Hơnơ̆ng đei ƀô̆ đô̆i vei lăng sơlam teh đak tơgŭm djru ‘noh ŭnh hnam ‘nhŏng Rơmăh Tĭu hăm mŏ Rơlan Blơk, bơngai Jrai oei tơ pơlei Tung, tơring Ia Nan, apŭng Đưk Kơ. Ƀar sơnăm hơdrol, ŭnh hnam ‘nhŏng Tĭu ‘nŏh mĭnh lơ̆m dôm ŭnh hnam dơnuh, ưh kơ đei kon jên vă atŏk tơ iung mŭk drăm. Jang sa iŏk đei kơ ŭnh hnam mă kăl chă jang ăn kơ đe kơna ưh sơđơ̆ng. Gơnơm tơdrong tơgŭm djru đơ̆ng Ƀô̆ đô̆i vei lăng sơlam teh đak Kơđông Ia Nan păng khul kơdră tơring, ŭnh hnam ‘nhŏng hlôi đei tơgŭm ăn hơdrĕch hơđăh vă pơtăm 3 sao chehphe, đei pơtho ăn vei lăng năng tông, tang găn sơdrông pơrăm. Truh dang ei, 3 sao chehphe hlôi đei plei, atŭm hăm 2 sao chŭn na ƀa đak păng 8 sao ksu, hlôi hơnhăk ba jang sa iŏk đei sơđơ̆ng dang 100 triu hlak jên lơ̆m mĭnh sơnăm. “Đe ma ƀô̆ đô̆i adoi nhen rim hơnih jang tơring vang chă tơgŭm ăn nhen lĕ ŭnh hnam kơ dih đĕch, pơtho găh kăt sơdrai, prôi phŏng mơ̆r, dang ei ŭnh hnam hlôi hơrih sa sơđơ̆ng, vei lăng năng tông kon hơ ‘lơ̆p hŏk pơhrăm ‘lơ̆ng hơ iă”

Kiơ̆ chih jô̆ đơ̆ng tơring Ia nan, apŭng Đư̆k Kơ, tơring au đei 1.951 ŭnh hnam, hăm vă jê̆ 9.000 ‘nu măt bơngai. Tơring đei 7 lơ̆m 9 pơlei iŏk đei jing tơring tơrang ‘nao. Ŭnh hnam dơnuh roi năr roi tŏ sĕt kiơ̆ sơnăm păng truh đĭ sơnăm 2023, tơring lăp pă 100 ŭnh hnam dơnuh, tơmơ̆t 4,9% kơsô̆ ŭnh hnam. Kơ iĕng Kơdră chĕp pơgơ̆r tơring Ia Nan - ƀok Phạm Văn Thuỷ tơbăt, lơ̆m sơnăm au ki kơdră chĕp pơgơ̆r tơring păng khul Ƀô̆ đô̆i vei lăng sơlam teh đak oei lơ̆m tơring bơ̆n hlôi hơnơ̆ng vang tơ iung pơjing rim trong pơprŏ jang, trong jang hơdăh tơgŭm ăn kon pơlei atŏk tơ iung mŭk drăm, tơ iung pơjing tơring tơrang ‘nao.“Đơ̆ng năr đei kang ƀô̆ tơring iŏk vei lăng năng tông hăm rim ŭnh hnam kon pơlei ‘noh rim ŭnh hnam jei sơđơ̆ng bơih, mă hơdăh nhen trong jang chŭn na ƀa đak adoi nhen ‘long pơtăm kăp gĭt, kang ƀô̆ ƀô̆ đô̆i vei lăng sơlam teh đak lăng ba kơjăp păng pơtho phăl hơlăng trong jang sa, mă kăl ‘nŏh rim ŭnh hnam đei ƀô̆ đô̆i vei lăng sơlam teh đak lơ̆m tơring bơ̆n tơgŭm djru hlôi yak hloh dơnuh hin, atŏk tơ iung sơđơ̆ng hơrih sa, jang sa”.

Trung tá Lê Hồng Tuấn, Kơdră chĕp pơgơ̆r Kơđông Ƀô̆đô̆i vei lăng sơlam teh đak Ia Nan, apŭng Đư̆k Kơ tơbăt, hăm hơpơi ‘meh vă vang yak hơdoi hăm kơdră tơring tơgŭm djru kon pơlei atŏk tơ iung mŭk drăm, pơm hơtŏk jang sa iŏk đei, tơjur dơnuh păng ‘nau jei jing mĭnh tơdrong jang kăl hloh kơ Ƀô̆ đô̆i vei lăng sơlam teh đak vă pơm sơđơ̆ng dơ̆ng kơjăp tơring sơlam teh đak, sơđơ̆ng chinh trĭ, sơđơ̆ng tơpôl lơ̆m tơring sơlam teh đak, tơring Kơđông vei lăng. “Jang kiơ̆ Tơdrong jang tơm Teh đak đơ̆ng Đảng păng Teh đak lơ̆m tơ iung pơjing tơring tơrang ‘nao lơ̆m dôm sơnăm au ki, hơnih au hlôi ăn 9 ‘nu đảng viên vang năm hop akŏm hăm 9 chi ƀô̆ pơlei kơ tơring Ia Nan, 15 ‘nu kơdră iŏk vei lăng năng tông 158 ŭnh hnam kon pơlei. Yak hơdoi hăm tơdrong jang atŏk tơ iung mŭk drăm tơpôl kơ tơring lơ̆m dôm sơnăm au ki, Khul Đảng, Khul kơdră chĕp pơgơ̆r Kơđông đei trong jang kĭ pơkăp hăm Hơnih Đảng, hơnih vei lăng kon pơlei tơring tơgŭm djru kon pơlei atŏk tơ iung mŭk drăm, xut xa pơngot rơvĕt tơjur dơnuh, tơ iung pơjing tơring tơrang ‘nao vă tơring atŏk tơ iung pran kơtang găh mŭk drăm tơpôl, trŏ lăp hăm vei lăng sơđơ̆ng dơ̆ng kơjăp tơring sơlam teh đak lơ̆m chăl hle”.

Atŭm hăm dôm tơdrong hơdrin pơnăm đơ̆ng kon pơlei atŏk tơ iung mŭk drăm, Ƀô̆ đô̆i vei lăng sơlam Teh đak dêh char Gia Lai oei đei lơ trong jang pơ yua ăn tơdrong oei sa jang sa tơpôl. Lơ̆m sơnăm 2023, hlôi ming man đei 13 pơbŭng hnam ăn bơngai dơnuh oei tơ̆ tơring sơlam teh đak, vei kơjăp dơ̆ng pang tang măt ăn 63 ‘nu hŏk tro lơ̆m tơdrong jang “Ba oh năm tơ̆ hnam trương” păng “Kon mŏm kơđông ƀô̆ đô̆i vei lăng sơlam teh đak”... Kiơ̆ đơ̆ng Đại tá Nguyễn Văn Nghị, Kơ iĕng Kơdră chĕp pơgơ̆r Đảng Ƀô̆ đô̆i vei lăng sơlam teh đak dêh char Gia Lai, hơnih au gô hơnơ̆ng jang kiơ̆ trong bơ̆ jang đơ̆ng Đảng, Teh đak găh tơ iung pơjing, vei lăng sơlam teh đak, tơ iung pơjing tơring tơrang ‘nao păng tơjur dơnuh kơjăp ‘lơ̆ng lơ̆m tơring sơlam teh đak. “Hrei au lơ̆m tơring sơlam teh đak đei 3 apŭng păng 7 tơring, tơdrong hơrih sa kơ kon pơlei tơ̆ au tơƀơ̆p tôch tơnap tap. Vă jang ‘lơ̆ng tơdrong jang atŏk tơ iung mŭk drăm, oei sa joh ayŏ-tơpôl, nhôn hơnơ̆ng tơlĕch jang kơtang ăn kang ƀô̆, ƀô̆ đô̆i rim kơđông vei lăng sơlam teh đak jang kiơ̆ ‘lơ̆ng tơdrong jang vei lăng sơđơ̆ng sơlam teh đak lơ̆m tơlĕch jang kiơ̆ rim tơdrong jang, rim tơdrong đei ƀơm truh hăm tơring ‘noh atŏk tơ iung mŭk drăm, oei sa joh ayŏ-tơpôl, tơgŭm kon pơlei xut xa pơngot rơvĕt tơjur dơnh. Nhôn jei gô vă ăn 196 ‘nu đảng viên tơgum djru rim ŭnh hnam lơ̆m 800 ŭnh hnam oei lơ̆m tơring sơlam teh đak.”

Hăm jơhngơ̆m đon “Kơđông ‘noh hnam, sơlam teh đak ‘noh pơlei pơla, kon pơlei rim hơdrĕch hơdrung ‘noh ‘nhŏng oh pôm mĕ ƀă”. Ƀô̆ đô̆i vei lăng sơlam teh đak dêh char Gia Lai hlôi kơrŭn đĭ ai iung jang hơdoi hăm rim Hơnih Đảng, hơnih chĕp pơgơ̆r rim tơring lơ̆m tơdrong tơgum djru kon pơlei tơring sơlam teh đak atŏk tơ iung mŭk drăm-tơpôl. Gơnơm đơ̆ng noh, lơ ŭnh hnam hlôi yak hloh dơnuh hin, hơmet pơ ‘lơ̆ng tơdrong hơrih sa lơ̆m hơgăt teh tơring sơlam teh đak oei ƀĕnh ƀang tơnap tap hrat hrĭn.