Ƀuôn Ea Pri, tơring Ea Wer, apŭng sơlam teh đak Ƀuôn Đôn, dêh char Dak Lăk dôm năr vă đĭ khei 8 hlôi sơng đei kơ hrĕng ‘nu kang ƀô̆, ƀô̆ đô̆i Đại đội 5, Hơnih Ƀô̆ đô̆i apŭng Ƀuôn Đôn năm bơ̆ jang chă pơrô̆ pơrôp kon pơlei. Ƀô̆ đô̆i hlôi iung jang hơdoi hăm kơdră tơring păng rim khul jang chinh trĭ-tơpôl kơ tơring pơgơ̆r chă hơpuih hơmet pơ-‘lơ̆ng trong pơlei, kôch hơmet hơboong thoong đak; tơgŭm djru rim ŭnh hnam đei iŏk yua ăn teh đak, bơngai kră hơdro po; vang iung jang pơtăm kơhrĕng dơnơm ‘long tơ̆ jih trong năm tơ̆ pơlei pơla. Vang iung jang hơdoi hăm khul ƀô̆ đô̆i bơ̆ jang pơrô̆ pơrôp, kon pơlei tơ̆ au bu bu jei chơt hơ iă ‘nă hal vang iung jang ‘lơ̆ng tơdrong jang atŏk tơ iung mŭk drăm-tơpôl, tơdrong jang vei lăng năng tông hơrih sa tơpôl, tơdrong jang tơgŭm djru kon kông, tơdrong lui khop; sơđơ̆ng dơ̆ng kơjăp tơring, teh đak. Ƀok Nguyễn Anh Dũng, Ƀuôn Ea Pri, tơring Ea Wer, apŭng Ƀuôn Đôn tơbăt:“Rim sơnăm ƀô̆ đô̆i năm tơ̆ pơlei Ea Pri vă vang iung jang hơdoi hăm kon pơlei kôch hơmet thoong đak chŭn na păng choong choh, hơpuih hơmet pơ ‘lơ̆ng jih trong nơnăm, tơgŭm kon pơlei jang chŭn na, ba jĭ bơngai kon pơlei kơna tôch chhôk hơ-iă, mưh ƀô̆ đô̆i năm truh hăm pơlei ‘noh kon pơlei jei vang iung jang hơdoi hăm ƀô̆ đô̆i chă hơpuih hơmet pơ ‘lơ̆ng hnam hop akŏm pơlei, hơpuih hơmet pơ-‘lơ̆ng cham hnam oei vă rơgoh ‘lơ̆ng”.

Ư̆h khan lăp tơgŭm kon pơlei rim tơdrong jang gleh hrat, mă lei um rup ƀô̆ đô̆i atŭm hăm khul hơdruh tơdăm năm iung jang kơ sinh viên Hnam trương Đăi hŏk Tây Nguyên păng đoàn viên hơdruh tơdăm tơring ling lang tơklep, pơvei kơjăp lăng tông nông gia truh rim bơngai rim ŭnh hnam, mă kăl dôm ŭnh hnam tơnap tap. Mă kăl mưh chă pơtho tơbăt găh rim trong bơ̆ jang đơ̆ng Đảng, Teh đak. Trong chă pơtho tơbăt tôch kơđeh mă lei ƀônh hlôh vao, pơm kiơ̆ ƀônh, đơ̆ng noh lui kơjăp hloh dơ̆ng lơ̆m tơdrong chĕp pơgơ̆r đơ̆ng Đảng, khul kơdră chĕp pơgơ̆r adoi nhen vang jang kiơ̆ trong bơ̆ jang đơ̆ng Đảng, khôi luơ̆t Teh đak. Thiếu tá Trần Văn Toàn, Chính trị viên Kơ iĕng kơdră chĕp pơgơ̆r Hơnih Ƀô̆ đô̆i apŭng Ƀuôn Đôn, dêh char Dak lăk tơbăt:“Hăm Khul kơdră chĕp pơgơ̆r Hơnih Ƀô̆ đô̆i apŭng Ƀuôn Đôn jei hlôi ƀôh hơdăh tơdrong kăl kơ trong jang au, jang kiơ̆ bơ̆ jang pơrô̆ pơrôp kon pơlei ‘noh jĭ mĭnh lơ̆m dôm tơdrong kăl hloh lơ̆m chăl hrei au. Hăm kon pơlei đei hloh 60% ‘noh kon pơlei kon kông kơna nhôn jei đei trong chă pơrô̆ pơrôp, pơtho khan trŏ lăp hăm kon pơlei, ƀônh hlôh vao hloh, pơm kiơ̆ ƀônh hloh vă kon pơlei băt hlôh ƀôh hơdăh tơdrong ‘lơ̆ng kơ trong bơ̆ jang đơ̆ng Đảng păng Teh đak lơ̆m khei năr kơnh jang kiơ̆ ‘lơ̆ng hloh dơ̆ng”.

Ƀô̆ đô̆i vih hăm pơlei pơla, pơlei pơla tơ̆ tơring sơlam teh đak roi năr roi tơplih ‘lơ̆ng liĕm. Đơ̆ng dôm tơdrong jang hơdăh, ƀô̆ đô̆i hlôi tơgŭm hơmet pơ-‘lơ̆ng, hơmet ming đei 11km trong nơnăm lơ̆m pơlei, hloh 1km hơboong thoong đak; tơgŭm ăn kon pơlei choh jang sa; hơmet pơ-‘lơ̆ng 5 tŏ hnam hop akŏm pơlei pơla, hnam kon pơlei, 2 hnam trương hŏk; pơgơ̆r joh ayŏ kơdŏ soang, năm ngôi, pôk tơmam drăm ăn rim ŭnh hnam đei iŏk yua ăn teh đak; jang hơdoi hăm dôm tơdrong ‘nŏh chă pơrô̆ pơrôp, pơtho khan ăn kon pơlei jang kiơ̆ ‘lơ̆ng tơdrong hơrih sa ‘lơ̆ng hơ iă, vei lăng rơgoh ‘lơ̆ng pơlei pơla; atŏk kơtang jơhngơm đon jang kiơ̆ kơjăp rim trong bơ̆ jang đơ̆ng Đảng, Khôi luơ̆t Teh đak. Đại tá Võ Văn Minh, Kơ iĕng kơdră Đảng Hơnih Ƀô̆ đô̆i dêh char Đăk Lăk tơbăt:“Vă jang ‘lơ̆ng rim tơdrong jang bơ̆ jang pơrô̆ pơrôp kon pơlei păng rim tơdrong jang tơgoăt tơgoăl ƀô̆ đô̆i kon pơlei lơ̆m dêh char khei năr au kơnh, hăm khul ƀô̆ đô̆i dêh char mă blŭng nhôn oei hơnơ̆ng lăng kơjăp tơdrong atŏk jơhngơ̆m đon hlôh vao ăn kang ƀô̆ ƀô̆ đô̆i găh tơdrong jang pơrô̆ pơrôp lơ̆m chăl hrei au ‘nŏh tơdrong jang kăl hloh. Vă jang ‘lơ̆ng lei kăl năm hloi tơ̆ tơring, chă lăng rim hơnih hrei au kơ rim khul bơ̆ jang pơrô̆ pơrôp kon pơlei tơ̆ tơring bơ̆n hlôi iung jang trŏ lăp hăm tơdrong ‘meh vă đơ̆ng kon pơlei dăh mă ưh păng tơ̆ rim tơring kăl; đơ̆ng noh vă jang ‘lơ̆ng bơ̆ jang chă hơlen hơdăh tơdrong jang yă kiơ ‘lơ̆ng, yă kiơ tim mă ‘lơ̆ng păng tơlĕch, lang să jang kiơ̆ dôm tơdrong jang ‘lơ̆ng lơ̆m tơgoăt tơgoăl dih băl ƀô̆ đô̆i kon pơlei tơ̆ rim tơring lơ̆m dêh char pơma atŭm, hăm pơđĭ khul ƀô̆ đô̆i dêh char pơma hơdrô̆”.

Hăm trong jang “4 hơdoi” lơ̆m bơ̆ jang pơrô̆ pơrôp kon pơlei sơnăm 2023, rim hơnih kơ Hơnih Ƀô̆ đô̆i dêh char Đăk Lăk hlôi iung jang hơdoi hăm rim tơring dăr lăng, chă rơih dôm tơdrong jang kăl hloh vă tơgum djru. ‘Moi kiơ̆ rim tơdrong jang hlôi đei jang keh đang hlôi tơgop dơ̆ng jơhngơ̆m đon chơt hơ iă ‘nă hal, chhơp jơhngơ̆m păng pơm hơtŏk jơhngơ̆m đon kon pơlei tơring sơlam teh đak kơ dêh char Dak Lăk lui kiơ̆ kơjăp iăp kơtang hloh dơ̆ng hăm “Ƀô̆ đô̆i Ƀok Hô”.