp, pơtho tơbăt khôi luơ̆t, lơ̆m au đei Khôi luơ̆t Vei lăng sơlam teh đak Việt Nam, ‘ngoăih đei tơlĕch pơtho tơbăt kiơ̆ trong trư̆k tuyên trŭh 115 hơnih lơ̆m dêh char, hlôi đei vă jê̆ 2.500 ‘nu kang ƀô̆ ‘nŏh bơngai bơ̆ jang pơtho tơbăt khôi luơ̆t đơ̆ng dêh char trŭh tơ̆ tơring vang iung jang pơtho tơbăt kơtă. Tơdrong pơrô̆ pơrôp pơtho tơbăt đei iung jang hơdoi kơ jăp hăm Jơnŭm pơtho tơƀô̆h khôi luơ̆t kơ rim apŭng tơ̆ 22 tơring sơlam teh đak. “ ‘Moi kiơ̆ bơ̆ jang pơgơ̆r pơtho tơbăt găh Khôi luơ̆t Vei lăng sơlam teh đak Việt Nam, tơdrong hlôh vao kơ kon pơlei oei tơ̆ tơring sơlam teh đak jei hlôi atŏk kơtang. Hăm trong jang hơdăh, jơnei păng lơ trong pơtho tơbăt ‘nŏh nhôn hlôi pơtho tơbăt trŭh tơ̆ kon pơlei pơla. Păng mă kăl rim kon pơlei oei tơ̆ tơring sơlam teh đak hlôi băt hơdăh găh Khôi luơ̆t vei lăng sơlam Teh đak Việt Nam. Đơ̆ng nŏh đei ƀô̆h akhan tơdrong Kuôk hô̆i pơjing tơlĕch Khôi luơ̆t vei lăng sơlam teh đak Việt Nam tôch gĭt kăl lơ̆m bơ̆ jang vei lăng tơdrong pơm tơm kơdĭh groi teh, sơđơ̆ng tơring sơlam teh đak hrei au”.

Hăm rim trong pơgơ̆r pơtho tơbăt hơ iă, trŏ lăp, kon pơlei rim hơdrung lơ̆m tơring hlôi băt hơdăh hlŏh dơ̆ng tơdrong kăl kơ tơdrong vei lăng năng tông trong sơlam teh đak, hơdrơ̆ng sơlam Teh đak. Kon pơlei oei tơ̆ tơring sơlam teh đak Lai Châu sơđơ̆ng jơhngơ̆m jang sa; mĭnh sơnăm tơjur ŭnh hnam dơnŭh hlŏh 5%, tơdrong sar bar hlŏh 10%. Đơ̆ng nŏh, rim bơngai hlôi, tŏk bŏk hơdrin yak hơdoi hăm khŭl chĕp pơgơ̆r đảng, kơdră tơring iung jang ‘lơ̆ng tơdrong bơ̆ jang tơ iung pơjing, atŏk tơ iung tơring sơlam teh đak, sơđơ̆ng chĭnh trĭ, sơđơ̆ng tơpôl lơ̆m tơring sơlam teh đak.