Iung pơma tơ̆ pơgơ̆r blŭng Hop akŏm, Kơdră chĕp pơgơ̆r Jơnŭm vei lăng kon kông kơ Kuô̆k hô̆i Y Thanh Hà Niê Kdăm tơbăt, Kuô̆k hô̆i iung jang dăr lăng kăl “Pơtôch tơlĕch jang kiơ̆ rim Tơdrong tơchơ̆t kơ Kuô̆k hô̆i găh trong pơprŏ jang 5 sơnăm jăl jang 2021- 2025: Tơdrong jang tơm teh đak tơ iung pơjing pơjing tơring tơrang ‘nao; tơdrong jang teh đak tơjur dơnuh kơjăp; Tơdrong jang teh đak atŏk tơ iung mŭk drăm-tơpôl tơring kon kông păng groi kông”. ‘Nau jĭ tơdrong jang dăr lăng kăl hlŏh gô tơlĕch iung jang lơ̆m Tŏk bŏk jăl jang (jăl 2021-2025).

Truh dang ei, Khul dăr lăng hlôi tơlĕch iung jang ƀlep hăm trong tơlĕch ăn. Khul jang Dăr lăng hlôi tơbăt hơdăh pơtôch bơ̆ jang dăr lăng ăn Kơdră chĕp pơgơ̆r Kuô̆k hô̆i, Kơ iĕng kơdră chĕp pơgơ̆r Kuô̆k hô̆i; tơroi tơbăt ăn Hơnih bơ̆ jang chĕp pơgơ̆r Kuô̆k hô̆i tơ̆ hop akŏm mă 25 (khei 8 au ki) păng ‘măng hop akŏm mă 26 (lơ̆m khei 9). Dang ei Khul bơ̆ jang Dăr lăng tŏk bŏk pơrô̆ athei Khul jang tơgŭm tĕnh koăng chih akŏm, tơgoăt iŏk nơ̆r tơgop đơ̆ng Hơnih bơ̆ jang chĕp pơgơ̆r Kuô̆k hô̆i vă pơjing hla bơar tơbăt tôm tong păng Tơdrong tơchơ̆t dăr lăng vă pơtruh ăn Kuô̆k hô̆i tơ̆ ‘Măng hop akŏm mă 6, khei 10 truh au kơnh.

Kơdră chĕp pơgơ̆r Jơnŭm vei lăng kon kông pơma hơdăh, năr 12/9/2023, Khul Kơdră teh đak pơtruh Hla bơar tơbăt “Găh pơtôch jang kiơ̆, tơdrong tơnap tao, tơhlăk tơhlĭn lơ̆m tơlĕch jang kiơ 3 Tơdrong jang tơm Teh đak lơ̆m jăl jang 2021-2023 păng tơlĕch trong jang kăl hơmet ming tơnap tap, tơhlăk tơhlĭn, atŏk kơtang iung jang kiơ̆ rim Tơdrong jang lơ̆m khei năr kơnh”, lơ̆m au tơroi tơbăt mĭnh ƀar tơdrong tơnap tap, tơhlăk tơhlĭn lơ̆m tơlĕch jang kiơ̆ 3 Tơdrong jang tơm teh đak păng tơlĕch nơ̆r iung jang mĭnh ƀar tơdrong.

Khul kơdră teh đak apĭnh ăn asong pơđunh khei ‘năr jang kiơ̆, tơlĕch kon jên jang truh đĭ năr 31/12/2024 hăm kon jên tơmơ̆t jang đơ̆ng teh đak kơ rim Tơdrong jang teh đak tim mă tơlĕch đĭ kon jên jang lơ̆m sơnăm 2023; pơđunh khei ‘năr, tim mă pơtruh ăn Kuô̆k hô̆i lăng hơlen, kĭ tơchơ̆t trong jang pơlong năng pơjao jang trŭh lơ̆m khul kơdră apŭng lơ̆m vei lăng, pơgơ̆r jang kiơ̆ rim Tơdrong jang tơm teh đak tơ̆ ‘Măng hop akŏm mă 6 kơ Kuô̆k hô̆i.

Kơdră chĕp pơgơ̆r Jơnŭm vei lăng kon kông kơ Kuô̆k hô̆i Y Thanh Hà Niê Kdăm akhan, dôm tơdrong ‘nao pơma truh ‘nŏh tôch gĭt kăl, đei ƀơm truh lơ tơdrong lơ̆m hơrih sa tơpôl, mă kăl ‘nŏh dôm bơngai dơnuh, bơngai kon kông, tơring tơnap tap, tơnap tap hlŏh kơ teh đak. Hăm trong vang iung yak hơdoi, iung jang hơdoi hăm Khul kơdră chĕp pơgơ̆r Teh đak, tơ̆ ‘măng hop akŏm au, Kơdră chĕp pơgơ̆r Jơnŭm vei lăng kon kông kơ Kuô̆k hô̆i Y Thanh Hà Niê Kdăm athei rim kơdră tang măt vang chă pơma dơnuh, tơchă trong xek tơlang, hơmet pơ ‘lơ̆ng dôm nơ̆r apĭnh, đơ̆ng ƀôh yan au tơlĕch ăn.

Pơma pơtôch hop akŏm, Kơdră chĕp pơgơ̆r Jơnŭm vei lăng kon kông kơ Kuô̆k hô̆i Y Thanh Hà Niê Kdăm tơbăt, đơ̆ng rŏng mĭnh khei năr bơ̆ jang tĕnh koăng, tơnăp păng đĭ ai hăm lơ nơ̆r tơgop akŏm, ‘măng hop akŏm au hlôi jang keh đang dôm trong tơlĕch ăn.

Tang măt ăn Khul bơ̆ jang dăr lăng, Kơdră chĕp pơgơ̆r Jơnŭm vei lăng kon kông pơma hơdăh, Khul jang dăr lăng tơgoăt iŏk păng hôn bơnê tơdrong jang tơnăp ‘lơ̆ng đơ̆ng rim Kơdră lơ̆m Khul dăr lăng lơ̆m ‘măng Hop akŏm. Mă kăl dôm nơ̆r pơma tơgop hlôi trŏ lăp hăm tơdrong, pơjing đei drơ̆ng mĭnh nơ̆r găh jơhngơ̆m đon hlôh vao, hơnăp jang, tơƀôh tơbăt hơdăh trong iung jang hơdoi đơ̆ng Kuô̆k hô̆i hăm Khul kơdră chĕp pơgơ̆r Teh đak vă atŏk kơtang iung jang keh đang tĕnh koăng trong xek tơlang, hơmet pơ ‘lơ̆ng rim tơdrong tơnap tap, tơhlăk tơhlĭn tơdrong tơlĕch jang kiơ̆ rim Tơdrong jang tơm teh đak.

Vă tơtom hơmet pơ ‘lơ̆ng tơnap tap, tơhlăk tơhlĭn, atŏk kơtang iung jang kiơ̆ rim Tơdrong jang tơm teh đak lơ̆m khei năr kơnh, Kơdră chĕp pơgơ̆r Jơnŭm vei lăng kon kông kơ Kuô̆k hô̆i Y Thanh Hà Niê Kdăm athei Hơnih tơm Pơ prŏ tơdrong jang păng Tơmơ̆t jên jang (Hơnih chĕp pơgơ̆r rim Tơdrong jang tơm teh đak) iung jang hơdoi kơjăp hăm Khul jang tơgŭm Khul bơ̆ jang Dăr lăng păng rim hơnih bơ̆ jang ƀơm truh vă akŏm tôm nơ̆r tơgop đơ̆ng Khul jang dăr lăng, pơm pơkeh Hla bơar tơbăt dăr lăng, Hla bơar tơbăt tôm tong, trong vă pơjing Tơdrong tơchơ̆t, pơtruh apĭnh Hơnih bơ̆ jang chĕp pơgơ̆r Kuô̆k hô̆i.