Ƀô̆ đô̆i so tơgoăt tơgoăl, atŭm dih băl atŏk tơ iung mŭk drăm
Thứ sáu, 11:05, 03/02/2023 VOV1/Amazưt tơblơ̆ VOV1/Amazưt tơblơ̆
VOV4.Bahnar - Âu ki, Khŭl Ƀô̆ đô̆i so Việt Nam hlôi pơgơ̆r Hop akŏm bơngai tang măt lơ̆m teh đak ‘măng mă VII (2022-2027). Tơ̆ au, lơ bơngai tang măt hơmŏ, Khul kơdră chĕp pơgơ̆r jăl ‘nao gô đei lơ tơdrong tơplih, chông ba Khul ƀô̆ đô̆i so lơ̆m teh đak jang keh đang trong tơlĕch jang, mă kăl ‘nŏh tơgŭm rim bơngai ƀô̆ đô̆i so atŏk tơ iung mŭk drăm.

Ƀok Nguyễn Đình Trường, Kơdră so Công ty Mei Việt Tiến, Kơ iĕng kơdră chĕp pơgơ̆r Khul ƀô̆ đô̆i so Việt Nam jang mơdro sa akhan, jăl jang au ki, Khul Ƀô̆ đô̆i so Việt Nam hlôi jang keh đang păng ling lang atŏk kơtang jơhngơ̆m đon ‘lơ̆ng pơtho khan ăn jăl mơlôh, pơtho pơjing jơhngơ̆m đon hơdrin, jơhngơ̆m đon iung tơjră mă mĕ ƀă yă ƀok hlôi pơjing ăn, pơtho tơbăt ăn jơhnơr mơlôh hơnơ̆ng kiơ̆ yok bơ̆ jang vei lăng teh đak. Kơ yuơ lơ loh, jăl jang kơnh hăm 1/3 bơngai ‘nao chih hơnăn ăn pôk tơmơ̆t lơ̆m Khŭl kơdră chĕp pơgơ̆r, păng hăm trong chĕp pơgơ̆r, pơrô̆ jang đơ̆ng Khŭl kơdră chĕp pơgơ̆r ‘nao, ƀok Nguyễn Đình Trường lui akhan, rim trong tơlĕch jang kơ jăl jang mă 7 gô iung jang keh dang tĕnh koăng: “Jang kiơ̆ nơ̆r pơrô̆ jang đơ̆ng Tổng Bí thư Nguyễn Phú Trọng, Khŭl ƀô̆ đô̆i so Việt Nam đei 5 tơdrong jang. Lơ̆m 5 tơdrong jang au đei 2 trong jang kăl hlŏh. Trong jang kăl hlŏh mă blŭng ‘nŏh tơ iung pơjing khul chinh trĭ tơpă pran kơjăp, rơgoh ‘lơ̆ng, vă pơjing đei hơyak pran, vei lăng năng tông khul kơdră chĕp pơgơ̆r đơ̆ng tơring năm tơ̆ kơpal. Tơdrong mă ƀar ‘nŏh hơdrin vang iung jang mŭk drăm vă xut xa pơngot rơvet tơjur dơnuh păng vang jang hơdrin lơ̆m tơdrong jang kơ yuơ Đảng păng Teh đak tơlĕch ăn. ‘Nau jing 2 tơdrong jang kăl hlŏh vă tơ iung pơjing Khul roi năr roi atŏk tơ iung”

Mĭnh lơ̆m dôm tơdrong jang đei rim Khul ƀô̆ đô̆i so lơ̆m teh đak hơdrin jang kiơ̆ ‘nŏh tơgŭm djru rim ƀô̆ đô̆i so lơ̆m khul pơm pơdrŏng, atŏk tơ iung mŭk drăm. Ƀok Trần Bá Đông, Kơdră chĕp pơgơ̆r Khul ƀô̆ đô̆i so phương Đông Tảo, pơlei tơm Hưng Yên, dêh char Hưng Yên tơbăt, hăm 3 hơnih mơdro sa kơ yuơ bơngai ƀô̆ đô̆i so pơm tơm, trong jang tơgum djru rim ƀô̆ đô̆i so pơm pơdrŏng đei tơlĕch jang ‘lơ̆ng hơ iă hlŏh lơ̆m sơnăm au ki. Hrei au 100% ‘nu bơngai ƀô̆ đô̆i so pă đei bơngai bu ‘noh ŭnh hnam dơnuh, 85% ‘nŏh ŭnh hnam đei ƀô̆h păng pơdrŏng păng 15% ŭnh hnam erih sa sơđơ̆ng. Ƀok Trần Bá Đông hơpơi ‘meh vă:“Kon jên jang ‘nŏh nhôn tơ̆ tơring kiơ̆ tơdrong tơchơt đơ̆ng Teh đak bơih, hơnih mong jên tơgŭm djru tơpôl gô tơgŭm djru kiơ̆ tơdrong tơchơ̆t. Dang ei nhôn hơpơi ‘mĕh vă kơdră kơpal tơgŭm djru lơ liơ đei trong bơ̆ jang mă trŏ ƀlep, dôm trong jang tơgŭm djru ăn nhôn yak hloh dơnuh hin. Nhôn tôch hơmŏ, lui kơjăp lơ̆m tơdrong chĕp pơgơ̆r đơ̆ng rim kơdră lơ̆m Khŭl kơdră chĕp pơgơ̆r jăl 7 au păng ĭnh hơpơi ‘mĕh vă lơ lau, rim kơdră hăm hơnăp jang, hăm jơhngơ̆m đon ‘lơ̆ng kơ ƀô̆ đô̆i Ƀok Hô ‘noh bơ̆n gô jang kiơ̆ kơjăp, chĕp pơgơ̆r bơ̆ jang khul mă trŏ ƀlep, hơtŏ hơnơ̆ng, atŏk tơ iung”

Găh ƀok Dương Xuân Hảo, kơdră Hơnih jang ăn Kơdră Khul Ƀô̆ đô̆i so dêh char Ninh Bình ‘nŏh pơma tơbăt jơhngơ̆m đon hơdrin đĭ ai, lơ̆m jăl jang au gô hơnơ̆ng iung jang rim tơdrong jang vang tơgŭm djru pơm pơdrŏng kơ rim bơngai lơ̆m khul ƀô̆ đô̆i so:“Khul Ƀô̆ đô̆i so dêh char Ninh Bình lơ̆m jăl jang kơnh hơdrin pơjing rơvơn găh kon jên ăn tŏk iŏk vă rim bơngai lơ̆m khul đei rơvơn atŏk tơ iung mŭk drăm mă kăl gơ̆h tŏk iŏk jên đơ̆ng Hơnih mong jên tơgŭm djru tơpôl păng rim hơnih mong jên anai. Pơjing rơvơn găh rim trong jang hơlêm dih băl, tơgŭm djru dih băl kơtă ‘nŏh bơngai bu đei rơvơn ƀiơ̆ ‘nŏh tơgŭm djru găh kih thuơ̆t, pơtho tơbăt dih băl jang sa, tơgŭm bôl boăl bơ̆n vang atŏk tơ iung”.

Rim tơdrong tơchơ̆t kơ Pơm lêh hop akŏm ‘nŏh trong pơchoh ăn tôch gĭt kăl ăn tơdrong jang păng atŏk tơ iung kơ khul lơ̆m 5 sơnăm kơnh. Lăp đơ̆ng rŏng Pơm lêh hop akŏm, rim khul hlôi pơgơ̆r ‘lơ̆ng tơlĕch jang kiơ̆ tơdrong tơchơ̆t, rim trong tơlĕch jang kơ Pơm lêh hop akŏm, pơrô̆ tơbăt jơ̆p jang ăn kang ƀô̆, bơngai lơ̆m khul băt hơdăh pơtôch hop akom; tĕnh koăng tơ iung pơjing, tơlĕch jang, trong pơprŏ iung jang, hơnhăk tơdrong tơchơ̆t tơmơ̆t jang kiơ̆ lơ̆m khul; atŏk kơtang trong jang pơting dih băl jang pran kơtang, hŏk pơhrăm păng pơm kiơ̆ jơhngơ̆m đon ‘lơ̆ng, bơ̆ jang hơgei kơ Ƀok Hô, jang kiơ̆ keh đang rim tơdrong jang; tơgop tơ iung pơjing păng vei lăng kơjăp Teh đak, tơgăl hăm tơdrong lui đơ̆ng Đảng, Teh đak păng kon pơlei. Iung pơma pơtôch Pơm lêh hop akŏm, Thượng tướng Bế Xuân Trường, Kơdră chĕp pơgơ̆r Khul Ƀô̆ đô̆i so Việt Nam jăl VII, jăl jang 2022-2027 pơma hơdăh: “Nhôn pơkăp tơ̆ hơnăp đĭ đăng Khul Ƀô̆ đô̆i so lơ̆m teh đak ling lang tơgoăt tơgoăl pôm nơ̆r ƀơ̆r đon, tơgoăt kơjăp dih băl, tơ iung pơjing tơpôl khul bơ̆ jang ‘lơ̆ng, ling lang lui kiơ̆ kơjăp lơ̆m tơdrong chĕp pơgơ̆r đơ̆ng Đảng, Teh đak, mĭnh jơhngơ̆m đon hăm Đảng, hăm Teh đak, hăm kon pơlei, ling lang atŏk kơtang hơnăp jang. Tơplĭh ‘nao trong jang, trong chĕp pơgơ̆r, bơ̆ jang hơdrin hlŏh dơ̆ng lơ̆m chĕp pơgơ̆r păng pơrô̆ jang kiơ̆ tơdrong bơ̆ jang, tơ iung pơjing Khul rơgŏh ‘lơ̆ng, pran kơtang tôm tơdrong, jang keh đang ‘lơ̆ng rim tơdrong tơlĕch jang”.

VOV1/Amazưt tơblơ̆

Viết bình luận

TIN CÙNG CHUYÊN MỤC