Vang năm hăm kang ƀô̆  Dơnŏ anih chĕp pơgơ̆r Ƀô̆ đô̆i pơlei tơm Sơn La năm ngôi ŭnh hnam oh Chiêu Thanh Trúc, hơdrung Thái, hok tro lăm 5 oei tơ̆ pơlei Nà Ngùa, găh Koeng 2, phương Chiềng An, pơlei tơm Sơn La dêh char Sơn La. Ŭnh hnam Trúc ‘noh ŭnh hnam dơnuh, mĕ ƀă ư̆h kơ dei tơdrong jang sơđơ̆ng. Hlŏh dơ̆ng ƀă Truk tă jĭ jăn dơ̆ng, măh hơnơ̆ng ming hơmet jĭ jăn, kơna ŭnh hnam sa roi mơmat tat hloh dơ̆ng.

Băt tơdrong erih sa mơmat tat kơ oh Trúc, Khul Đảng, Khul kơdră chep pơgơ̆r Ƀô̆ đô̆i  pơlei tơm Sơn La năm ngôi tơ ƀơ̆p ŭnh hnam oh; adoi tơ ƀơ̆p pơma dơnuh hăm Khul kơdră chep pơgơ̆r Hnam trương jăl kơđeh Lò Văn Giá – mă oh Truk hŏk vă chă tơgŭm djru oh lơ̆m tơdrong hok pơhrăm. Lăp đon hăm tơdrong lăng ba đơ̆ng mĕ ƀă, ƀok thây kô păng tơpôl kang ƀô̆, ƀô̆ đô̆i kơ Dơnŏ anih Ƀô̆ đô̆i pơlei tơm Sơn La, dôm sơnăm au ki, Truk hơnơ̆ng iŏk đei hŏk tro hơgei păng đei jing kôn mon kon sau Ƀok Hô gơ̆h găt. Oh Chiêu Thanh Trúc pơma: “Đei đe ma ƀô̆ đô̆i tơgŭm djru, ĭnh chơt dêh păng mĕ ƀă dă ƀiơ̆ pơngơt, ĭnh hơdrin hŏk pơhrăm mă gơ̆h vă hoei lao đon tơdrong lăng ba đơ̆ng đe mih ma Ƀô̆ đô̆i păng rim ƀok thây kô hnam trương”

Tơlech jang kiơ̆ tơdrong jang “Ba oh năm tơ̆ hnam trương”, truh dang ei, Dơnŏ anih Ƀô̆ đô̆i  pơlei tơm Sơn La hlôi iŏk rong ‘me pơm kon mŏn 5 ‘nu oh hŏk tro ŭnh hnam tơnap tap kơ hnam trương jăl Kơđeh Lò Văn Giá, pơlei tơm Sơn La hăm kon jên chă tơgŭm djru rim khei kơ mĭnh ‘nu ŏh ‘nŏh 250.000 hlak jên lơ̆m 5 sơnăm hơnơ̆ng. ‘Ngoăih kơ ‘noh, tơgŭm djru tơmam hŏk pơhrăm ăn đe oh rim ‘măng mơ̆t hok sơnăm ‘nao.

Trung tá Khuất Minh Tuấn, Chính trị viên phó, Dơnŏ anih Ƀô̆ đô̆i pơlei tơm Sơn La tơbăt: Kon jên tơgŭm djru ưh kơ lơ, mă lei ‘nau tơmam drăm đơ̆ng khul kơdră, khul  ƀô̆ đô̆i ‘meh vă vang chă tơgop tŏ sĕt vang ba đe oh ŭnh hnam mơnat tat năm hŏk pơhram vă đei jing kon pơlei đei iŏk yua ăn pơlei pơla, Tĕh đak: “Lơ̆m khei năr kơnh, Khul Đảng, Dơnŏ anih chep pơgơ̆r Ƀô̆ đô̆i pơlei tơm Sơn La nhôn gô hơnơ̆ng jang kiơ̆ kơjăp rim trong bơ̆ jang đơ̆ng Đảng, Tĕh đak, tơlĕch jang hơdăh Tơdrong tơchơ̆t chĕp pơgơ̆r kơ dơno anĭh; hơdrin chă pơrô̆ hơvơn rim răih kang ƀô̆, ƀô̆ đô̆i  lơ̆m hơnih găh tơdrong gĭt kăl ‘mêm kơ eng dih băl lơ̆m tơdrong jang au; adoi iung jang hơdoi kơjăp hăm kơdră đảng, kơdră chĕp pơgơ̆r tơring dăr lăng, lăng hơlen, băt hơdăh dôm bơngai, đơ̆ng nŏh đei trong tơgŭm djru tơtom hăm rim đe ŏh ŭnh hnam tơnap tap”.

Đơ̆ng mă sơng iŏk tơgŭm djru rim hŏk tro ŭnh hnam tơnap tap đơ̆ng Dơnŏ anih Ƀô̆ đô̆i pơlei tơm, lơ hơnih, rim bơngai lơ̆m pơlei tơm Sơn La jei hlôi sơng iŏk tơgŭm djru, vei lăng năng tông “dôm bơngai mơmat tat”. Truh dang ei, hlôi đei 110 ‘nu hŏk tro ŭnh hnam tơnap tap lơ̆m pơlei tơm đei vei lăng năng tông lơ̆m hŏk pơhrăm. Ƀok Hà Trung Chiến, Bí thư Đảng pơlei tơm Sơn La tơbăt: Hăm tơdrong pơm jŭk yŭk trong hơlau lơ̆m lơ tơdrong kơ erih sa, mă kăl bơ̆ jang vei lăng năng tông erih sa tơpôl, rim kang ƀô̆, ƀô̆ đô̆i Dơnŏ anih Ƀô̆ đô̆i pơlei tơm Sơn La hlôi păng tŏk bŏk iung jang ‘lơ̆ng hơnăp jang, sơnong jang hăm tơdrong erih sa kon pơlei pơla, tơgăl hăm jơhngơ̆m đon ‘mêm kơ eng kơ kon pơlei rim hơdrung pơlei tơm Sơn La: “Khul kơdră chĕp pơgơ̆r Đảng pơlei tơm hôn bơnê kơtang tơdrong jang đơ̆ng Dơnŏ anih Ƀô̆ đô̆i pơlei tơm, trong jang au ưh khan lăp tơgŭm rim ŭnh hnam, rim đe kôn mon erih sa tơnap tap đei rơvơn hloh lơ̆m erih sa, đei rơvơn lơ̆m năm hŏk pơhrăm, mă lei oei jing tơdrong jơhngơ̆m đon ‘lơ̆ng hơ iă, lang să lơ̆m khul jang chinh trĭ vă rim hơnih jang anai vang yak hơdoi vă jang kiơ̆ ‘lơ̆ng tơdrong jang vei lăng năng tông tơdrong erih sa tơpôl lơ̆m tơring”.

“Vang iung jang vei lăng năng tông tơdrong erih sa tơpôl păng vang ba oh năm tơ̆ hnam trương” ư̆h khan lăp trong jang pơgia păng lei hlôi jing tơdrong jang tơpă tơ̆ Dơnŏ anih Ƀô̆ đô̆i pơlei tơm Sơn La, pơm sa roi ‘lơ̆ng rŏ hơbŏ nhen hloh dơ̆ng găh Ƀô̆ đô̆i Ƀok Hô.

‘Nau jei jing hơyak pran kơjăp vă Dơnŏ anih Ƀô̆ đô̆i pơlei tơm hơdrin tơ iung pơjing “Dơnŏ anih pơrô̆ pơrôp ‘lơ̆ng”, hơnơ̆ng pơjing đei jơhngơ̆m đon lui kiơ̆ kơjăp đơ̆ng kon pơlei, iung jang kiơ̆ kơtang hloh dơ̆ng jơhngơ̆m pran đơ̆ng kon pơlei lơ̆m jang kiơ̆ tơdrong jang chinh trĭ păng atŏk kơtang bơ̆ jang vei lăng tĕh đak, vei lăng sơđơ̆ng tơring; tơgop tơ iung pơjing pơlei tơm Sơn La atŏk tơ iung rơgŏh ‘lơ̆ng, tĕnh koăng, kơ jăp păng gơ̆h hơgei.