Tơ̆ năr lêh, Bí thư Đảng pơlei tơm Nguyễn Văn Nên hôn bơnê jơhngơ̆m đon tơgoăt tơgoăl, vang kơrŭn jơhngơ̆m, pôm nơ̆r ƀơ̆r đon đơ̆ng kon pơlei Ăp 1, tơring Bình Chánh lơ̆m jang kiơ̆ rim ‘măng pơgơ̆r pơrô̆ pơrôp, jing tơring jang ‘lơ̆ng tơgoăt tơgoăl, kiơ̆ yok jơhngơ̆m đon lăng ba dĭh băl pơlei pơla vang tơ iung pơjing ăp rơgŏh ‘lơ̆ng; adoi pơma tơbăt jơhngơ̆m đon lui kiơ̆ lơ̆m tơdrong erĭh sa kơ kon pơlei Ăp 1 roi năr roi ‘lơ̆ng rŏ hlŏh, sơđơ̆ng hlŏh, iŏk đei jơnei lơ̆m trong jang yak hlŏh dơnŭh hin kơjăp ‘lơ̆ng.

Ƀlep lơ̆m jơ ‘năr au, Bí thư Đảng pơlei tơm HCM Nguyễn Văn Nên hlôi pôk tơmam drăm păng ăn kon jên 10 trĭu hlak jên ăn kơ ăp 1. Adoi, khŭl bơ̆ jang Dơnŏ anĭh Đảng pơlei tơm jei sơng iŏk trong tơlĕch jang pôk ăn 15 tơnô̆ kon jên hŏk pơhrăm ăn hŏk tro ŭnh hnam dơnŭh păng vă jê̆ dơnŭh, kiơ̆ trong iung jang pơrô̆ pơrôp kơ ăp 1 lơ̆m sơnăm 2023. Lơ tơmam drăm atŭm hăm kon jên pôk ăn hŏk pơhrăm đơ̆ng Dơnŏ anĭh Trung ương MTTQ Việt Nam, pơlei tơm HCM hăm kơdră chĕp pơgơ̆r tơring jei pôk ăn rim ŭnh hnam, rim hŏk tro ŭnh hnam tơnap tap.