Hlŏh 1 khei ‘nâu, iŏk đơ̆ng năr tŏk oei lơ̆m hnam yoa công an man ăn, yă H’wăn Byă 56 sơnăm, tơ̆ thôn 2, xăh Ea Siên, thĭ xăh Buôn Hồ oei đei ƀĕnh jơhngâm đon chơt hơiă. Yă tơroi, unh hnam yă hơdro, rong ‘me kon pơti, lơ sơnăm ‘nâu chă oei oăi tơ̆ hnam đe, 2 sao teh choh jang lăp măh ăn sŏng xa đĕch, kơna tơdrong đei hnam man kơjăp ‘lơ̆ng nhen thoi hơpo đĕch: “Găh Công an man ăn inh hnam ‘nâu, inh hơiă dêh. Đơ̆ng đei tŏk oei tơ̆ âu jơhngâm pran nhen roi ‘lơ̆ng ƀiơ̆, čhôk ‘nă ƀiơ̆, ưh pă pơngơ̆t kiơ găh hnam oei. Inh kră bơih, pă kĕ jang bơih, ưh gơ̆h chă jên vă man hnam ‘nao kiơ. Chă oei hơdoi hơdăi tơ̆ hnam ‘nhŏng, kŭm ưh kơ rơhău kiơ. Bơnê kơ khul linh công an păng dôm anih jang kơpal.”

Kŭm đei tơdrong hơiă mưh tŏk oei tơ̆ hnam ‘nao kơplăh âu mơ̆n, ƀok Trần Anh Dũng, 58 sơnăm, tơ̆ thôn 3, xăh sơlam Ea Bung, apŭng Ea Súp, dêh char Đắk Lắk, pơma: “Sơnăm 1980 unh hnam nhôn đơ̆ng Đà Nẵng tŏk tơ̆ Ea Súp jang xa. Yoa pơmat tat athei oei oăi lơ̆m hnam tơ̆r so sŏch, xă tam mă truh 20m2, ‘mi ‘nŏh hnăt, tŏ ‘nŏh ‘mui, ƀruih ƀrăm. Đei Công an apŭng Ea Súp păng dôm anih jang kơpal man ăn hnam kơjăp ‘lơ̆ng, dang ei đei hnam ‘nao arih xa pă đei hli ‘mi hnăt, ‘mui ƀruih kiơ bơih, unh hnam nhôn tôch hơiă.”

Ea Súp jĭ apŭng mă blŭng tơ̆ Đắk Lắk jang kĕh tơdrong hơgăt man 80 tŏ hnam ăn dôm unh hnam pơmat tat adrol kơ pơyan ‘mi truh. Đại úy Hoàng Thế Quang, Kơdră vei lăng Khul jang tơgŭm, Công an apŭng Ea Súp tơroi: “Công an apŭng athei dôm anih pơtruh tơmam ming man kŭm nhen anih iŏk man, iŏk hơdrol tơmam ming man păng tơgŭm hơdrol jên kŏng, vă jăh man đang hnam tơgŭm ăn dôm unh hnam pơmat tat âu.”

Đắk Lắk jĭ dêh char đei kon pơlei lơ hlŏh tơ̆ Tây Nguyên hăm 1,95 triu ‘nu bơngai, 49 hơdrĕch hơdrung ‘nhŏng oh oei xa hơdai. Kơsô̆ unh hnam tơnuh tơ̆ dêh char oei đei vă jê̆ 8%. Vă tơgŭm ăn dôm unh hnam da ƀiơ̆ pơmat tat, đơ̆ng tŏk bŏk khei 3/2024, Anih tơm vei lăng Công an tơlĕch tơdrong jang man 1.200 tŏ hnam ăn bơngai tơnuh tơ̆ Đắk Lắk. 1 pôm hnam đei kơjă 80 triu, lơ̆m noh Anih tơm vei lăng Công an tơgŭm 50 triu, khul kơdră tơring tơgŭm kơsô̆ jên oei đei dơ̆ng; công an dôm apŭng, xăh vang tơgŭm năr man. Hnam man kiơ̆ Hnam 36B (Anih tơm vei lăng Công an), xă 36m2, tơnăr man, bơbŭng kem, ‘măng pơsei păng hơnă gŏch pơkao.

Kiơ̆ Thiếu tướng Lê Vinh Quy – Yŏng Công an dêh char Đắk Lắk, truh dang ei, lơ̆m dêh char đĭ man kĕh vă jê̆ 500 tŏ hnam pơjao ăn kon pơlei tŏk oei bơih. Dang ei công an dôm apŭng, thĭ xăh, plt oei hơtŏk hrĕnh tơdrong ming man vă jăh man đang đĭ đăng hnam adrol kơ ‘năr 30/10/2024: “Nhôn jang hơdoi hăm dôm anih jang kơpal, khul kơdră tơring păng hơtŏk kơsô̆ linh jur tơ̆ tơring vă tơgŭm ăn kon pơlei năr jang, pơvih pơvăn, man hnam ăn kon pơlei. ‘Ngoăih kơ man kơjăp ‘lơ̆ng, công an dêh char oei athei công an dôm tơring jang kĕh lơ̆m khei ‘năr hrôih hlŏh vă jăh pơjao ăn dôm unh hnam tŏk oei, pơjing tơdrong ‘lơ̆ng vă mih ma duch nă sơđơ̆ng jơhngâm choh jang xa.”

Tơdrong jang man 1.200 tŏ hnam ăn dôm unh hnam pơmat tat tơƀôh hơdăh đon pơngơ̆t tôch dêh đơ̆ng Anih tơm vei lăng Công an hăm kon pơlei lơ̆m dêh char Đắk Lắk. Tơdrong jang ‘nâu vang vei lăng ‘lơ̆ng tơdrong arih xa tơpôl, pơjing tơring tơrang 'nao, hơtŏk tơdrong jang “Đĭ đăng kon pơlei vang vei lăng sơđơ̆ng teh đak”; năm truh tơdrong tơbăt 120 sơnăm Năr pơjing dêh char Đắk Lắk.

Adrol kơ ‘nŏh, Công an dêh char Đắk Lắk păng Công an apŭng Cư Kuin kŭm jang hơdoi hăm khul kơdră tơring pơm lêh man “Hnam ‘mêm mơnat” ăn hnam tơnŏ linh Công an lôch tang teh đak Trần Quốc Thắng, sơ̆ jĭ kăn ƀô̆ Công an xăh Ea Tiêu lôch tang lơ̆m tơdrong pơm kơnê̆ pơlôch bơngai ‘năr 11/6.

Bơ̆ jang kiơ̆ trong jang đơ̆ng Đảng, teh đak păng Anih tơm vei lăng Công an găh tơdrong vei lăng năng tông đe linh jĭ rơka, unh hnam linh lôch tang teh đak, bơngai đei kŏng hăm kăch mang, khei ‘năr âu ki, Anih mong jên tơgŭm ăn bôl boăl kơ Anih tơm vei lăng Công an; Anih mong jên tơgŭm ăn bôl boăl Công an dêh char Đắk Lắk kŭm hăm tơdrong vang tơgop, tơgŭm đơ̆ng đĭ đăng khul linh Công an lơ̆m teh đak vang tơnôm, tơgŭm đei 500 triu hlak jên vă man “Hnam ‘mêm mơnat” ăn kơtum kơtŏng, unh hnam Thiếu tá, Linh lôch tang teh đak Trần Quốc Thắng.