Mĭnh kơsơ̆ ‘năr rơngơp tơ̆ pơlei Stơr. Lơ̆m pơbŭng hnam ‘lơ̆ng liĕm, ƀô̆ đô̆i so Đinh Yom tơƀôh tơbăt rup Ƀok Hô păng Ƀok Nŭp nuih mơng tơ̆ tơnăr hnam. Ƀok hơdơ̆r dơ̆ng khei ‘năr tơblăh vang hrang tơƀet kơtang sơ̆, ƀok kiơ̆ Ƀok Nŭp nuih kơng năm tơblăh ayăt, hăm pơjao tơdrong jang ‘noh năm ba hla bơar, chơ choĕn phe ƀa tơmam drăm sa, ƀrơ̆m phao, pơgang ăn kĕch mang. Lơ̆m ‘măng tơblăh kơtang ‘noh, kơdih ƀô̆ đô̆i so Đinh Yom rơka jơ̆p hơkau jăn, ơ̆h ol hloh dơ̆ng ‘noh hơnơ̆ng ƀôh bôl boăl lôch răm. “Sơ̆, ba mơ̆t jang kech mang đơ̆ng sơnăm 1965, năm tơblăh ayăt Mi, ĭnh hnăm mĭnh ƀar ‘nu bơngai dơ̆ng jĭ rơka ƀơm ƀrơ̆m. Lơ̆m mă ba rơka, tơring bơ̆n ƀơ̆t dŏh sơ̆ ‘nŏh tơring Tây Nam. Truh sơnăm 1968 ba pơm xah đô̆i trơng, hơnơ̆ng năm tơblăh ayăt. Đơ̆ng rŏng teh đak rơngei sơnăm 1975, ba hăm khul ƀô̆ đô̆i hơnơ̆ng năm tơblăh khul Fulro...atŭm hăm kơdră tơring pơjing tơdrong hơrih sa sơđơ̆ng hiôk hian ăn kon pơlei...”

Lĕch pơm ƀô̆ đô̆i sơnăm 1999, brŏk vih hơrih sa tơ̆ pơlei Stơr, pơlei tơklep kơjăp hăm hơnăn Ƀok Nup nuih mơng, ƀô̆ đô̆i so Đinh Yom atŭm hăm Kơdră chĕpgơ̆r Đảng, Kơdră chĕp pơgơ̆r tơring kơrŭn đĭ jơhngơ̆m pơrô̆ pơrôp, pơtho tơbăt trong bơ̆ jang đơ̆ng Đảng păng Teh đak, pơrô̆ hơvơn kon pơlei tơ iung pơjing pơlei mĭnh dơnơ̆ng dơ̆ng pơlei mĭnh hơnih, pơvih muih rŏh choh klăng pơm chŭn na, pơtho ăn kon pơlei rong kon tơrong, choh jang sa, jang chŭn na ƀa đak.

Mă kăl, đơ̆ng mă đei pôk pơm Kră pơlei lơ̆m sơnăm 2000, ƀok Đinh Yom hơnơ̆ng ƀlŏk hơdơ̆r nơ̆r pơtho khan đơ̆ng Ƀok Nup nuih mơng ‘noh, “ ‘Nĕ kơ lê̆ kon pơlei hơrih sa mơmat tat, kơhlôh kơvao”, hăm hơnăp jang kơ bơngai “vei lăng tơdrong pơlei” ƀok Yom hlôi kơrŭn jơhngơ̆m chă pơrô̆ hơvơn kon pơlei tơgoăt tơgoăl mĭnh nơ̆r ƀơ̆r đon, atŏk tơ iung mŭk drăm, tơ iung pơjing pơlei pơla, vei lăng năng tông kôn mon kon sau hŏk pơhrăm ... Dôm tơdrong jang đơ̆ng kră pơlei Đinh Yom tơgop pơm tơplih jơhngơ̆m đon kon pơlei kơ pơlei Stơr, đei konb pơlei lui yom, hôn bơnê păng jang kiơ̆ kơna rim trong bơ̆ jang đơ̆ng Đảng, Teh đak tơlĕch ăn đei kon pơlei iung jang kiơ̆ kơjăp. Ƀok Đinh Yom, kră pơlei kơ pơlei Stơr pơma:“Đơ̆ng sơ̆ khơ̆ dang ei rim ‘măng hôp kon pơlei lơ̆m Rông, ba hơnơ̆ng chă pơtho khan ăn kon pơlei, mă blŭng ‘noh var pơgar, vei lăng trong pơlei mă rơgoh ‘lơ̆ng. Đơ̆ng noh hơdoi hăm kang ƀô̆ pơlei, tơring nhen Kơdră chĕp pơgơ̆r tơring, Ƀĭ thư, Kơdră chĕp pơgơ̆r Măt trân năm chă pơrôp pơrôp, pơtho khan ăn kon pơlei, athei kon pơlei hơdrin jang sa vă xut xa pơngot rơvĕt tơjur dơnuh hin, rei pơtăm ƀa, hơƀo, tơ iung pơjing hơrih sa ‘nao...”

Đei Ƀô̆ đô̆i so- Kră pơlei Đinh Yom chă pơrô̆ pơrôp, pơtho khan, kon pơlei tơ̆ au hlôi tơplih jơhngơ̆m đon tơchĕng, trong jang sa păng hlôi băt jang kiơ̆ khoa hŏk kih thuơ̆t lơ̆m choh jang sa, rong kon tơrong ... vang tơgoăt tơgoăl dih băl mĭnh nơ̆r ƀơ̆r đon, tơ iung pơjing pơlei Stơr jing pơlei oei sa ‘lơ̆ng kơ dêh char păng tŏk bok hơdrin iŏk đei pơlei Tơring tơrang ‘nao lơ̆m sơnăm 2024... Tơdrong tơplih ‘nao kơtang au, mĭnh păh đei tơdrong tơgop tih tên đơ̆ng Ƀô̆ đô̆i so, kră pơlei Đinh Yom nhen nơ̆r ƀok Đinh Bư, Bí thư Đảng tơring Tơ Tung, apŭng K’bang, dêh char Gia Lai, sơkơ̆t hơdăh:“Ƀok Yom ‘noh jĭ bơngai hlôi vang năm tơblăh ayăt atŭm hăm Ƀok Nup nuih mơng, truh dang ei sơnăm đĭ ‘lŏ kră, mă lei sư jĭ oei tôch tơnăp bơ̆ jang au to kơ Khul Ƀô̆ đô̆i so păng đunh sơnăm pơm kră pơlei, đei kon pơlei yom kơtang. Ƀok ‘noh jĭ bơngai pơm jŭk yuk trong hơlau lơ̆m rim tơdrong. Sơ̆, lơ̆m mă oei bơ̆ jang lơ̆m tơring, ƀok hơnơ̆ng chă hok pơhrăm pơtho ăn kon pơlei jang sa, atŏk tơ iung mŭk drăm unh hnam, pơtho khan ăn kon sau hơdrin hŏk pơhrăm. Ƀok hơrih sa tôch kơ ‘lơ̆ng păng jang tơnăp. Dang ei mă đơ̆ng sơnăm đĭ kră, pă gan đei jơhngơ̆m mă lei ƀok oei hơnơ̆ng ƀlok hơdơ̆r nơ̆r pơtho khan đơ̆ng Ƀok Nŭp, ‘nŏh hơdrin tơgŭm djru kon pơlei, pơtho khan ăn kôn mon kon sau dôm tơdrong ‘lơ̆ng, tơdrong trŏ lăp, hơdrin hŏk pơhrăm, đơ̆ng nŏh kon pơlei jang kiơ̆, vang tơ iung pơjing pơlei Stơr jing pơlei Tơring tơrang ‘nao.”

Đơ̆ng mĭnh pơlei răm ƀôm ƀrơ̆m ayăt phă pơrăm, đei tơdrong lăng ba kơjăp đơ̆ng Đảng, Teh đak păng tơdrong tơgoăt tơgoăl, kơrŭn đĭ jơhngơ̆m yak hloh tơnap tap kơ kon pơlei, pơlei pơla Ƀok Nŭp nuih mơng mă đơ̆ng tim mă pơdrŏng mă lei ŭnh hơyuh, trong nơnăm, hnam trương hŏk đei ming man ‘lơ̆ng liĕm, tơdrong hơrih sa, jang sa kơ kon pơlei roi năr roi atŏk tơ iung. Hloh 100 ŭnh hnam lơ̆m pơlei dang ei lăp pă 13 ŭnh hnam dơnuh păng hlôi pă đei hnam gia, hnam hnăt hnot, đĭ đăng ŭnh hnam hlôi đei gre bơbĭt, tivi ... Tơdrong hơrih sa sơđơ̆ng, jơhngơ̆m đon lui kiơ̆ Đảng, Teh đak sa roi kơ jăp iăp kơtang hloh dơ̆ng.