Ƀok Trần Văn Hòa, tơngla duk BTh 95032TS oei tơ̆ tơring Phước Thể, apŭng uy Phong, dêh char Bình Thuận hlôi đei ‘măng pơm glăi năm rôp ka hơdang mă lei ưh kơ đei hla bơar ăn jang; ưh kơ chih, ưh kơ ba hla bơar chih tơbăt năm rôp ka hơdang; ưh kơ tơroi tơbăt mưh mơ̆t lĕch lơ̆m dơnŏk duk rôp ka hơdang. Dang ei, dôm tơdrong pơm glăi ‘nŏh pă đei bơih. ‘Nŏh gơnơm Ƀô̆ đô̆i vei lăng sơlam teh đak hlôi pơrô̆ pơrôp, pơtho tơbăt khôi luơ̆t, tơdrong pơkăp tơ̆ đak dơsĭ tôch hơdăh ăn kơ ƀok Hòa păng kon pơlei rôp ka hơdang lơ̆m tơring. Ƀô̆ đô̆i vei lăng sơlam teh đak oei chă pơtho tơbăt ăn kon pơlei pơm kiơ̆ chă rôp ka hơdang lơ liơ mă trŏ ƀlep hăm khôi luơ̆t, hoei pơm glăi hăm tơring đak dơsĭ teh đak đe păng tơgŭm djru xek tơlang rim tơdrong đei ƀôh tơ̆ đak dơsĭ:“Gơnơm tơdrong chă pơtho khan đơ̆ng Ƀô̆ đô̆i vei lăng sơlam teh đak, đơ̆ng noh ba mă băt, đơ̆ng noh ba chă pơtho tơbăt ăn rim bơngai jang lơ̆m duk, dôm đe boăl năm rôp ka hơdang ưh kơ gơ̆h pơm glăi. Tơdăh kon pơlei rôp ka hơdang đei tơdrong kiơ ‘nŏh ƀô̆ đô̆i vei lăng sơlam teh đak năm dŏng păng pơtho tơbăt. Pơtih gia, mư̆h đei tơdrong chă tơblă tơblŭng dih băl tơ̆ đak dơsĭ, dăh mă chă rôp ka hơdang glăi ‘nŏh ba tơroi hloi ăn kơ ƀô̆ đô̆i vei lăng sơlam teh đak, đơ̆ng noh đe sư ăn duk vă năm xek tơlang hloi, veh ver đei tơdrong tơblĕk dih băl tơ̆ đak dơsĭ”.

Truh dang ei, găh lơ kon pơlei rôp ka hơdang Bình Thuận hlôi băt hơdăh tơdrong kăl kơ tơdrong chă chih hơlen, năm ba hla bơar chih hơlen  tơdrong dăng rôp ka hơdang, pơm kiơ̆ kơjăp tơdrong pơlăp kmăi kmŏk tơbăt trong yak (VMS). 100% tơngla duk, bơngai vơ̆r duk năm rôp ka hơdang hơtăih jih đak dơsĭ kĭ pơkăp ưh kơ pơm glăi tơring đak dơsĭ teh đak đe. Ƀok Huỳnh Hương, bơngai vơ̆r duk kơ duk dăng rôp ka hơdang BTh 84025TS oei tơ̆ thĭ trân Liên Hương, apŭng Tuy Phong, dêh char Bình Thuận tơbăt:“Kơđông ƀô̆ đô̆i vei lăng ‘măng sơlam Liên Hương hơnơ̆ng chă tơƀơ̆p muh măt kon pơlei rôp ka hơdang vă chă pơma dơnuh dôm tơdrong tơ̆ đak dơsĭ. Tŏ ‘mi kial dăh mă lơ̆m năm dăng rôp ka hơdang đei tơƀơ̆p duk teh đak đe ‘noh bơ̆n jei tơroi hloi ăn kơ Ƀô̆ đô̆i vei lăng sơlam teh đak, lăng ba kơ jăp ăn kơ kon pơlei rôp ka hơdang”.

Ưh khan lăp pơrô̆ pơrôp, tơroi tơbăt khôi luơ̆t, hơlêm kon pơlei hơdrin tơklep hăm đak dơsĭ, vei lăng pơm tơm kơdih đak dơsĭ, khul Ƀô̆ đô̆i vei lăng sơlam teh đak oei tơ̆ tơring đak dơsĭ Bình Thuận oei iung jang hơdoi hăm kơdră đảng, kơdră chĕp pơgơ̆r tơring vei lăng năng tông tơdrong erih sa ăn kon pơlei oei tơ̆ achon dơsĭ, đak dơsĭ. Rim sơnăm, Ƀô̆ đô̆i vei lăng sơlam teh đak tơlĕch rim trong jang nhen: Hơnih mong jên kơ yuơ bơngai dơnuh, Bô̆i mong phe ‘mêm mơnat, Vang ba oh năm tơ̆ hnam trương ... tơgum djru tơtom ăn kon pơlei tơnap tap.

Hơdrô̆ sơnăm 2022, tơdrong jang Ba oh năm tơ̆ hnam trương hlôi tơgŭm ăn 42 ‘nu oh hăm kon jên 189 triu hlak jên; tơdrong jang “Kon rong kơđông Ƀô̆ đô̆i vei lăng sơlam teh đak hlôi tơgŭm ăn 42 ‘nu oh hŏk tro hăm kon jên hloh 100 triu hlak jên. Ƀô̆ đô̆i vei lăng sơlam teh đak oei ming man ăn rim tơring tơter đak dơsĭ kơ Bình Thuận 3 tŏ pơbŭng hnam ‘mêm mơnat, pôk ăn 9 tân phe ăn rim ŭnh hnam tơnap tap ... Ƀok Huỳnh Đình Dũng, Kơ iĕng Kơdră chĕp pơgơ̆r Hơnih vei lăng kon pơlei tơring Phước Thể, apŭng Tuy Phong, dêh char Bình Thuận tơbăt:“Lơ̆m rim tơring đei kơđông Ƀô̆ đô̆i vei lăng sơlam teh đak oei ‘nŏh tơdrong vang iung jang hơdoi ƀar păh kơdră tơring, rim hơnih bơ̆ jang tơ̆ tơring atŭm hăm kon pơlei, mă kăl hăm kon pơlei rôp ka hơdang tôch kơjăp. Jơhngơ̆m đon ‘mêm kơ eng dih băl ƀar păh kon pơlei rôp ka hơdang hăm Ƀô̆ đô̆i vei lăng sơlam teh đak tôch kơjăp ‘lơ̆ng”.

Đại tá Đinh Văn Sáu, Bí thư Đảng uỷ, Kơdră chĕp pơgơ̆r Đảng Dơnŏ anih Ƀô̆ đô̆i vei lăng sơlam teh đak dêh char Bình Thuận tơbăt, pơrô̆ pơrôp, pơtho tơbăt trong bơ̆ jang, khôi luơ̆t păng vei lăng năng tông tơdrong erih sa kơ kon pơlei pơma atŭm, lơ̆m au đei kon pơlei rôp ka hơdang ‘nŏh jing tơdrong jang kăl kơ Ƀô̆ đô̆i vei lăng sơlam Teh đak. Tơdrong jang au đei tơlĕch jang truh hămn rim kang ƀô̆, ƀô̆ đô̆i vă sơnăm đơ̆ng rŏng jang kiơ̆ ‘lơ̆ng hloh dơ̆ng, jơnei hloh dơ̆ng kơ sơnăm hơdrol:“Pơm lơ liơ chă hơvơn đei jơhngơ̆m pran tơpôl kơ pơđĭ khul jang chĭnh trĭ păng rim răih kon pơlei vă pơjing trong jang kon pơlei vang vei lăng teh đak kơjăp iăp kơtang, đơ̆ng noh jang keh đang tơdrong jang vei lăng pơm tơm kơ dih, vei lăng sơđơ̆ng tơring sơlam kơ teh đak. ‘Ngoăih kơ ‘noh, nhôn akŏm chĕp pơgơ̆r bơ̆ jang ‘lơ̆ng tơdrong jang tơ iung pơjing đảng, jang kiơ̆ ‘lơ̆ng hơnăp jang, tơdrong jang kơ rim kang ƀô̆ đang viên. Kơ yuơ ‘nau jing khul kăl hloh vă chĕp pơgơ̆r hơnih jang iung jang keh đang ‘lơ̆ng tơdrong jang lơ̆m khei năr kơnh”.

Bình Thuận đei jih đak dơsĭ atăih 192km, đei hloh 5.700 duk ka kơjing đơ̆ng 6 met năm tơ̆ kơjung, lơ̆m au đei 1.946 tong duk rôp ka hơdang kơjung 15 met năm tơ̆ kơjung vă rôp ka hơdang tơ̆ hơtăih jih đak dơsĭ.  Hơnih jang rôp ka hơdang hlôi pơjing tơdrong jang ăn hloh 46.000 ‘nu bơngai jang, lơ̆m au đei dang 15.000 ‘nu bơngai jang năm jang hloi lơ̆m duk rôp ka hơdang atăih jih đak dơsĭ. Tơdrong dăng rôp ka hơdang tơ̆ đak dơsĭ oei tơƀơ̆p tôch lơ tơdrong tơnap tap, hli hlơt, mă lei hăm tơdrong lăng ba, tơgŭm djru đơ̆ng teh đak, kơdră chĕp pơgơ̆r tơring păng khul Ƀô̆ đô̆i vei lăng sơlam teh đak, kon pơlei rôp ka hơdang Bình Thuận đei dơ̆ng jơhngơ̆m pran iung jang tơklep kơjăp hăm đak dơsĭ, sơkơ̆t hơdăh tơdrong pơm tơm tơngla đak dơsĭ, achon dơsĭ gĭt kăl kơ Teh đak.