Nhôn năm tơ̆ tơring đei lơ kon pơlei Khmer erĭh sa tơring Phương Thạnh, Huyền Hội, apŭng Càng Long, groi teh mĭnh chăl ‘nŏh sơ̆ răm kơtang đơ̆ng ƀôm ƀrơ̆m dang ei hlôi tơplĭh pha bơih. Trong glung, trong man thơ thŭr, dôm pơbŭng hnam ‘lơ̆ng liĕm tơplĭh ăn hnam pơbŭng gia hơprĕ hơprĕm sơ̆. Ƀok Thạch Ngọc Phương Thi, bơngai tơklep hăm groi teh au đơ̆ng ‘lơ̆p tơroi tơbăt: Hơdrol teh đak rơngei tơ̆ au mơmat tat dêh, mă đơ̆ng tim mă kơtĕch 2km trong nơnăm mă lei ‘mĕh vă năm tơ̆ kơchơ dêh char kơtĕch mĭnh pơgê ‘mơ̆i. Mă lei dang ei lăp pă 20 pơnĭt ‘nŏh trŭh bơih păng ‘mĕh vă năm dang yơ jei gơ̆h ngăl kơ yuơ trong nơnăm ư̆h khan lăp thơ thŭr mă lei tơ̆ gơmăng jei đei ŭnh hơdăh ang rang ‘lơ̆ng dơ̆ng”.

Tơ̆ tơring Đa Lộc, apŭng Châu Thành, mĭnh lơ̆m dôm tơring tơnap tap hlŏh găh lơ̆m Tơdrong jang 135 kơ Teh đak sơ̆, dang ei jei hlôi jang keh đang tơdrong jang tơ iung pơjing tơring tơrang ‘nao. Dang ei, jang sa iŏk đei jô̆ hơtŏ măt bơngai kơ tơring ‘nŏh hlŏh 53 triu hlak jên lơ̆m 1 sơnăm. Iŏk đei đăi lơ lau, mĭnh păh gơnơm kon pơlei chŏh jang sa đĭ gơ̆h hơgei, lơ̆m mă kôn mon kon hơ ‘lơ̆p ŭnh hnam ư̆h gan đei teh jang sa ‘nŏh đei mơ̆t jang lơ̆m Công ty, xĭ nghiêp đei sa jên khei. ‘Ngoăih tơdrong bơ̆ jang tơgŭm djru, pơjing rơvơn atŏk tơ iung mŭk drăm, rim khul jang chĭnh trĭ, tơpôl yak hơlau ‘nŏh Mặt trận tổ quốc hơnơ̆ng hơdrin chă pơrô̆ pơrôp, krao hơvơn, akŏm tơgoăt tơgoăl pôm nơ̆r ƀơ̆r đon pơđĭ hơdrĕch hơdrung. Đơ̆ng nŏh, kon pơlei rim hơdrĕch hơdrung vang erĭh sa hơdoi, tơgŭm djru dĭh băl đơ̆ng atŏk tơ iung mŭk drăm ŭnh hnam jang kiơ̆ rim tơdrong jang kơ tơring. Tơdrong mă kăl ‘nŏh ư̆h khan gô đei ƀô̆h ‘mơ̆i mă tơgŭm dĭh băl, mă lei kon pơlei tơ̆ au hlôi tơgum dĭh băl đơ̆ng oei mơmat tat hloi. Đơ̆ng rŏng rơngei hiôk hian 1975, Trà Vinh iung jang hơmet pơ ‘lơ̆ng đơ̆ng tơblăh vang pơm ăn păng sơđơ̆ng chŏh jang sa. Trŭh dang ei, tơdrong jang mŭk drăm kơ dêh char hơnơ̆ng atŏk tơ iung sơđơ̆ng, tơdrong erĭh sa kơ kon pơlei roi năr roi hiôk jơnap. Đơ̆ng mĭnh tơring đei vă jê̆ mĭnh poăt măt bơngai kon pơlei găh lơ̆m dơnuh ƀơ̆t sơnăm blŭng pơjing dơ̆ng dêh char sơnăm 1992, dang ei, ŭnh hnam dơnuh tơjur pă 0,56%; jang sa iŏk đei jô̆ hơtŏ măt bơngai đei hlŏh 63 triu hlak jên lơ̆m 1 sơnăm. Trong hnam hơnơ̆ng đei tơ iung pơjing ‘lơ̆ng liĕm. Trŭh dang ei lơ̆m dêh char đei 80 lơ̆m 85 tơring jang keh đang tơring tơrang ‘nao păng đei 6 apŭng iŏk đei pơkăp păng jang keh đang tơdrong jang tơ iung pơjing tơring tơrang ‘nao. Đei đăi tơdrong au gơnơm tơdrong chĕp pơgơ̆r đơ̆ng Đảng, kon pơlei rim hơdrung tơ̆ Trà Vinh hơnơ̆ng jang kiơ̆ ‘lơ̆ng tơgoăt tơgoăl pôm nơ̆r ƀơ̆r đon, jang kiơ̆ kơ jăp tơdrong joăt joe nuih mơng lơ̆m chăl sơnăm tơblăh, prăt măng năr kơrŭn jơhngơ̆m jang sa tơ iung pơjing erih sa ‘nao. Ƀok Phạm Tiết Cường, Kơ iĕng dră chĕp pơgơ̆r Dơnŏ anĭh MTTQ Việt Nam dêh char Trà Vinh sơkơ̆t hơdăh:“Yak hlŏh rim chăl sơnăm kĕch mang, kon pơlei rim hơdrung, rim hơnĭh jang, hlôi pơjing jơhngơ̆m pran atŭm. ‘Nŏh tơdrong tơgoăt tơgoăl hơdrĕch hơdrung jing tơdrong kăl hlŏh kơ dơnŏ anĭh Đảng păng kon pơlei dêh char Trà Vinh. Lơ̆m khei ‘năr tơ iung pơjing teh đak, Măt trân păng rim khŭl jang chĭnh trĭ, tơpôl rim hơnĭh, kơrŭn jơhngơ̆m jang hơdoi iung jang kiơ̆, dăr lăng rim tơdrong jang, tơdrong vă jang; jang kiơ̆ trong bơ̆ jang tơgŭm djru hăm bơngai đei iŏk yua ăn teh đak, bơngai dơnuh ... tơgop tơ iung pơjing khul tơgoăt tơgoăl lơ̆m dêh char”

Hăm jơhngơ̆m pran tơgoăt tơgoăl kon pơlei pơla, tơgoăt tơgoăl hơdrĕch hơdrung đei iung jang kiơ̆, Trong vă jang kơ trong pơprŏ jang ‘nŏh trŭh sơnăm 2030, tŏk mŭk drăm tơring kon kông lơ̆m dêh char Trà Vinh đơ̆ng 6% lơ̆m sơnăm năm tơ̆ lơ. Jang sa iŏk đei jô̆ hơtŏ măt bơngai kon kông vă hơtŏ hăm jô̆ hơtŏ lơ̆m dêh char; tơjur ŭnh hnam dơnŭh pă 3%. Đei 70% tơring đei lơ kon kông jang keh đang tơring tơrang ‘nao. Trŭh sơnăm 2030 đei 40% bơngai jang kon kông băt jang rim tơdrong jang.

Vă iŏk đei dôm trong tơlĕch jang au, ‘ngoăih pơgĕnh rim khul jang, dêh char gô atŏk kơtang hơmet pơ ‘lơ̆ng, tơplĭh ‘nao bơ̆ jang păng atŏk kơtang bơ̆ jang ‘lơ̆ng vei lăng teh đak găh bơ̆ jang vei lăng năng tông kon kông; tơ iung pơjing păng tơlĕch jang kiơ̆ rim tơdrong vă jang, tơdrong jang, trong tơgŭm djru jang kiơ̆ Trong jang kăl bơ̆ jang tơgŭm kon kông. Ƀok Hà Thanh Sơn, Kơ iĕng Kơdră chĕp pơgơ̆r Dơnŏ anih vei lăng kon kông dêh char Trà Vinh tơbăt: “Lơ̆m khei năr kơnh, nhôn akŏm pơrô̆ pơrôp, pơtho tơbăt vă tơgŭm ăn kon pơlei bơ̆n băt hơdăh hơnăp jang lơ̆m atŏk tơ iung mŭk drăm-tơpôl, vă tơdrong erĭh sa roi năr roi atŏk tơ iung. Mă ƀar nhôn hơnơ̆ng iung jang hơdoi hăm rim dơnŏ anĭh bơ̆ jang lơ̆m dêh char iung jang ‘lơ̆ng lơ̆m rim tơdrong, đơ̆ng chă rơ̆ih, chă hơlen dĭng trŭh dăr lăng hơlen vă atŏk tơ iung đei jơnei hơ iă”.