Jĭ dêh char groi kông tơring sơlam teh đak, măt bơngai kon pơlei kon kông oei truh 80%, dôm sơnăm au ki, Lai Châu hơnơ̆ng sơkơ̆t hơdăh tơdrong jang kiơ̆ rim trong jang tơgŭm kon kông, tơgŭm ăn kon pơlei atŏk tơ iung mŭk drăm, sơđơ̆ng hơrih sa, xut xa pơngot rơvĕt tơjur dơnuh. Hăm 20 hơdrĕch hơdrung hơrih sa, lơ̆m au đei 4 hơdrung bơngai kơtoei ‘noh Cống, Mảng, La hủ păng Si la, tơdrong oei sa kơ̆m kang kơnang giĕng lơ tơdrong. Mă đơ̆ng khan rơvơn mă lei jei jing tơdrong long kơtang hăm kơdră tơring lơ̆m iung jang kiơ̆ dôm tơdrong oei sa ‘lơ̆ng hơ iă  ƀar păh rim hơdrung lơ̆m dêh char vă atŏk tơ iung.

Lai Châu hlôi pơjing tơdrong tơchơ̆t găh trong tơgŭm atŏk tơ iung choh jang sa pơjing đei tơmam drăm lơ̆m jăl jang 2021-2025. ‘Nau dôm tơdrong vă rim apŭng, pơlei tơm pơtrŭt pơjing, hơvơn rim hơp tak xah tơmơ̆t jên jang, tơgoăt jang hơdoi, yak hơdoi hăm kơdră tơring tơ iung pơjing jơnei tơdrong jang mĭnh tơring minh tơmam drăm, sơkơ̆t hơdăh jĭ mĭnh lơ̆m lơ trong jang jơnei kơ Lai Châu vă tơgŭm djru kon pơlei tơchă đei hơnih răt iŏk tơmam drăm choh jang sa tơgŭm ăn xut xa pơngot rơvĕt tơjur dơnuh kơ jăp ‘lơ̆ng. Ƀok Lê Xuân Tiến-Kơ iĕng Kơdră chĕp pơgơ̆r Hơnih vei lăng Mơdro sa Lai Châu tơbăt: “Lơ̆m jăl jang 2021- 2025 ‘noh sơkơ̆t hơdăh atŏk tơ iung 7 kơchơ tơring kon kông. Hăm tơdrong tơgoăt rim tơmam drăm choh jang sa kơ kon kông, Hơnih vei lăng Mơdro sa dêh char hlôi pơchoh trong ăn Hơnih vei lăng kon pơlei dêh char pơjing 16 tơdrong jang vă tơlĕch jang kiơ̆, vă tơgoăt đĭ đăng tơmam drăm choh jang sa kơ kon pơlei lơ̆m rim hơnih siêu thĭ, hơnih mơdro sa tơm tơ̆ dêh char adoi nhen mĭnh ƀar tơring”

Đơ̆ng mĭnh tơring ưh kơ đei hơnăn lơ̆m hla kak ‘long sa plei, dang ei, Sơn La hlôi jing hơnih tĕch răt plei ‘long lơ hloh tơring găh Tu păng dơ̆ng mă 2 lơ̆m teh đak. Tơmam drăm đei tĕch mơdro tơ̆ teh đak đe răt tôch kơ rơ̆ih lơ̆m apŭng plĕnh teh păng kơjă hơnhăk đei iŏk yua lơ̆m sơnăm đơ̆ng 150 truh 170 triu đô lar Mi, rơbau ‘nu kon pơlei ‘noh bơngai kon kông hlôi jing bơngai pơdrŏng, pơdrŏng hloh. Yak hơdoi hăm atŏk kơtang atŏk tơ iung dêh char jing hơnih tĕch răt plei ‘long sa plei kơ tơring găh Tu ‘noh bơ̆ jang pơtrŭt tơdrong răt iŏk tơmam drăm choh jang sa ‘moi kiơ̆ bơ̆ jang pơtrŭt mơdro sa. Hrei au đei 16 tơman drăm choh jang sa kơ dêh char Sơn La hlôi tĕch mơdro tơ̆ 12 teh đak. Tơmam drăm choh jang sa hlôi đei tĕch mơdro lơ̆m rim siêu thĭ tih nhen: Lotte, Hapro,WinMart. Tơmam drăm choh jang sa rơgoh ‘lơ̆ng kơ Sơn La hlôi pơjing đei jơhngơ̆m đon lui, hơnăn ‘lơ̆ng lơ̆m hơnih tĕch răt lơ̆m teh đak păng teh đak đe. Ƀok Quàng Văn Dương-bơngai jang lơ̆m Hơp tak xah Choh jang sa Xuân Tiến, Sơn La ‘meh vă: “ ‘Tơdrong hơpơi ‘meh vă hloh kơ kon pơlei adoi nhen hơp tak xah ‘noh ‘meh vă tơdrong tĕch mơdro hlot tơmam drăm au, ‘meh vă tơmam drăm plei pơ ŏ au roi năr roi atŏk tơ iung, vă tĕch mơdro hlot lơ, lơ bơngai băt truh, ‘meh vă lơ̆m teh đak păng ‘meh vă chă tĕch tơ̆ teh đak đe hloi”

Bình Phước ‘noh đei groi teh ‘lơ̆ng, rơvơn vă lang să chă pơtăm ‘long găr sơlơ̆k păng đei lăng jing tơring tơm pơtăm ‘long găr sơlơ̆k mưh tơmơt 50% hơgăt teh păng đei hloh 54% plei găr ‘long sơlơ̆k lơ̆m teh đak. Găr plei ‘long găr sơlơ̆k Bình Phước hăp ‘lơ̆ng hloh pơtêng hăm găr ‘long găr sơlơ̆k răt đơ̆ng teh đak đe, tơgop hơnhăk ‘long pơtăm au jing ‘long pơtăm hơnhăk đei iŏk yua kơtang hloh tĕch mơdro tơ̆ teh đak đe, hlôi jing tơmam drăm tĕch mơdro tơm tĕch mơdro tơ̆ teh đak đe kơ dêh char lơ̆m dôm sơnăm tơjê̆ au. Yă Thân Thị Xiêm- Kơdră chĕp pơgơ̆r Kŏng ty An Thuận Phát pơkăp yak hơdoi hăm kon pơlei Bình Phước lơ̆m răt iŏk: “Nhôn hlôi yak hơdoi hăm kon pơlei kơ Bình Phước, mă kăl hăm kon pơlei kon kông lơ̆m au đei kon pơlei S’tiêng, ‘noh nhôn hlôi tơgoăt kơjăp lơ sơnăm ‘noh pơkăp hăm kon pơlei mưh truh pơyan ‘mi, dôm tơdrong tơnap tap kơ kon pơlei nhôn vang tơgŭm djru păng mưh chă phĕ đang ‘noh nhôn atŭm hăm kon pơlei vang hơdrin chiu pŭ tơdrong au, vă hơnhăk găr ‘long găr sơlơ̆k vih tơ̆ hnam kmăi mong răk găr, trŏ ƀlep hăm ‘long găr sơlơ̆k kơ Bình Phước vă pơjing tơdrong jang ăn kon pơlei đơ̆ng rŏng dôm năr ‘mi păng đơ̆ng rŏng dôm khei ‘năr phĕ, kơ yuơ kon pơlei oei tơ̆ Bình Phước au lăp đei hơdrô̆ ‘long găr sơlơ̆k ‘noh tơdrong đei iŏk yua tơm”

Khei năr au ki, hơnih vei lăng mơdro sa hơnơ̆ng akŏm taŏk kơtang rim tơdrong jang pơtrŭt mơdro sa vă tơgoăt tĕch răt tơmam drăm ăn kon pơlei, lơ̆m au đei kon kông tơring groi kông, tơring atăih yăih. Hơnih tơm vei lăng Mơdro sa hlôi atŭm hăm rim tơring hơdrin kơtang hloh dơ̆ng vă tơmam drăm au đei tơƀôh tơbăt jơ̆p jang rim hơnih tĕch răt păng đei lơ bơngai băt truh. Dôm tơdrong jang hơdrin ‘lơ̆ng hơ iă au hlôi pơjing đei tơdrong hơ iă hăm tĕch mơdro tơmam drăm choh jang sa kơ kon pơlei roi năr tĕch mơdro hlot lơ hloh dơ̆ng kiơ̆ rim sơnăm păng ƀôh kang bang kơ̆l tơ̆ dôm hơnih tơm tĕch răt adoi nhen tĕch mơdro tơ̆ teh đak đe.